ମୁନିଗୁଡା,୨୬।୭ : ଏଟିଏମ ଲୁଟ ପାଇଁ ଯୋଜନା କରୁଥିବା ବେଳେ ପୁଲିସ ଚଢାଉ କରି ୩ ଜଣଙ୍କୁ ଗିରଫ କରିଛି। ସେମାନଙ୍କ ନିକଟରୁ ଗୋଟିଏ ଶାବଳ, ଗୋଟିଏ କାତି, ଗୋଟିଏ ପ୍ଲାସ ସହ ଦୁଇଟି ମୋବାଇଲ ଓ ଗୋଟିଏ ମୋଟର ସାଇକେଲ ଜବତ କରିଛି। ଅଭିଯୁକ୍ତ ମାନେ ହେଲେ ଆମ୍ବାଦଳା ଥାନା ଅନ୍ତର୍ଗତ ବାଲିଯୋଡ଼ି ଗ୍ରାମର ଅମ୍ରିକା ଓ ସାଙ୍କୁଳି ପଦର ଗ୍ରାମର ଲକିରାମ କୁଲେଶିକା ଓ ବିସମ୍ବର ପ୍ରାସ୍କାକା।
ଶୁକ୍ରବାର ବିଳମ୍ବିତ ରାତିରେ ଅମ୍ବାଦଳା ପୁଲିସ ପାଟ୍ରୋଲିଂ କରି ଫେରୁଥିଲେ। ଏହି ସମୟରେ ଇନ୍ଦିରାପଡା ଢ଼ାବା ନିକଟ ବାଲିଯୋଡ଼ିକୁ ଯିବା ରାସ୍ତାରେ ତିନି ଜଣ ଯୁବକ ପୁଲିସଙ୍କୁ ଦେଖି ଦୌଡ଼ି ପଲାଇ ଯିବାକୁ ଚେଷ୍ଟା କରିଥିଲେ। ସନ୍ଦେହ ହେବାରୁ ଅମ୍ବାଦଳା ପୁଲିସ ଉକ୍ତ ତିନି ଜଣ ଯୁବକଙ୍କୁ ଧରି ଥାନାକୁ ନେଇ ପଚରା ଉଚୁରା କରିଥିଲା। ସେମାନେ ଅମ୍ବାଦଳା ଟାଉନ ଭିତରେ ଥିବା ଏକ ଏଟିଏମ୍ ଲୁଟ କରିବା ପାଇଁ ଯୋଜନା କରୁଥିଲେ ବୋଲି କହିଥିଲେ। ସେମାନଙ୍କ ଠାରୁ ଏଟିଏମ ଲୁଟ ପାଇଁ ରଖିଥିବା ଗୋଟିଏ ଶାବଳ, ଗୋଟିଏ କାତି, ଗୋଟିଏ ପ୍ଲାସ ସହ ଦୁଇଟି ମୋବାଇଲ ଓ ଗୋଟିଏ ମୋଟର ସାଇକେଲ ଜବତ କରାଯାଇଥିବା ମୁନିଗୁଡ଼ା ଏସଡିପିଓ ସୂଚନା ଦେଇଛନ୍ତି। ଅଭିଯୁକ୍ତ ତିନି ଜଣଙ୍କୁ କୋର୍ଟ ଚାଲାଣ କରାଯାଇଛି।
