ବଲାଙ୍ଗୀର, ୨୫/୦୯: ଜଳବନ୍ଦୀ ଅବସ୍ଥାରେ ରହିଥିଲେ ୨୦୦ ପରିବାର । ସମସ୍ୟାର ସମାଧାନ ପାଇଁ ଜାତୀୟ ରାଜପଥ ଅବରୋଧ କଲେ ଅଞ୍ଚଳବାସୀ । ପରେ ପୌର ପରିଷଦ ହସ୍ଥକ୍ଷେପ କରି ଜଳ ନିଷ୍କାସନ କରିଥିଲା । ବଲାଙ୍ଗୀର ଜିଲ୍ଲା ୯ ନମ୍ୱର ୱାର୍ଡ ଗାନ୍ଧୀନଗର ପଡାରେ ଏଭଳି ଦୃଶ୍ୟ ଦେଖିବାକୁ ମିଳିଛି ।

ସୂଚନା ମୁତାବକ, ବିଗତ ଦିନର ଲଗାଣ ବର୍ଷାରେ ବେହାଲ ହୋଇଛି ବଲାଙ୍ଗୀର ଜିଲ୍ଲା । ଏହାର ପରିଣାମ ସ୍ୱରୂପ ୯ ନମ୍ୱର ୱାର୍ଡ ଗାନ୍ଧୀନଗର ପଡାର ୨୦୦ ପରିବାର ଜଳବନ୍ଦୀ ହୋଇ ରହିଥିଲେ । ତେବେ ଏନେଇ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଇ ନଥିବାରୁ ରାଜରାସ୍ତାକୁ ଓହ୍ଲାଇ ରାସ୍ତା ଅବରୋଧ କରିଥିଲେ ଅଞ୍ଚଳବାସୀ । ପରେ ପୌର ପରିଷଦ ଏହି ଘଟଣାରେ ହସ୍ଥକ୍ଷେପ କରି ଜଳ ନିଷ୍କାସନ ବ୍ୟବସ୍ଥା କରିଥିଲା । ଏହା ପରେ ଉକ୍ତ ଅଞ୍ଚଳରେ ପାଣି କମିଥିଲା । 

ତେବେ ଏହାର ସ୍ଥାୟୀ ସମାଧାନ ନକଲେ ପୁଣି ଏଭଳି ପରିସ୍ଥିତି ହେବ ବୋଲି ଲୋକ ଅଭିଯୋଗ କରିବାରୁ ୨ ମାସ ସମୟ ମାଗିଛି ପୌର ପରିଷଦ ବିଭାଗ । ସେପଟେ ଘରେ ଘରେ ପାଣି ପଶିଥିବାରୁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ସହରବାସୀ।