ଫୁଲବାଣୀ, ୧୮/୨ : ଏକ ନାବାଳିକା ବଳାତ୍କାର ମାମଲାର ଶୁଣାଣୀ କରି ଫୁଲବାଣୀ ପୋକସୋ ଅଦାଲତ ଅଭିଯୁକ୍ତକୁ ୨୦ ବର୍ଷ ଜେଲ ଦଣ୍ଡାଦେଶ ଦେଇଛନ୍ତି। ଏଥିସହ ଅଭିଯୁକ୍ତକୁ ୫୫ ହଜାର ଟଙ୍କା ଜରିମାନା କରାଯାଇଛି। ଜରିମାନା ଅନାଦେୟ ଦୋଷୀକୁ ଅଧିକ ୯ ମାସ ଜେଲ ଭୋଗିବାକୁ ପଡିବ ବୋଲି ଅଦାଲତ ତାଙ୍କ ରାୟରେ ଉଲ୍ଲେଖ କରିଛନ୍ତି। ଅଭିଯୁକ୍ତ ଜଣକ ହେଲେ ଟିକାବାଲି ଥାନା ଅଞ୍ଚଳର ଷ୍ଟିଭେନ ଦିଗାଲ(୨୪)।
ସୂଚନା ଅନୁଯାୟୀ, ଗତ ୨୦୨୨ ଏପ୍ରିଲ ୬ ତାରିଖ ରାତି ପ୍ରାୟ ୮ ଟା ବେଳେ ଷ୍ଟିଭେନ ତାଙ୍କର ୪ ଜଣ ସହଯୋଗୀଙ୍କ ସହିତ ପୀଡିତାଙ୍କ ଘରକୁ ଆସିଥିଲେ। ଘରେ କେହି ନ ଥିବାର ସୁଯୋଗ ନେଇ ସେ ପୀଡିତାଙ୍କୁ ଉଠାଇ ନେଇଥିଲେ। ଘରଲୋକେ ଫେରି ଝିଅ ନ ଥିବା ଦେଖି ଖୋଜାଖୋଜି କରିଥିଲେ ମଧ୍ୟ ପାଇ ନ ଥିଲେ। ଫଳରେ ଏ ନେଇ ୧୦ ତାରିଖରେ ବାପା ଟିକାବାଲି ଥାନାରେ ଏତଲା ଦେଇଥିଲେ। ପୁଲିସ ଏକ ମାମଲା ରୁଜ୍ଜୁ କରି ତଦନ୍ତ ଆରମ୍ଭ କରିଥିଲା। ତେବେ ପୁଲିସ ଖୋଜୁଥିବା ଜାଣିପାରି ଅଭିଯୁକ୍ତ ପୀଡିତାଙ୍କୁ ନେଇ କେରଳ ଚାଲି ଯାଇଥିଲା। ପରେ ସେହି ମାସ ୧୬ ତାରିଖରେ ଆସି ଟିକାବାଲି ଥାନାରେ ପୀଡିତାଙ୍କୁ ଛାଡି ଦେଇଥିଲା। ପୁଲିସ ପୀଡିତାଙ୍କୁ ଉଦ୍ଧାର କରିବା ସହିତ ଅଭିଯୁକ୍ତକୁ ଗିରଫ କରିଥିଲା। ଏହି ମାମଲାର ଶୁଣାଣୀ କରି ଫୁଲବାଣୀ ସ୍ବତନ୍ତ୍ର ପୋକସୋ କୋର୍ଟ ବିଚାରପତି ୧୨ ଜଣ ସାକ୍ଷୀଙ୍କ ବୟାନ ଓ ଅନ୍ୟ ତଥ୍ୟ ପ୍ରମାଣ ଆଧାରରେ ଉପରୋକ୍ତ ରାୟ ଶୁଣାଇଛନ୍ତି। ପୀଡିତାଙ୍କୁ ୮ ଲକ୍ଷ ଟଙ୍କାର କ୍ଷତିପୂରଣ ଦେବା ପାଇଁ ମଧ୍ୟ ନିର୍ଦ୍ଦେଶ ଦେଇଛନ୍ତି ଅଦାଲତ। ମାମଲାଟିକୁ ସ୍ବତନ୍ତ୍ର ପିପି ଅସୀମ ପ୍ରହରାଜ ପରିଚାଳନା କରୁଥିଲେ।
