ଦିଗପହଣ୍ଡି, ୩୦।୧ :ଗଞ୍ଜାମ ଜିଲ୍ଲା ସାନଖେମୁଣ୍ଡିରେ ପୁଣି ହାତୀ ମୃତ । ଗଙ୍ଗାପୁର ପଞ୍ଚାୟତର ଭୀମନଗର ଓ ସଢେପ ମଧସ୍ଥ ଜଙ୍ଗଲରେ ଏକ ହାତୀର ମୃତଦେହ ଉଦ୍ଧାର କରାଯାଇଛି। ହାତୀ ମୃତ୍ୟୁର କାରଣ ଏ ପର୍ଯ୍ୟନ୍ତ ଜଣା ପଡି ନାହିଁ। ଦୁଇ ମାସ ତଳେ ବିଦ୍ୟୁତ୍ ଆଘାତରେ ସାନଖେମୁଣ୍ଡିରେ  ଗୋଟିଏ ହାତୀର ମୃତ୍ୟୁ ଘଟିଥିଲା। 

ସୂଚନା ଯୋଗ୍ୟ ଯେ ଗତ କିଛି ଦିନ ଧରି ରାଜ୍ୟରେ ହାତୀ ମୃତ୍ୟୁ ଘଟି ଚାଲିଛି। ଗତ ୨୯ ତାରିଖରେ ଭୁବନେଶ୍ବର ଯୁଯୁମୁରା ରେଞ୍ଜ ଯାଦୁ ଲୋଇସିଂହରେ ଥିବା  ଗାଁ ପାଖ ବିଲରୁ ହାତୀର ମୃତଦେହ ଉଦ୍ଧାର ହୋଇଥିଲା । ଯାଦୁ ଲୋଇସିଂହ ଗାଁ ବିଲ ପାଖରେ ଏକ ଦନ୍ତା ହାତୀର ମୃତଦେହ ପଡ଼ିଥିବାର ଦେଖିବାକୁ ପାଇଥିଲେ ସ୍ଥାନୀୟଲୋକେ । ଏହା ଦେଖି ସ୍ଥାନୀୟଲୋକେ ତୁରନ୍ତ ବନ ବିଭାଗର କର୍ମଚାରୀଙ୍କୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ବିଭାଗର କର୍ମଚାରୀ ପହଞ୍ଚି ହାତୀଟିର ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଥିଲେ। ସେହିପରି ଶିମିଳିପାଳରେ ମାତ୍ର କେଇ ଦିନ ମଧ୍ୟରେ ଦୁଇ କୁମକୀ ହାତୀଙ୍କ ମୃତ୍ୟୁ ହୋଇଛି । ଗତ ୧୨ ତାରିଖରେ ଗଜରାଜ ମହେନ୍ଦ୍ର  ମୃତ୍ୟୁ ହୋଇଥିଲା । ୨୮ ତାରିଖରେ ଜେନାବିଲଠାରେ ମାଈ ହାତୀ ଭବାନୀର ମୃତ୍ୟୁ ହୋଇଛି।