ନୀଳଗିରି,୧୦/୦୧:ବାଲେଶ୍ଵର ଜିଲ୍ଲା ନୀଳଗିରି ଅଞ୍ଚଳରେ ଥିବା କୁଳଡିହା ଅଭୟାରଣ୍ୟ ଏବେ ବିପଦରେ । କେତେବେଳେ ହାତୀ ମାରି ଦାନ୍ତ ଲୁଟ୍ କରୁଛନ୍ତି ତ ଆଉ କେତେବେଳେ ଅବାଧରେ ଗଛକଟା ଚାଲିଛି । ଛତୁ ଫୁଟିବା ଭଳି ଇଟାଭାଟି ଇକୋ ସେନସେଟିଭ ଯୋନ ତଥା କୂଳଡିହା ଅଭୟାରଣ୍ୟ ନିକଟରେ ଚାଲିଥିବାବେଳେ ଅନେକ ବେଆଇନ କାରବାର ହେଉଥିବା ଦେଖାଯାଇଛି । ବନ୍ୟଜନ୍ତୁ ସୁରକ୍ଷାରେ ବନକର୍ମଚାରୀ ସମ୍ପୂର୍ଣ୍ଣ ବିଫଳ ହେବା ଏବେ ନଜରକୁ ଆସିଛି । ପରିଣାମ ସ୍ୱରୂପ ଏବେ ଗାଁରେ ଗାଁ ଭିତରେ ହରିଣ ଛାଲ,ଝିଙ୍କ କାଠି,ବନ୍ଧୁକ ଜବତ ହୋଇଛି ।
ସୂଚନାଯୋଗ୍ୟ, ବାଲେଶ୍ୱର ଜିଲ୍ଲା ନୀଳଗିରି ଅଞ୍ଚଳରେ ଥିବା ପ୍ରାକୃତିକ ସୌନ୍ଦର୍ଯ୍ୟଭରା କୁଳଡିହା ଅଭୟାରଣ୍ୟ ଏବେ ବିପଦରେ । ଦୁଇ ବର୍ଷରେ ୧୨ ରୁ ଅଧିକ ହାତୀ ମୃତ୍ୟୁ ହୋଇଥିବା ବେଳେ ଶିକାରୀ ମାନେ ଦାନ୍ତ ଲୁଟ୍ କରୁଛନ୍ତି । ଅଭୟାରଣ୍ୟ ସୀମାନ୍ତରେ ରହୁଥିବା ଶିକାରୀ ମାନେ ଅବାଧରେ ଶିକାର କରୁଥିବା ଜଣାପଡିଛି । ହରିଣ, ସମ୍ବର, ଝିଙ୍କ, ଠେକୁଆଙ୍କୁ ମାରିବା ସହ ଏହାର ଛାଲ,ସିଙ୍ଗ ସମେତ ଝିଙ୍କ କାଠି ବାହାରକୁ ଚାଲାଣ କରୁଛନ୍ତି । କୂଳଡିହା ଅଭୟାରଣ୍ୟରେ କାର୍ଯ୍ୟରତ କର୍ମଚାରୀ ମାନେ କିଭଳି ପେଟ୍ରୋଲିଂ କରୁଛନ୍ତି ତାହା ଏବେ ସନ୍ଦେହରେ । ସରକାରୀ ଗାଡ଼ିରେ ବସି ଅଧିକାରୀ ଖାଲି ପଇଁତରା ମାରିବା ଛଡା ଆଉ କିଛି ଚାରାନାହିଁ । ଯେଉଁ ସବୁଜ ବାହିନୀ ଓ ଗାର୍ଡ ନିୟୋଜିତ ଅଛନ୍ତି ତାଙ୍କର ସଂଖ୍ୟା କମ୍ ଥିବାରୁ ଶିକାରୀଙ୍କ ପାଖକୁ ଯିବାକୁ ଭୟ କରୁଛନ୍ତି । ପୂର୍ବରୁ ବାଡ଼ି ଖଣ୍ଡେ ହାତରେ ଦେଇ ଡିଉଟି କରୁଥିବା ବେଳେ ଏବେ ହାତରେ ବନ୍ଧୁକ ଦେଇ ଟ୍ରେନ୍ଡ କରାଯାଉଛି ସତ ଆଗକୁ ଅଭୟାରଣ୍ୟ ସୁରକ୍ଷା କରିବାରେ ଏହା କେତେ ଦୂର ସଫଳ ହେବେ ତାହା ସମୟ କହିବ ।
ତେବେ ଦିନକ ପୂର୍ବରୁ ତେଲିପାଲ ପଞ୍ଚାୟତର ପୁଟିବନ୍ଧ ଗାଁରେ ଦୁଇଟି ବନ୍ଧୁକ ସମେତ ତିନିଜଣ ଶିକାରୀଙ୍କୁ ପୋଲିସ ସହାୟତରେ ଗିରଫ କରାଯାଇଛି । ସେମାନଙ୍କ ପାଖରୁ ହରିଣ ଛାଲ,ଝିଙ୍କ କାଠି ମଧ୍ୟ ଜବତ ହୋଇଛି । କେବଳ ସେତିକି ନୁହେଁ, ସେମାନେ ପୂର୍ବରୁ ଅଭୟାରଣ୍ୟ ଭିତରେ ପଶି ଅବାଧରେ ଶିକାର କରୁଥିଲେ। ସେ ସମୟରେ ବନ କର୍ମଚାରୀ କିଭଳି ପେଟ୍ରୋଲିଂ କରୁଥିଲେ ତାହା ସ୍ପଷ୍ଟ ଅନୁମେୟ। ଏବେ ଖାଲି ଶିକାରୀଙ୍କ ପ୍ରାଦୁର୍ଭାବ ଅବାଧରେ ଗଛ କଟା ଚାଲିଛି । ସୀମାନ୍ତରେ ଛତୁ ଫୁଟିବା ଭଳି ଇଟାଭାଟି ଚାଲିଥିବା ବେଳେ ବନବିଭାଗ ନିରବଦୃଷ୍ଟା ସାଜିଛି ।
