ବଲାଙ୍ଗୀର,୨୩/୦୯: ବେଆଇନ ଶ୍ରମିକ ଚାଲାଣ ବେଳେ ୧୨ ଜଣ ଶ୍ରମିକ ଉଦ୍ଧାର । ଏଥିରେ ସମ୍ପୃକ୍ତ ଥିବା ୨ ଜଣ ଦଲାଲ ସାହାଜପାଣି ଗାଁର ପଦ୍ମନ ମେହେର ଓ କଟାପାଲି ଗାଁର ଗଦା ଝାକର ଗିରଫ ହୋଇ କୋର୍ଟ ଚାଲାଣ ହୋଇଛନ୍ତି । ଉଦ୍ଧାର ଶ୍ରମିକମାନେ କଟାପାଲି ଗାଁର ୬ଜଣ, ପାଚେର ଗାଁର ୪ ଜଣ ଏବଂ ପାଇକମାଲର ୨ ଜଣ ବୋଲି ଜଣାପଡ଼ିଛି । ବଲାଙ୍ଗୀର ଜିଲ୍ଲା ପାଟଣାଗଡ଼ ବ୍ଲକରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ବଲାଙ୍ଗୀର ଜିଲ୍ଲାରେ ଆରମ୍ଭ ହେଲା ଦାଦନ ଋତୁ । ପାଟଣାଗଡ଼ ବ୍ଲକରେ ଶ୍ରମିକମାନଙ୍କୁ ଆନ୍ଧ୍ରପ୍ରଦେଶର ବିଜୟବାଡାକୁ ବେଆଇନ ଚାଲାଣ ହେଉଥିବା ନେଇ ପୂର୍ବରୁ ଖବର ପାଇଥିଲା ଖପ୍ରାଖୋଲ ପୋଲିସ । ତେବେ ରବିବାର ରାତିରେ ଏହି ଚାଲାଣ ସମୟରେ ପୋଲିସ ଚଢାଉ କରିଥିଲା । ଏହି ସମୟରେ ଚାଲାଣ ହେଉଥିବା ୧୨ ଜଣ ଶ୍ରମିକଙ୍କୁ ଉଦ୍ଧାର କରି ଏଥିରେ ସମ୍ପୃକ୍ତ ଥିବା ୨ ଜଣ ଦଲାଲଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏଥି ସହିତ ଉଦ୍ଧାର ଶ୍ରମିକ ମାନଙ୍କୁ ପୋଲିସ ନିଜନିଜ ଗାଁକୁ ପଠାଇ ଦେଇଛି ।