ଭଞ୍ଜନଗର,୧୨/୦୧: ଘର ଉପରେ ବଣୁଆ ହାତୀର ଆକ୍ରମଣ । ହାତୀକୁ ଦେଖି ଘର ଭିତରୁ ଦୌଡ଼ି ପଳାଉଥିବା ବେଳେ, ହାତୀର ଗୋଡ ବାଜିବାରୁ, ତଳେ ପଡି ବାପ-ଝିଅ ଆହତ । ଗୁରୁତର ଅବସ୍ଥାରେ ଭଞ୍ଜନଗର ମେଡିକାଲରେ ଭର୍ତ୍ତି ହୋଇଛନ୍ତି । ଆହତ ବ୍ୟକ୍ତି ଜଣକ ତ୍ରିଲୋଚନ ମନ୍ତ୍ରୀ ଏବଂ ତାଙ୍କ ଝିଅ ଖୁସି ମନ୍ତ୍ରୀ (୮) ବୋଲି ଜଣାପଡ଼ିଛି । ଗଞ୍ଜାମ ଜିଲ୍ଲା ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ମୁଜାଗଡ ବନାଞ୍ଚଳ ଅନ୍ତର୍ଗତ ସରପଡା ଗାଁରେ ଏମିତି ଏକ ଘଟଣା ଘଟିଛି ।
ଆହତ ତ୍ରିଲୋଚନ କହିବା ପ୍ରକାରେ, ରାତି ପ୍ରାୟ ୩ ଟା ସମୟର ଘଟଣା । ଘରେ ସମସ୍ତେ ଶୋଇଥିବା ସମୟରେ, ତାଙ୍କ ଘର ପାଖକୁ ହାତୀଟି ଆସିଥିଲା । ସେହି ସମୟରେ କୁକୁର ଭୁକିବାରୁ ହାତୀଟି ଗୋଡ଼ାଇଥିଲା ଏବଂ ତ୍ରିଲୋଚନଙ୍କ ଘର ଉପରେ ଆକ୍ରମଣ କରିଥିଲା । ଏହା ଦେଖି ଶୋଇଥିବା ଝିଅ ଖୁସିକୁ ଧରି ଦୌଡ଼ି ପଳାଉଥିବା ବେଳେ, ସେ ତଳେ ପଡ଼ିଯାଇଥିଲେ । ସେହି ସମୟରେ ହାତୀଟି ତାଙ୍କ ଗୋଡ଼କୁ ସାମାନ୍ୟ ଦଳି ଦେଇଥିଲା । ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଭଞ୍ଜନଗର ମେଡିକାଲରେ ପହଞ୍ଚିଥିଲେ ।
ବନଖଣ୍ଡ ଅଧିକାରୀ ହିମାଂଶୁ ମହାନ୍ତି ସମେତ ମୁଜାଗଡ ବନପାଳ ଅଭିମନ୍ୟୁ ମଲ୍ଲିକ ବନରକ୍ଷୀ ଶୁଶାନ୍ତ ମିଶ୍ର ମେଡିକାଲରେ ପହଞ୍ଚି ତାଙ୍କ ସ୍ବାସ୍ଥ୍ୟ ଅବସ୍ଥା ଅନୁଧ୍ୟାନ କରିଛନ୍ତି । ଏହି ଘଟଣା ପରେ ସଂପୃକ୍ତ ଗାଁ ଲୋକଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି । ଗତ ଏକ ସପ୍ତାହ ମଧ୍ୟରେ ମୁଜାଗଡ ବନାଞ୍ଚଳର ବିରିକୋଟ, ଗୁଣ୍ଡୁରିବାଡି, ନିଧିଆପଲ୍ଲୀ ଗାଁ ମାନଙ୍କରେ ଏକାଧିକ ଘର ଓ ସ୍କୁଲରେ ଭଙ୍ଗାରୁଜା କରିଛନ୍ତି ହାତୀପଲ । ଏହାକୁ ନେଇ ସ୍ଥାନୀୟ ଅଞ୍ଚଳରେ ଲୋକ ଏକ ପ୍ରକାର ଭୟଭୀତ ଅବସ୍ଥାରେ ରହିଛନ୍ତି । ତେବେ କ୍ଷତିଗ୍ରସ୍ତଙ୍କୁ ସରକାରୀ ନିୟମ ପ୍ରକାରେ କ୍ଷତିପୂରଣ ଦିଆଯିବ ବୋଲି କହିଛନ୍ତି ବନଖଣ୍ଡ ଅଧିକାରୀ ଶ୍ରୀ ମହାନ୍ତି।
