ଖଲ୍ଲିକୋଟ,୭/୬ : ଶ୍ରୀ କୃଷ୍ଣ ଶରଣପୁର ଗ୍ରାମରେ ରାଜନୈତିକ ହିଂସାରୁ ଗତ ମାସ ୧୫ତାରିଖରେ ଘଟିଥିବା ଦିଲ୍ଲୀପ ପାହାନ ହତ୍ୟା ଘଟଣାରେ ପୂର୍ବରୁ ୧୭ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିବାବେଳେ ଆଜି ଆଉ ୨ ଜଣ ଅଭିଯୁକ୍ତଙ୍କୁ ରାଜକୋଟରୁ ଗିରଫ କରାଯାଇଥିବା ସୂଚନା ଦେଇଛନ୍ତି ଖଲ୍ଲିକୋଟ ଥାନା ଅଧିକାରୀ ନରେଶ କୁମାର ସାହୁ । ଏଥିସହ ହତ୍ୟାରେ ବ୍ୟବହୃତ ଆଉ ଏକ ଖଣ୍ଡାକୁ ମଧ୍ୟ ପୋଲିସ ଜବତ କରିଛି । ଆଜି ଗିରଫ ହୋଇଥିବା ୨ଜଣ ହେଲେ ଶ୍ରୀ କୃଷ୍ଣ ଶରଣପୁର ଗ୍ରାମର ଗୌରୀ ଗୌଡ଼ ଓ କେଶପୁରର ଆଶିଷ କୁମାର ସାହୁ ଓରଫ ପାଣ୍ଡା । 

ଗିରଫ ୨ ଜଣଙ୍କୁ ପଚରାଉଚରା ପରେ ପୋଲିସ ଗୁରୁଣ୍ଠି ଗ୍ରାମ ନିକଟସ୍ଥ କାଜୁ ଜଙ୍ଗଲରୁ ଆଉ ଏକ ଖଣ୍ଡାକୁ ଜବତ କରିଥିଲେ। ପୂର୍ବରୁ ରାମଚନ୍ଦ୍ର ପୁର ଗ୍ରାମ ନିକଟସ୍ଥ ପଡିଆ ରେ ପୋତା ଯାଇଥିବା ଏକ ଖଣ୍ଡାକୁ ପୋଲିସ ଜବତ କରିଥିଲେ । ଖଲ୍ଲିକୋଟ ଥାନା ଏସଆଇ ପାର୍ଥ ପ୍ରତିମ ଦେବତାଙ୍କ ନେତୃତ୍ୱରେ ଏକ ୪ଜଣିଆ ପୋଲିସ ଟିମ ଗୁଜୁରାଟ ରାଜକୋଟ ଯାଇ ଉକ୍ତ ୨ ଅଭିଯୁକ୍ତଙ୍କୁ ଗିରଫ କରି ଏସଆଇଟିକୁ ହସ୍ତାନ୍ତର କରିଥିଲେ । ଏହି ୨ଜଣଙ୍କୁ ମିଶାଇ ଦିଲ୍ଲୀପ ହତ୍ୟାକାଣ୍ଡ ଘଟଣାରେ ଗିରଫ ସଂଖ୍ୟା ୧୯ରେ ପହଞ୍ଚିଛି । ଏସଆଇଟି ଟିମ ଘଟଣାର ତଦନ୍ତ ଜାରି ରଖିଛି। ଏହି ଘଟଣାରେ ଆହୁରି ୪ଅଭିଯୁକ୍ତ ବାହାରେ ବୁଲୁଥିବା ଆଇଆଇସି ସୂଚନା ଦେଇଛନ୍ତି।