କଟକ,୨୫/୧୧: ଏଥର ବାଲିଯାତ୍ରାରେ ଲୋକଙ୍କୁ ଆକର୍ଷିତ କରିବ ବାଲୁକା କଳା । ୩୫ ଫୁଟ ଉଚ୍ଚ ଏବଂ ୧୦୦ ଫୁଟ ଲମ୍ବରେ ନିର୍ମିତ ହେବ ବାଲିଡଙ୍ଗା ଓ ଲାଇଟ୍ର ଝଲକ ଲୋକଙ୍କୁ ମନୋରଂଜନ ଖୋରାକ ଯୋଗାଇବ । ୬୦ ହଜାରରୁ ଏଲ୍ଇଡି ଲାଇଟ୍, ସ୍ପଟ୍ ଲାଇଟ୍ ଏବଂ ପାଲକୋ ଲାଇଟ୍ର ଚିକିମିକି ଆଲୁଅରେ ପୂରା ପରିସର ଝଲସିବ । କଟକ ଇନ୍ କଟକରେ ନିର୍ମିତ ହେଉଥିବା ଏହି ବାଲୁକା କଳାକୁ କରିବା ପାଇଁ ବାଲୁକାଶିଳ୍ପୀ ସୁଦାମ ପ୍ରଧାନ ତାଙ୍କ ଶିଳ୍ପୀମାନଙ୍କୁ ନେଇ ଲାଗିପଡ଼ିଛନ୍ତି ।
ବାଲିଯାତ୍ରାକୁ ଆଉ ୨ ଦିନ । ଏଥିପାଇଁ ପୂରା ପରିସରକୁ ସଜେଇବାକୁ ଲାଗିପଡ଼ିଛନ୍ତି ପ୍ରଶାସନ । କଟକ ଇନ୍ କଟକରେ ଯେତେ ଅଧିକ ସୌନ୍ଦର୍ଯ୍ୟକରଣ ହୋଇପାରିବ, ସେତେ ଅଧିକ ଚେଷ୍ଟା କରୁଛନ୍ତି । ଗାଁ ପରିବେଶ, ମତ୍ସ୍ୟ କନ୍ୟା ପରେ ଏବେ ବାଲୁକା କଳାକୁ ସ୍ଥାନ ଦେଇଛି ପ୍ରଶାସନ । ୧୦୦ ଫୁଟର ଲମ୍ବା ଏବଂ ୩୫ ଫୁଟ ଉଚ୍ଚାର ବାଲି ଡଙ୍ଗା ବା ବୋଇତ ତିଆରି କରୁଛନ୍ତି । ବାଲୁକାଶିଳ୍ପୀ ସୁଦାମ ପ୍ରଧାନଙ୍କ ସହିତ ୧୦ ଜଣ ଶିଳ୍ପୀ ଲାଗିପଡ଼ିଛନ୍ତି । ୧୫ ଟ୍ରିପ୍ ହାଇୱା ବାଲିରେ ନିର୍ମିତ ହେଉଥିବା ଏହି ବାଲୁକା କଳାରେ ଖଞ୍ଜାଯିବ ଏଲ୍ଇଡି ଲାଇଟ୍, ସ୍ପଟ୍ ଲାଇଟ୍ ଏବଂ ପାଲକୋ ଲାଇଟ୍ । ବାଲୁକା କଳାରେ ୧୦ ଜଣ କରିଗରଙ୍କ ସମେତ କିଛି ମହିଳା ମଧ୍ୟ ରଙ୍ଗ ତିଆରି କାର୍ଯ୍ୟରେ ଲାଗିପଡ଼ିଛନ୍ତି ।
୨୦୧୮ ମସିହାରେ ବାଲୁକାଶିଳ୍ପୀ ଶ୍ରୀ ପ୍ରଧାନ ବାଲିଯାତ୍ରାରେ ବୋଇତ ଏବଂ ହକି ବିଶ୍ୱକପ୍ର ଏକ ଯୁଗଳବନ୍ଦୀ କରିଥିବା ୨୫ ଫୁଟର ବାଲୁକାକଳା ଲୋକଙ୍କୁ ବେଶ୍ ପସନ୍ଦ ଆସିଥିଲା । ଚଳିତ ବର୍ଷ ଶ୍ରୀ ପ୍ରଧାନଙ୍କୁ ପ୍ରଶାସନ ଭିନ୍ନ ଧରଣ କରିବା ପାଇଁ କହିଥିବା ବେଳେ ଲାଇଟ୍ ଏବଂ ବାଲି ଡଙ୍ଗା ଲୋକଙ୍କୁ ଆକର୍ଷିତ କରିବ । ଶ୍ରୀ ପ୍ରଧାନଙ୍କ ନେତୃତ୍ୱରେ ୨୩ ତାରିଖରୁ କାର୍ଯ୍ୟ ଆରମ୍ଭ ହୋଇଥିବା ବେଳେ ୨୬ ତାରିଖରେ ଶେଷ ହେବ ବୋଲି ସେ କହିଛନ୍ତି ।
