ବାଲେଶ୍ୱର,୦୭/୦୨: ଆରମ୍ଭ ହୋଇଛି ପ୍ରେମ ସପ୍ତାହ । ଏହି ପ୍ରେମ ସପ୍ତାହରେ ଦେଖିବାକୁ ମିଳିଛି ଶାଶ୍ୱତ ପ୍ରେମର ଉଦାହରଣ । ପ୍ରେମିକାଙ୍କୁ ପାଇବା ପାଇଁ ପ୍ରେମିକ ସାତ ଦରିଆ ଡେଇଁ ବିବାହ କରିବାକୁ ଆସିଲେ ବାଲେଶ୍ୱର । ଏଭଳି ଏକ ଶାଶ୍ୱତ ପ୍ରେମ ଦେଖିବାକୁ ମିଳିଛି ବାଲେଶ୍ୱର ସହର ଉପକଣ୍ଠ ଶୋଭାରାମପୁର ଅଞ୍ଚଳରେ । ହିନ୍ଦୁ ରୀତିନୀତିରେ ବାଲେଶ୍ୱର ଝିଅକୁ ବିବାହ କରିଛନ୍ତି ଲଣ୍ଡନ ପୁଅ ।
ଶୋଭାରାମପୁର ନିବାସୀ କମଳାକାନ୍ତ ଦାସ ଓ ମୀନାକ୍ଷୀ ଦାସଙ୍କ ଝିଅ ନତାଶା । ଏମବିଏ ଶିକ୍ଷା ପାଇଁ ୨୦୧୮ ମସିହାରେ ଇଂଲଣ୍ଡ ଯାଇଥିଲେ । ଏମ୍ବିଏ ଶେଷ କରି ୨୦୨୦ ମସିହାରେ ଲଣ୍ଡନରେ ଗୋଟିଏ ହୋଟେଲରେ ମ୍ୟାନେଜର ଭାବରେ କାମ କରୁଥିଲେ । ସେଠାରେ ୱେଷ୍ଟ ଲଣ୍ଡନ ବାସିନ୍ଦା ଲୁକ୍ ଆନ୍ଥୋନି ଡେ’ଙ୍କ ସହିତ ତାଙ୍କର ଦେଖା ହୋଇଥିଲା । ଲୁକ୍ ଆନ୍ଥୋନି ଟେଲିକମ କମ୍ପାନିରେ କାର୍ଯ୍ୟରତ । ତାଙ୍କର ପୂର୍ବଜ ଗୋଆରେ ରହୁଥିଲେ । ତାଙ୍କ ଜେଜେ ଇଂଲଣ୍ଡ ମହିଳାଙ୍କୁ ବିବାହ କରି ଇଂଲଣ୍ଡର ନାଗରିକତ୍ୱ ଗ୍ରହଣ କରିଛନ୍ତି। ଆନ୍ଥୋନି ଲଣ୍ଡନରେ ଜନ୍ମ ହୋଇଥିଲେ ବି ତାଙ୍କର ଭାରତୀୟଙ୍କ ପ୍ରତି ଦୁର୍ବଳତା ଥିଲା । ତେଣୁ ଭାତତୀୟ ଝିଅ ନତାଶାଙ୍କ ସହ ପ୍ରେମ ସମ୍ପର୍କ ଗଢ଼ିଉଠିଥିଲା । ଦୁହେଁ ବିବାହ କରିବା ପାଇଁ ସ୍ଥିର କଲେ । ଏ ସମ୍ପର୍କରେ ନତାଶା ଘରେ ଜଣାଇଥିଲେ । କିନ୍ତୁ ପିତା କମଳାକାନ୍ତ ପ୍ରଥମେ ରାଜି ହୋଇନଥିଲେ । ପରବର୍ତ୍ତୀ ସମୟରେ ହିନ୍ଦୁ ରୀତିନୀତିରେ ନିଜ ଜନ୍ମମାଟିରେ ବାହାଘର କରିବାକୁ ସର୍ତ୍ତ ରଖିଥିଲେ । ଆନ୍ଥୋନି ମଧ୍ୟ ତାଙ୍କ ପରିବାରକୁ ଜଣାଇଥିଲେ । ସମସ୍ତେ ଭାରତ ଆସିବାର ଯୋଜନା ଥିଲା । କିନ୍ତୁ ଭିସା ନମିଳିବାରୁ କେବଳ ଆନ୍ଥୋନି ଆସିଛନ୍ତି ।
ସୋମବାର କୋର୍ଟରେ ନତାଶା ଓ ଆନ୍ଥୋନିଙ୍କର ବିବାହ ହୋଇଥିଲେ । ବୁଧବାର ହିନ୍ଦୁ ରୀତିନୀତିରେ ଉଭୟ ବିବାହ ବନ୍ଧନରେ ବାନ୍ଧି ହୋଇଛନ୍ତି । ବାଣ ରୋଷଣି ଓ ଡିଜେ ବଜାଇ ବର ବେଶରେ ନତାଶଙ୍କ ଘରେ ପହଞ୍ଚିଥିଲେ ବିଦେଶୀ ବର । ଦଶ ଦିଗପାଳକୁ ସାକ୍ଷୀ ରଖି ହାତଗଣ୍ଠି ପଡ଼ିଛି । ଉଭୟ ଏଥିରେ ଖୁସି ଅଛନ୍ତି । ପୁଅଝିଅଙ୍କ ଖୁସିରେ ଆମେ ଖୁସି ବୋଲି ନତାଶାଙ୍କ ପିତାମାତା ପ୍ରକାଶ କରିଛନ୍ତି ।
