ନୂଆଦିଲ୍ଲୀ,୨୦।୧: ବଲିଉଡ ଅଭିନେତା ସୈଫ୍ ଅଲ୍ଲୀ ଖାନ୍ଙ୍କୁ ଛୁରାମାଡ଼ ଘଟଣା ଫିଲ୍ମ ଇଣ୍ଡଷ୍ଟ୍ରୀ ସହ ପୁରା ଦେଶରେ ଚିନ୍ତା ବଢାଇଛି। କାରଣ ଆକ୍ରମଣକାରୀ ଜଣକ ବାଂଲାଦେଶୀ। ସେ ବେଆଇନ ଭାବରେ ମୁମ୍ବାଇରେ ରହିବା ପରେ ଏଭଳି ଏକ ବଡ଼ କାଣ୍ଡ ଘଟାଇଛି। ଏହି ଘଟଣା ପରେ ଦିଲ୍ଲୀ ଉପ-ରାଜ୍ୟପାଳ(ଏଲଜି) ଭିକେ ସାକସେନା ଦିଲ୍ଲୀରେ କଡା ପଦକ୍ଷେପ ଗ୍ରହଣ କରିବାକୁ କହିଛନ୍ତି। ସେ ଦିଲ୍ଲୀର ପୋଲିସ କମିଶନରଙ୍କୁ ମିଶନ୍ ମୋଡରେ ଅନୁପ୍ରବେଶକାରୀଙ୍କୁ ଚିହ୍ନଟ ନିର୍ଦ୍ଦେଶ ଦେଇଛନ୍ତି।
ଏଲଜି ସଚିବାଳୟ ପକ୍ଷରୁ ଜାରି କରାଯାଇଥିବା ପତ୍ରରେ କହିଛନ୍ତି, ସୈଫ ଅଲ୍ଲୀ ଖାନ୍ଙ୍କ ମାମଲାରେ କୁହାଯାଉଛି ଅଭିଯୁକ୍ତ ନିଜର ପରିଚୟ ଲୁଚାଇ ରେଷ୍ଟୁରାଣ୍ଟରେ କାମ କରୁଥିଲା। ସେଭଳି ଦିଲ୍ଲୀରେ ବେଆଇନ ଭାବରେ ବାଂଲାଦେଶୀ ଓ ରୋହିଙ୍ଗ୍ୟା ଅନୁପ୍ରବେଶକାରୀ ଥିବେ ଏହାକୁ ଅସ୍ବୀକାର କରିହେବନି। ସେମାନେ ଅଧିକାଂଶ ସମୟ ଦୋକନରେ ଏବଂ ଘରୋଇ ସହାୟକ ଭାବରେ କାମ କରିଥାନ୍ତି। କମ୍ ଟଙ୍କାରେ ତାଙ୍କୁ କାମରେ ଲଗାଯାଉଛି। ଏହାଛଡା ଏକ ସଂଗଠିତ ସିଣ୍ଡିକେଟ୍ କିଛି ଏଭଳି ଲୋକଙ୍କୁ ନକଲି ଆଧାର କାର୍ଡ, ଭୋଟର କାର୍ଡ ଓ ରାସନ୍ କାର୍ଡ ଭଳି ଜିନିଷ ଜରିଆରେ ତାଙ୍କୁ ରୋଜଗାର ଦେବାକୁ ଚେଷ୍ଟା କରୁଛନ୍ତି।
ଏଲଜି ଏଭଳି ଅନୁପ୍ରବେଶକାରୀଙ୍କୁ ଚିହ୍ନଟ କରିବାକୁ ମିଶନ୍ ମୋଡ଼ରେ ଏକ ଅଭିଯାନ ଚଳାଇବାକୁ ନିର୍ଦ୍ଦେଶ ଦେଇଛନ୍ତି। ଏଥିପାଇଁ କାମରେ ରଖାଯାଉଥିବା କର୍ମଚାରୀ, ଘରୋଇ ସହାୟକ ଓ ଶ୍ରମିକଙ୍କ ଭେରିଫିକେସନ୍ ପାଇଁ ସଚେତନତା ସୃଷ୍ଟି କରିବାକୁ ପ୍ରିଣ୍ଟ ଓ ସୋସିଆଲ ମିଡିଆ ଜରିଆରେ ଆଉଟରିଚ୍ କାର୍ଯ୍ୟକ୍ରମ ଆରମ୍ଭ କରିପାରନ୍ତି।
