ନୂଆଦିଲ୍ଲୀ,୧୧।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବରେ ନେଇଛନ୍ତି ଶପଥ। ମୋଦିଙ୍କ ତୃତୀୟ କାର୍ଯ୍ୟକାଳରେ ଏବେ ଚୀନ୍କୁ ଦିଆଯିବ ଯେଶାକୁ ତେସା ନୀତିରେ ଜବାବ୍। କୁହାଯାଉଛି ଯେ, ଅରୁଣାଚଳ ପ୍ରଦେଶରେ ଚୀନ୍ର ଜବରଦଖଲ ଗତିବିଧିର ଜବାବ୍ ଏବେ ତା’ ଭାଷାରେ ଦିଆଯିବ। ଭାରତ ଏବେ ତିବ୍ଦତର ୩୦ଟି ସ୍ଥାନର ନାଁ ପରିବର୍ତ୍ତନ କରିବାର ନିଷ୍ପତ୍ତି ନେଇଛି।
ମଙ୍ଗଳବାର ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ପଦଭାର ଗ୍ରହଣ କରିଛନ୍ତି। ସେ ମଧ୍ୟ ଚୀନ୍ ସହ ଜାରି ସୀମା ବିବାଦର ସମାଧାନ କରିବାକୁ ଅଗ୍ରାଧିକାର ଦେଇଛନ୍ତି। ଭାରତ ସରକାର ତିବ୍ଦତର ୩୦ଟି ସ୍ଥାନର ନାଁ ବଦଳାବା ଉପରେ ମୋହର ଲଗାଇ ଦେଇଛନ୍ତି। ଏହି ନାଁ ଐତିହାସିକ ଗବେଷଣା ଓ ତିବ୍ଦତୀୟ ଅଞ୍ଚଳର ଆଧାର ଉପରେ ରଖାଯିବ। ଭାରତୀୟ ସେନା ଏହି ନାଁକୁ ଜାରି କରିବ। ଏହାପରେ ଏଲଏସିର ମ୍ୟାପ୍ରେ ଏହି ସ୍ଥାନର ନାଁକୁ ଅପଡେଟ୍ କରି ଦିଆଯିବ। ସବୁଠାରୁ ଖାସ୍ କଥା ଏହା ଯେ, ସରକାରଙ୍କ ପକ୍ଷରୁ ପଦକ୍ଷେପ ଏଭଳି ସମୟରେ ନିଆଯାଇଛି, ଯେତେବେଳେ ଚୀନ୍ ଏପ୍ରିଲରେ ଅରୁଣାଚଳ ପ୍ରଦେଶର ୩୦ ସ୍ଥାନର ନାଁ ବଦଳାଇ ଦେଇଥିଲା। ଏହି ନିଷ୍ପତ୍ତି ଉପରେ ଭାରତ ପକ୍ଷରୁ କଡା ବିରୋଧ କରାଯାଇଥିଲା ଲିଷ୍ଟରେ ୧୧ ଆବାସିକ ଅଞ୍ଚଳ, ୧୨ ପାହାଡ, ୪ ନଦୀ, ଗୋଟିଏ ହ୍ରଦ, ଗୋଟିଏ ମାଉଣ୍ଟେନ୍ ପାସ୍ ଓ ଏକ ଟୁକୁଡା ରହିଛି । ଚୀନ୍ ପକ୍ଷରୁ ବାରମ୍ବାର ଦାବି କରାଯିବା ପରେ ମଧ୍ୟ ଭାରତ ସ୍ପଷ୍ଟ କରିଛି ଯେ, ଅରୁଣାଚଳ ପ୍ରଦେଶ ଦେଶର ଅଭିନ୍ନ ଅଙ୍ଗ।
ଜୟଶଙ୍କର କହିଛନ୍ତି, ଭାରତ ଓ ଚୀନ୍ ଭିତରେ ଥିବର ସୀମା ବିବାଦ ପ୍ରସଙ୍ଗର ସମାଧାନକୁ ଅଗ୍ରାଧିକାର ଦେବୁ। ‘ଭାରତ ପ୍ରଥମ’ ଓ ’ବସୁଧୈବ କୁଟୁମ୍ବକମ୍’ ହେବ ଭାରତୀୟ ବୈଦେଶିକ ନୀତିର ଦୁଇ ସିଦ୍ଧାନ୍ତ। ପୂର୍ବ ଲଦାଖରେ ୪ ବର୍ଷରୁ ଅଧିକ ସମୟ ହେବ ଜାରି ସୀମା ବିବାଦ କାରଣରୁ ଦୁଇ ଦେଶର ଦ୍ବିପାକ୍ଷିକ ସମ୍ପର୍କ ଖୁବ୍ ଖରାପ ହେବାରେ ଲାଗିଛି। କେବଳ ସେତିକି ନୁହେଁ ଜୟଶଙ୍କର ପାକିସ୍ତାନର ସୀମାପାର ଆତଙ୍କବାଦୀ ସମ୍ପର୍କରେ ମଧ୍ୟ ଆଲୋଚନା କରିଥିଲେ। ଏହି ସମୟରେ ସେ କହିଥିଲେ, ସବୁ ପ୍ରକାର ଚ୍ୟାଲେଞ୍ଜର ସାମନା କରିବାକୁ ଆମେ ପ୍ରସ୍ତୁତ।
