ଭୁବନେଶ୍ଵର, ୨୨/୦୧ : କୋରାପୁଟର ଆଦିବାସୀ ଝିଅ ଫୁଲ । ଗାଁ, ବଣ ପାହାଡ଼, ସରଳ ଆଦିବାସୀ ମଣିଷ ଫୁଲର ଅତି ପ୍ରିୟ । କିନ୍ତୁ ଫୁଲ ଦେଖୁଛି, ଧୀରେଧୀରେ ଗାଁ ଲୋକଗୁଡ଼ାକ ବଦଳି ଯାଉଛନ୍ତି । କିଛି ସହରୀ ଲୋକଙ୍କ କଥାରେ ପଡ଼ି ନିଜ ଧର୍ମ ଛାଡ଼ି ଅନ୍ୟ ଧର୍ମକୁ ଆପଣାଉଛନ୍ତି । ଏହି ସରଳ ମଫସଲି ଲୋକଙ୍କୁ ସହରୀ ଲୋକମାନେ ଚିକ୍କଣିଆ କଥା କହି ଫସାଉଛନ୍ତି । ନିଜ ବ୍ୟବସାୟ ବଢ଼ାଉଛନ୍ତି । କେବଳ ଧର୍ମ ପରିବର୍ତ୍ତନ ନୁହେଁ, ଆହୁରି ଅନେକ ଅସୁବିଧା ସୃଷ୍ଟି କରୁଛନ୍ତି ସେମାନେ। ଗାଁର ଏଭଳି ଦୁର୍ଦ୍ଦଶା ଦେଖି ସହିପାରୁନି ଫୁଲ । ଭାଇ କେମ୍ବ୍ରୁ ସହିତ ମିଶି ସେ ଲାଗିପଡ଼ୁଛି ଗାଁକୁ ସଜାଡ଼ିବାରେ । ଫୁଲ ଓ କେମ୍ବ୍ରୁ ସହିତ ଏ ଲଢ଼େଇରେ ସାମିଲ ହେଉଛନ୍ତି ଆଉ ଜଣେ ସହରୀବାବୁ । ତିନିହେଁ ମିଶି ବୁଝାଉଛନ୍ତି, ପରିବର୍ତ୍ତନ ଆଣିବାକୁ ଚେଷ୍ଟା କରୁଛନ୍ତି ଲୋକଙ୍କ ଭାବନାରେ ।
ଏହି ଖବରଟିକୁ ପଢନ୍ତୁ-୨୦୨୫ରେ ଦମ୍ ଦେଖାଇବ ‘ଦେବା’, ଜାଣନ୍ତୁ ସାହିଦଙ୍କ ପୂର୍ବ ବକ୍ସ ଅଫିସ୍ ରେକର୍ଡ
ଏହା ହେଉଛି ଫେବ୍ରୁଆରୀ ୭ରେ ମୁକ୍ତିଲାଭ କରୁଥିବା ବାସ୍ତବଧର୍ମୀ ଚଳଚ୍ଚିତ୍ର ‘ସନାତନୀ : କର୍ମ ହିଁ ଧର୍ମ’ର କାହାଣୀ । ଏଥିରେ ଫୁଲ ଚରିତ୍ରରେ ଅଭିନୟ କରୁଛନ୍ତି ଅର୍ଲିନ୍ ଅଙ୍କିତା । ଯେଉଁ ସହରୀବାବୁ ଫୁଲକୁ ସବୁ କାମରେ ସହାୟତା କରୁଛନ୍ତି, ସେ ଚରିତ୍ରରେ ଆସୁଛନ୍ତି ସମ୍ବିତ । ଅର୍ଲିନ୍ କହନ୍ତି, ଫୁଲ ଚରିତ୍ରକୁ ଶତ ପ୍ରତିଶତ ନ୍ୟାୟ ଦେବା ପାଇଁ ସେ ଖୁବ୍ ପରିଶ୍ରମ କରିଛନ୍ତି । ଫୁଲ ଚରିତ୍ରରେ ତାଙ୍କ ଅଭିନୟ ସାରା ଓଡ଼ିଶାରେ ବାସିବ, ଆଶା ଲୋକଙ୍କୁ ଭଲ ଲାଗିବ । ବିଜୟ କାଣ୍ଡୋଇଙ୍କ ପ୍ରଯୋଜନାରେ ସିନେମା ନିର୍ମାଣ ହୋଇଛି । କାହାଣୀ, ଚିତ୍ରନାଟ୍ୟ ଓ ନିର୍ଦ୍ଦେଶନା ଦାୟିତ୍ୱ ନେଇଛନ୍ତି ବାସୁଦେବ ବରାଡ଼ । ସଂଳାପ ମାନସ ରଞ୍ଜନ ସାମଲ ଏବଂ ଦୀପ୍ତି ପଟ୍ଟନାୟକ ଲେଖିଛନ୍ତି । ଗୀତ ରଚନା କରିଛନ୍ତି ଡା. ନିର୍ମଳ ନାୟକ ।
