ରାଉରକେଲା,୧୩/୦୯: ମହାରାଜା ହୋଟେଲର ରୁମ୍ ନମ୍ୱର ୪୦୨ରୁ ମିଳିଲା ଯୁବତୀଙ୍କ ମୃତଦେହ । ସେ ତାଙ୍କ ପୁରୁଷ ବନ୍ଧୁ ନିତ୍ୟାନନ୍ଦ ସାଏ ସହ ହୋଟେଲକୁ ଆସିଥିଲେ । ଉକ୍ତ ରୁମ୍ରେ ଯୁବତୀ ଜଣକ ପୋଡ଼ି ହୋଇ ପ୍ରାଣ ହରାଇଥିବା ବେଳେ ସେ ସ୍ୱାଗତିକା ନାୟକ (୧୯) ବୋଲି ଜଣାପଡ଼ିଛି । ରାଉରକେଲା ଷ୍ଟେସନ ରୋଡ୍ ନିକଟରେ ଥିବା ମହାରାଜା ହୋଟେଲର ୪୦୨ ନମ୍ୱର ରୁମ୍ରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ସ୍ୱାଗତିକା ତାଙ୍କ ପୁରୁଷ ବନ୍ଧୁ ନିତ୍ୟାନନ୍ଦଙ୍କ ସହ ରାଉରକେଲା ଷ୍ଟେସନ ରୋଡ୍ ନିକଟରେ ଥିବା ମହାରାଜା ହୋଟେଲକୁ ଆସିଥିଲେ । ସେଠାରେ ସେ ୪୦୨ ନମ୍ୱର ରୁମ୍ରେ ରହିଥିଲେ । ପରେ ଉକ୍ତ ରୁମ୍ ଭିତରୁ ଧୁଆଁ ବାହାରିବାରୁ ହୋଟେଲ କର୍ମଚାରୀ ରୁମ୍ର କବାଟ ଭାଙ୍ଗି ଭିତରକୁ ପଶିଥିଲେ । ସେତେବେଳକୁ ଯୁବତୀଙ୍କ ଦେହରେ ନିଆଁ ଲାଗିସାରିଥିଲା । ତୁରନ୍ତ ସେଠାରୁ ତାଙ୍କୁ ଉଦ୍ଧାର କରି ପ୍ରଥମେ ରାଉରକେଲା ସରକାରୀ ଡ଼ାକ୍ତରଖାନା ନିଆଯାଇଥିଲା । ପରେ ଯୁବତୀଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ଆଇଜିଏଚ ଡାକ୍ତରଖାନା ନିଆଯାଇଥିଲା । ସେଠାରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ଯୁବତୀଙ୍କୁ ଉଦ୍ଧାର କରିବା ବେଳେ ଉକ୍ତ ରୁମ୍ରୁ କିରୋସିନ ଗନ୍ଧ ଆସୁଥିଲା । ହୋଟେଲର କର୍ମଚାରୀ ଏହି ଘଟଣା ସମ୍ୱନ୍ଧରେ ପୋଲିସକୁ ଖବର ଦେଇଥିଲେ । ଖବର ପାଇ ପ୍ଲାଣ୍ଟ ସାଇଟ୍ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ।
ଅନ୍ୟ ପଟେ ଯୁବତୀଙ୍କ ପରିବାର ଲୋକେ ହତ୍ୟା ଅଭିଯୋଗ ଆଣିଛନ୍ତି । ତାଙ୍କ ପୁରୁଷ ବନ୍ଧୁଙ୍କୁ ପ୍ଲାଣ୍ଟ ସାଇଟ୍ ପୋଲିସ ଅଟକ ରଖି ଘଟଣାର ତଦନ୍ତ ଆରମ୍ଭ କରିଛି । ଶୁକ୍ରବାର ଘଟଣାସ୍ଥଳରେ ପ୍ଲାଣ୍ଟ ସାଇଟ୍ ପୋଲିସ , ଡ଼ିଏସପି ଏବଂ ଏକ ସାଇଣ୍ଟିଫିକ୍ ଟିମ ପହଞ୍ଚି ତନାଘନା ଆରମ୍ଭ କରିଛନ୍ତି । ଘଟଣାର ପ୍ରାଥମିକ ତଦନ୍ତ ଅନୁସାରେ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଛି । ତେବେ ହୋଟେଲ ରୁମ ଭିତରକୁ କିରୋସିନ ଗଲା କେମିତି ସେନେଇ ଉଠୁଛି ପ୍ରଶ୍ନ । ହୋଟେଲ ମାଲିକ କହିବା ଅନୁସାରେ, ପୁର୍ବରୁ ଅନେକ ଥର ଏହି ଦୁଇ ଜଣ ଆସି ହୋଟେଲରେ ରୁହନ୍ତି ।
