ସୁନ୍ଦରଗଡ଼,୧୩/୦୯: ସୁଭଦ୍ରା ଫର୍ମ ପୂରଣ କରିବା ପାଇଁ ଲାଞ୍ଚ ନେଉଥିଲେ ଜନସେବା କେନ୍ଦ୍ରର ପରିଚାଳକ । ଅଭିଯୋଗ ପରେ ଜନସେବା କେନ୍ଦ୍ରର ଭିଏଲଇଙ୍କ ବିରୁଦ୍ଧରେ ଥାନାରେ ମାମଲା ରୁଜୁ । ସୁନ୍ଦରଗଡ଼ ଜିଲ୍ଲା ହେମଗିର ବ୍ଲକ ଅଙ୍କେଲବିରା ଜନସେବା କେନ୍ଦ୍ରରେ ଏଭଳି ଦୃଶ୍ୟ ଦେଖିବାକୁ ମିଳିଛି ।

ସୂଚନା ମୁତାବକ, ସୁଭଦ୍ରା ଫର୍ମ ପୂରଣ ପାଇଁ ସମସ୍ତ ଜନସେବା କେନ୍ଦ୍ରରେ ଲାଗି ରହିଛି ଭିଡ଼ । ଏହାର ଲାଭ ଉଠାଇବାକୁ ଯାଇ ଅଙ୍କେଲବିରା ଜନସେବା କେନ୍ଦ୍ରର ପରିଚାଳକ ଜଗହୋମ ପ୍ରଧାନ ନେଉଥିଲେ ଟଙ୍କା । ଫର୍ମ ପୂରଣ ପାଇଁ ହିତାଧିକାରୀଙ୍କ ଠାରୁ ୧୦୦ଟଙ୍କା ଲେଖାଏଁ ଲାଞ୍ଚ ନେଉଥିଲେ । ଏନେଇ କିଛି ହିତାଧିକାରୀ ହେମଗିର ଥାନାରେ ଜନସେବା କେନ୍ଦ୍ରର ଭିଏଲଇଙ୍କ ବିରୁଦ୍ଧରେ ଏକ ଅଭିଯୋଗ କରିଥିଲେ । ଅଭିଯୋଗ ଆଧାରରେ ଉକ୍ତ ଜନସେବା କେନ୍ଦ୍ରରେ ପହଞ୍ଚି ଜଗହୋମ ପ୍ରଧାନକୁ ପୋଲିସ ଗିରଫ କରିଛି । ଏଥି ସହିତ ସେଠାରେ ବ୍ୟବହାର କରାଯାଉଥିବା ସମସ୍ତ ମେସିନ ମଧ୍ୟ ଜବତ ଜବତ କରିଛି ପୋଲିସ । ଅନ୍ୟପଟେ ଏ ବିଷୟରେ ଖବର ପାଇ ହେମଗିର ବିଡିଓ ଉକ୍ତ ଜନସେବା କେନ୍ଦ୍ରରେ ପହଞ୍ଚି ଘଟଣାର ଅନୁଧ୍ୟାନ କରିଛନ୍ତି ।