ମୁମ୍ବାଇ ୨୧/୦୧: ବଲିଉଡ ଅଭିନେତା ସୈଫ ଅଲି ଖାନଙ୍କୁ ଛୁରାମାଡ଼ ପରେ ହସ୍ପିଟାଲରେ ଭର୍ତ୍ତି କରାଯାଇଛି। କରୀନା କପୁର ଏବଂ ତାଙ୍କ ପିଲାମାନେ ପ୍ରତିଦିନ ତାଙ୍କୁ ଭେଟିବାକୁ ହସ୍ପିଟାଲ ଯାଉଛନ୍ତି। ସୈଫଙ୍କୁ ଭେଟିବାକୁ ଯାଉଥିବା ସମୟରେ ତାଙ୍କ ପରିବାର ସଦସ୍ୟଙ୍କ ଭିଡିଓ ମଧ୍ୟ ସୋସିଆଲ୍ ମିଡିଆରେ ଭାଇରାଲ୍ ହେଉଛି। ଏହି ସମୟରେ ତୈମୁର ଏବଂ ଜେହ ସହ ଜଡିତ ଏକ ଭିଡିଓ ସାମ୍ନାକୁ ଆସିଛି, ଯାହାକୁ ନେଇ ଭଡକିଛନ୍ତି କରୀନା କପୁର।
ସାମ୍ନାକୁ ଆସିଥିବା ଭିଡିଓରେ ଦୁଇ ଜଣ ଲୋକ ତୈମୁର ଏବଂ ଜେହଙ୍କର ନୂଆ ଖେଳନାକୁ ଘରକୁ ନେଉଥିବାର ନଜର ଆସିଥିଲେ। ଏହି ଭିଡିଓ ଦେଖିବା ପରେ କରୀନା ଖୁବ୍ ରାଗି ଯାଇଥିଲେ। ଏହା ପରେ ସେ ଇନଷ୍ଟାଗ୍ରାମରେ ଏକ ପୋଷ୍ଟ କରି ତାଙ୍କୁ ଏକୁଟିଆ ଛାଡିବାକୁ ଅନୁରୋଧ କରିଥିଲେ। ତେବେ ପରେ ଅଭିନେତ୍ରୀ ଏହି ପୋଷ୍ଟକୁ ଡିଲିଟ କରିଥିଲେ।
କରୀନା ତାଙ୍କ ଇନଷ୍ଟାଗ୍ରାମ ଷ୍ଟୋରୀରେ ପାପାରାଜିଙ୍କ ଭିଡିଓ ସେୟାର କରି ଲେଖିଥିଲେ- 'ବହୁତ ହୋଇଗଲା, ଟିକିଏ ଦୟା କର। ହେ ଭଗବାନ ଆମକୁ ଛାଡିଦିଅ ।‘ ତେବେ କରୀନାଙ୍କ ଏହି ପୋଷ୍ଟ ପରେ ପାପାରାଜି ଭିଡିଓ ଡିଲିଟ୍ କରିଦେଇଛନ୍ତି। କରୀନା ମଧ୍ୟ ତାଙ୍କର ଏହି ପୋଷ୍ଟକୁ ହଟାଇ ଦେଇଛନ୍ତି।
ସୂଚନା ଅନୁଯାୟୀ, ଜାନୁଆରୀ ୧୫ରେ ଜଣେ ବ୍ୟକ୍ତି ସୈଫ ଅଲି ଖାନଙ୍କ ଘରେ ପ୍ରବେଶ କରି ତାଙ୍କୁ ଛୁରୀରେ ଆକ୍ରମଣ କରିଥିଲା। ଅଭିନେତା ଗୁରୁତର ଆହତ ହୋଇଥିଲେ ଏବଂ ତାଙ୍କ ପୁଅ ତାଙ୍କୁ ଅଟୋରେ ହସ୍ପିଟାଲ୍ ନେଇଥିଲେ। ବର୍ତ୍ତମାନ ସୈଫ ବିପଦ ମୁକ୍ତ ଅଛନ୍ତି ଏବଂ ଶୀଘ୍ର ସେ ଡାକ୍ତରଖାନାରୁ ଡିସଚାର୍ଜ ହୋଇପାରନ୍ତି। ଅନ୍ୟପକ୍ଷେ ଅଭିଯୁକ୍ତକୁ ପୋଲିସ ଗିରଫ କରିଛି। ବର୍ତ୍ତମାନ ସେ ୧୪ ଦିନିଆ ପୋଲିସ ରିମାଣ୍ଡରେ ଜେଲରେ ଅଛି।
