ମୁମ୍ବାଇ,୨୦/୦୧: ସୈଫ୍ ଅଲ୍ଲୀ ଖାନଙ୍କୁ ଆକ୍ରମଣ କରିଥିବା ଅଭିଯୁକ୍ତ ମହମ୍ମଦ ଶରିଫୁଲ ଇସଲାମ ଶହଜାଦ ସମ୍ପର୍କରେ ପ୍ରତିଦିନ ଅନେକ ଖୁଲାସା ହେଉଛି। ଏବେ ଯେଉଁ ସୂଚନା ଆସିଛି ତାହା ବହୁତ ଆଶ୍ଚର୍ଯ୍ୟଜନକ। ସୂତ୍ର ଅନୁଯାୟୀ, ଆକ୍ରମଣକାରୀ ଶରିଫୁଲ ସୈଫଙ୍କ ପୁଅ ଜାହାଙ୍ଗୀରଙ୍କୁ ବନ୍ଧକ କରି ଟଙ୍କା ଦାବି କରିବାକୁ ଯୋଜନା କରୁଥିଲା। ଅଭିଯୁକ୍ତର ଉଦ୍ଦେଶ୍ୟ ଥିଲା ୧ କୋଟି ଟଙ୍କା ନେଇ ସବୁଦିନ ପାଇଁ ବାଂଲାଦେଶ ଫେରିଯିବା। ସୂତ୍ର ଅନୁଯାୟୀ, ଅଭିଯୁକ୍ତକୁ ବାଂଲାଦେଶ ଫେରିବା ପାଇଁ ଏକ ନକଲି ପାସପୋର୍ଟ ଆବଶ୍ୟକ ଥିଲା ଏବଂ ସେ ଏଥିପାଇଁ ଟଙ୍କା ବ୍ୟବସ୍ଥା କରିବାକୁ ଚେଷ୍ଟା କରୁଥିଲା। ପଚରାଉଚରା ସମୟରେ ଅଭିଯୁକ୍ତ ସହ ଜଡିତ ଆହୁରି ଅନେକ ସୂଚନା ସାମ୍ନାକୁ ଆସିଛି।
ସୈଫଙ୍କ ସହାୟିକା ଲିନାଙ୍କୁ ମାଗିଥିଲା ୧ କୋଟି:
ଆକ୍ରମଣକାରୀ ସୈଫଙ୍କ ଚାକରାଣୀ ଲିମା ଫିଲିପ୍ସଙ୍କଠାରୁ ୧ କୋଟି ଟଙ୍କା ଦାବି କରିଥିଲା କିନ୍ତୁ ଲିମା ମନା କରିବାରୁ ଅଭିଯୁକ୍ତ ଏବଂ ଲିମା ମଧ୍ୟରେ ଝଗଡ଼ା ଆରମ୍ଭ ହୋଇଥିଲା ଏବଂ ଏପରି କରୁଥିବା ସମୟରେ ଘରର ସମସ୍ତେ ଉଠି ପଡ଼ିଲେ ଯାହା ଫଳରେ ଅଭିଯୁକ୍ତ ଡରିଯାଇ ଖସିଯିବାକୁ ଚେଷ୍ଟା କରିବାରେ ବିଫଳ ହେବାରୁ ଆଖିବୁଜା ଆକ୍ରମଣ କରିଥିଲା। ଅଭିଯୁକ୍ତ ପ୍ରଥମେ ଲିମାଙ୍କୁ ଆକ୍ରମଣ କରିଥିଲା ଏବଂ ଯେତେବେଳେ ସୈଫ୍ ଅଲ୍ଲୀ ଖାନ ମଝିରେ ଆସିଲେ, ଅଭିଯୁକ୍ତ ପ୍ରଥମେ ତାଙ୍କ ବେକକୁ ଏବଂ ପରେ ତାଙ୍କ ପିଠିରେ ଆକ୍ରମଣ କରିଥିଲା।
ସୈଫ୍ଙ୍କୁ ଆକ୍ରମଣ କରିଥିବା ଅଭିଯୁକ୍ତ ସହ ଜଡ଼ିତ ଆଉ ଏକ ସୂଚନା ସାମ୍ନାକୁ ଆସିଛି। ସୈଫଙ୍କ ଆକ୍ରମଣକାରୀ ଶରିଫୁଲ ବାଂଲାଦେଶର ଜଣେ କୁସ୍ତିଯୋଦ୍ଧା। ସେ ପିଲାଦିନରୁ ତାର ପଡ଼ୋଶୀରେ କୁସ୍ତି କରୁଥିଲା। ସେ ସ୍ଥାନୀୟ ସ୍ତରରେ କିଛି କୁସ୍ତି ପ୍ରତିଯୋଗିତାରେ ମଧ୍ୟ ଅଂଶଗ୍ରହଣ କରିଥିଲା। ସେଥିପାଇଁ ଅଭିଯୁକ୍ତର ଶରୀର ସମ୍ପୂର୍ଣ୍ଣ ଫିଟ୍ ଥିଲା। ଶରିଫୁଲ ବାଂଲାଦେଶର ଜଣେ ବାସିନ୍ଦା। ଗତକାଲି ମୁମ୍ବାଇ ପୋଲିସ ତାଙ୍କୁ ଥାନେରୁ ଗିରଫ କରିଥିଲା।
ମୁମ୍ବାଇ ପୋଲିସ ଆଜି ଏହି ମାମଲାରେ ସିନ୍ ରିକ୍ରିଏସ୍ ମଧ୍ୟ କରିଥିଲା। ପୋଲିସ ଏହି ମାମଲାର ତଦନ୍ତ ଅନ୍ତର୍ଜାତୀୟ ଷଡ଼ଯନ୍ତ୍ର ଦୃଷ୍ଟିକୋଣରୁ ମଧ୍ୟ କରିବ। ଗତକାଲି ଅଭିଯୁକ୍ତକୁ କୋର୍ଟରେ ହାଜର କରାଯାଇଥିଲା। କୋର୍ଟ ସରିଫୁଲକୁ ପାଞ୍ଚ ଦିନିଆ ପୋଲିସ ହେପାଜତକୁ ପଠାଇ ଦେଇଥିଲେ। ଆଜି ସରିଫୁଲକୁ ସାନ୍ତାକ୍ରୁଜ୍ ଲକ୍ଅପ୍ରୁ ବାନ୍ଦ୍ରା ପୋଲିସ ଷ୍ଟେସନକୁ ଅଣାଯାଇଥିଲା। ୭୨ ଘଣ୍ଟାର ଦୀର୍ଘ ତଦନ୍ତ ପରେ ପୋଲିସ ତାଙ୍କୁ ଗିରଫ କରିଥିଲା।
