ସୋର,୦୪/୦୧: ବିଳମ୍ବିତ ରାତିରେ ପରିବାର ଚାରି ସଦସ୍ୟ ଶୋଇଥିବା ବେଳେ ଜଳିଗଲା ଘର । ଅଳ୍ପକେ ବର୍ତ୍ତିଲେ ପରିବାର ଲୋକେ । ଏହି ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଥିବା ବେଳେ ଘରେ ଥିବା ୩୫ ହଜାର ଟଙ୍କା ଓ ୨୦ ଗ୍ରାମ ସୁନା ପୋଡ଼ିଯାଇଛି । ବାଲେଶ୍ୱର ଜିଲ୍ଲା ସୋର ଅଞ୍ଚଳର ତେଣ୍ଟେଇ ଶୋଳଗାଁ ବସନ୍ତ ସେଠୀଙ୍କ ଘରେ ଏହି ଅଗ୍ନିକାଣ୍ଡ ଘଟିଛି ।
ସୂଚନା ମୁତାବକ, ଶୁକ୍ରବାର ରାତିରେ ବସନ୍ତ ସେଠୀ ତାଙ୍କ ସ୍ତ୍ରୀ ନିରୁପମା,୧୦ ବର୍ଷର ପୁଅ ସତ୍ୟଜିତ ଓ ୨ବର୍ଷର ଝିଅ ରଞ୍ଜିତା ଘରେ ଶୋଇଥିଲେ । ଏହି ସମୟରେ ହଠାତ୍ ଘରେ ନିଆଁ ଲାଗି ଯାଇଥିଲା । ନିଆଁ ଲାଗିବାରୁ ଘର ଧୁଆଁରେ ଭର୍ତ୍ତି ହୋଇ ଯାଇଥିଲା । ଧୁଆଁ ହେବାରୁ ସମସ୍ତେ ନିଆଁ ଲାଗିଥିବା ଜାଣି ପାରିଥିଲେ । ନିଆଁ ଲାଗିଥିବା ଦେଖି ତୁରନ୍ତ ସମସ୍ତେ ଘର ବାହାରକୁ ଦୈଡ଼ି ପଳାଇଥିଲେ ଏବଂ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ଅଗ୍ନିଶମ ବାହିନୀର ଏକ ଟିମ୍ ପହଞ୍ଚି ନିଆଁକୁ ଆୟତ କରିଛି । ତେବେ ଏହି ଅଗ୍ନିକାଣ୍ଡରେ ବସନ୍ତଙ୍କର ନଗଦ ୩୫ ହଜାର ଟଙ୍କା ଓ ୨୦ ଗ୍ରାମ ସୁନା ପୋଡ଼ିଯାଇଛି ।
