ମୁମ୍ବାଇ ୨୯/୦୮: କିଙ୍ଗ୍ ଖାନଙ୍କ ଅପ୍କମିଙ୍ଗ ଫିଲ୍ମ ‘ଯୱାନ’ ଏବେ ଆଡ୍ଭାନ୍ସ ବୁକିଂକୁ ନେଇ ଖବରରେ । ମୁମ୍ବାଇର କିଛି ଅଞ୍ଚଳରେ ଫିଲ୍ମର ଆଡ୍ଭାନ୍ସ ବୁକିଂ ଆରମ୍ଭ ହୋଇଛି । ରିପୋର୍ଟ ଅନୁସାରେ, ମୁମ୍ବାଇ-ଥାନେରେ ଫିଲ୍ମର ଆଡ୍ଭାନ୍ସ ବୁକିଂ ଆରମ୍ଭ ହେବାର ୧୫ ମିନିଟ୍ ଭିତରେ ଶୋ’ ହାଉସ୍ଫୁଲ୍ ହୋଇଗଲା। ଏବେ ଫିଲ୍ମର ଟିକେଟ୍ ପାଖାପାଖି ୧୧ଶହ ଟଙ୍କାରେ ବିକ୍ରି ହେଉଛି । ଆମେରିକାରେ କେବଳ ଟେକ୍ସାସ ଓ କାଲିଫର୍ଣ୍ଣିଆରେ ଆଡ୍ଭାନ୍ସ ବୁକିଂରୁ ‘ଯୱାନ’ ଏପର୍ଯ୍ୟନ୍ତ ୧.୬୫ କୋଟି ଟଙ୍କା ଆୟ କରିଛି।
ସିନେ ସମୀକ୍ଷକଙ୍କ ଅନୁସାରେ, ଫିଲ୍ମ ରିଲିଜ୍ର ୧୧ ଦିନ ପୂର୍ବରୁ ଆମେରିକାର ୪୫୦ ସ୍ଥାନରେ ଫିଲ୍ମର ୧୩,୭୫୦ ଟିକେଟ୍ ଅଗ୍ରୀମ ବିକ୍ରି ହୋଇସାରିଛି । ଫିଲ୍ମ ରିଲିଜ୍ର ୨୦ ଦିନ ପୂର୍ବରୁ ଆମେରିକାରେ ଆଡ୍ଭାନ୍ସ ବୁକିଂ ଆରମ୍ଭ ହୋଇଥିଲା । ଆମେରିକା ଓ କାନାଡ଼ାକୁ ମିଶାଇ ଅଗ୍ରୀମ ବୁକିଂରୁ ଫିଲ୍ମ ୧.୮୫ କୋଟି କଲେକ୍ସନ୍ କରିଛି । ବ୍ରିଟେନରେ ଅଗ୍ରୀମ ବୁକିଂରୁ ୭୭ ଲକ୍ଷ ଟଙ୍କା କଲେକ୍ସନ୍ କରିଛି । ବ୍ରିଟେନରେ ସର୍ବାଧିକ ଆୟ କରିଥିବା ଭାରତୀୟ ଫିଲ୍ମ ତାଲିକାର ଶୀର୍ଷରେ ଅଛି ‘ପଠାନ୍’ । ଏହା ପ୍ରାୟ ୪୫ କୋଟି କଲେକ୍ସନ୍ କରିଥିଲା । ଓପ୍ନିଂ ଡେ’ରେ ୩ କୋଟି ଆୟ କରିଥିଲା । ଉତ୍ତର ଆମେରିକାରେ ‘ପଠାନ୍’ ରିଲିଜ୍ ହେବା ଦିନ ୧୫ କୋଟି ଆୟ କରିଥିଲା । ‘ଯୱାନ’ ସହଜରେ ‘ପଠାନ୍’ର ଓପ୍ନିଂ-ଡେ’ ରେକର୍ଡ ଭାଙ୍ଗିବ ବୋଲି ସିନେ ବିଶେଷଜ୍ଞମାନେ ଆଶା କରୁଛନ୍ତି ।
ଆଟଲିଙ୍କ ନିର୍ଦ୍ଦେଶିତ ଏହି ଫିଲ୍ମ ଆସନ୍ତା ମାସ ୭ ତାରିଖରେ ମୁକ୍ତିଲାଭ କରିବ । ଏଥିରେ ଶାହରୁଖଙ୍କ ସହ ବିଜୟ ସେତୁପତି ଓ ନୟନତାରା ନଜର ଆସିବେ । ହିନ୍ଦୀ, ତାମିଲ ଓ ତେଲୁଗୁରେ ଏହା ସାରାବିଶ୍ୱରେ ମୁକ୍ତିଲାଭ କରିବ । ଫିଲ୍ମରେ ସାନ୍ୟା ମଲହୋତ୍ରା ଓ ପ୍ରିୟାମଣି ନଜର ଆସିବେ । ଦୀପିକା ପାଦୁକୋନଙ୍କ ଝଲକ୍ ବି ଦେଖିବାକୁ ମିଳିବ ।
