କରଞ୍ଜିଆ,୨୨/୦୧: ମହିଳାଙ୍କୁ ମାରି ମାଟିତଳେ ପୋତିଦେଲା ଯୁବକ । ୫ ଦିନ ପରେ ମୃତଦେହ ଉଦ୍ଧାର କଲା ପୋଲିସ । ମୃତ ମହିଳା ଜଣକ ହେଉଛନ୍ତି ଚମ୍ପୁଆ ନିକଟ ରାରୁଆଁଗଡା ଗାଁର ପାଟ କାରୁଆ ଏବଂ ହତ୍ୟାକାରୀ ସନାରାମ ହେସା ପିଙ୍ଗୁଆ ବୋଲି ଜଣାପଡ଼ିଛି । ମୟୂରଭଞ୍ଜ ଜିଲ୍ଲା ରରୁଆଁ ଥାନା ବୈଦ୍ୟନାଥ ଗ୍ରାମ ପଞ୍ଚାୟତ ମହୁଲଡିହା ଗାଁରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ପାଟ କାରୁଆ ଦୀର୍ଘ ବର୍ଷ ହେବ ସନାରାମ ହେସା ପିଙ୍ଗୁଆ ସହ ମହୁଲଡିହା ଗାଆଁରେ ଏକାଠି ରହି ଆସୁଥିଲେ । ତେବେ ଜାନୁଆରୀ ୧୪ ରୁ ୧୬ ତାରିଖ ମଧ୍ୟରେ ଯୁବକ ଜଣକ ମହିଳାଙ୍କୁ ହତ୍ୟା କରିଥିଲା ଏବଂ ତାଙ୍କ ମୃତଦେହକୁ ପୋତି ଦେଇ ଫେରାର ହୋଇଯାଇଥିବା ନେଇ ସୂଚନା ଦେଇଛି ପୋଲିସ । ଏନେଇ କୌଣସି ସୂତ୍ରରୁ ଖବର ପାଇ ରରୁଆଁ ପୋଲିସ୍ ମୃତଦେହକୁ ମାଟିତଳୁ ଉଦ୍ଧାର୍ କରି ବ୍ୟବଚ୍ଛେଦ ପାଇଁ ପଠାଇଛି। ରରୁଆଁ ଥାନାରେ ଏକ ହତ୍ୟା ମାମଲା ରୁଜୁ କରି ଘଟଣାର ଅଧିକ ତଦନ୍ତ ଜାରି ରଖିଛି । ଅଭିଯୁକ୍ତକୁ ଧରିବା ପାଇଁ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି ପୋଲିସ ।
