ମୁମ୍ବାଇ, ୨୨/୦୧: ଅଭିନେତା ସୈଫ ଅଲି ଖାନ ହସ୍ପିଟାଲରୁ ଡିସଚାର୍ଜ ହୋଇଥିବା ବେଳେ କଡ଼ା ପୋଲିସ ସୁରକ୍ଷା ମଧ୍ୟରେ ସେ ଘରେ ପହଞ୍ଚିଛନ୍ତି । ତାଙ୍କ ପତ୍ନୀ କରୀନା କପୁର ଖାନ ଏବଂ ମାଆ ଶର୍ମିଲା ଟାଗୋର ଅଭିନେତାଙ୍କୁ ହସ୍ପିଟାଲରୁ ଆଣିଥିଲେ । ଘରକୁ ଫେରିବା ମାତ୍ରେ, ଅଭିନେତା ତାଙ୍କ ପରିବାରର ସୁରକ୍ଷା ପାଇଁ ସିକ୍ୟୁରୁଟି ଟିମ୍ ବଦଳାଇଥିବା ସୂଚନା ମିଳିଛି ।ସୈଫଙ୍କ ଏବଂ ତାଙ୍କ ପରିବାରକୁ ୯୦ ଦଶକର ଅଭିନେତା ରୋନିତ ରୟଙ୍କ ଏଜେନ୍ସି ସୁରକ୍ଷା ଦେବାକୁ ଯାଉଥିବା ଜଣାପଡ଼ିଛି।
ଗଣମାଧ୍ୟମ ରିପୋର୍ଟ ଅନୁସାରେ, ଜଣେ ଚୋର ତାଙ୍କ ଘରେ ପଶି ଆକ୍ରମଣ କରିଥିବା ଘଟଣାପରେ ସୈଫ ଏହି ପଦକ୍ଷେପ ନେଉଛନ୍ତି। ଅଭିନେତା ରୋନିତ ରୟ ସୈଫ ଅଲ୍ଲୀ ଖାନଙ୍କୁ ତାଙ୍କ ଘରେ ସୁରକ୍ଷା ଦେବାକୁ ଯାଉଛନ୍ତି । ରୋନିତ ରୟ ଏସ୍ ସିକ୍ୟୁରିଟି ଆଣ୍ଡ୍ ପ୍ରୋଟେକ୍ସନ୍ ନାମକ ଏକ ଫାର୍ମ ଚଲାନ୍ତି, ଯେଉଁଥିରେ ସେ ସୁରକ୍ଷା କର୍ମୀ ଯୋଗାଇଥାନ୍ତି । ଏହି ସମୟରେ, ଏକ ସାକ୍ଷାତକାରରେ ରୋନିତ କହିଛନ୍ତି, 'ଆମେ ସୈଫଙ୍କ ସହିତ ଅଛୁ, ସେ ବର୍ତ୍ତମାନ ସୁସ୍ଥ ଅନୁଭବ କରୁଛନ୍ତି ଏବଂ ଏବେ ସେ ଘରକୁ ଫେରି ଆସିଛନ୍ତି।' ରୋନିତ ରୟ ଫିଲ୍ମରେ ତାଙ୍କର ଦମଦାର ଅଭିନୟ ପାଇଁ ଜଣାଶୁଣା । ଏବେ ତାଙ୍କୁ ବଲିଉଡରେ ଖଳନାୟକ ଭୂମିକାରେ ଅଧିକ ଦେଖିବାକୁ ମିଳେ। ସେ ଟିଭି ସିରିଏଲରେ ମଧ୍ୟ କାମ କରିଛନ୍ତି ।
ଏହା ବ୍ୟତୀତ ରୋନିତ ରୟ କୌଣସି ରେଷ୍ଟୁରାଣ୍ଟ କିମ୍ବା ଜିମ୍ରେ ଟଙ୍କା ନିବେଶ କରିବା ପରିବର୍ତ୍ତେ ନିଜର ଏକ ଏଜେନ୍ସି ଖୋଲିଥିଲେ ଯାହା ମାଧ୍ୟମରେ ସେ ଅନେକ ବଡ଼ ବଲିଉଡ୍ ଅଭିନେତାଙ୍କୁ ସୁରକ୍ଷା ଯୋଗାଇଥାନ୍ତି । ପ୍ରକାଶ ଥାଉକି, ଜାନୁଆରୀ ୧୬ ତାରିଖରେ ବଲିଉଡ଼ ଅଭିନେତା ସୈଫ ଅଲି ଖାନଙ୍କୁ ତାଙ୍କ ମୁମ୍ବାଇ ସ୍ଥିତ ଘର ଭିତରେ ଛୁରାମାଡ ହୋଇଥିଲା । ଚୋରି କରିବା ଉଦ୍ୟମରେ ଘରେ ପଶିଥିଲା ଅଭିଯୁକ୍ତ । ଯାହାକୁ ସୈଫଙ୍କ ଚାକରାଣୀ ଦେଖିଥିଲେ । ଚାକରାଣୀଙ୍କ ଚିତ୍କାର ଶୁଣି ସୈଫ ସେଠାରେ ପହଞ୍ଚିଥିଲେ । ଚାକରାଣୀଙ୍କୁ ବନ୍ଧକ ରଖି ୧ କୋଟି ଟଙ୍କା ଦାବି କରିଥିଲା ଅଭିଯୁକ୍ତ । ଏହି ସମୟରେ ସେ ସୈଫଙ୍କ ସହ ଅଭିଯୁକ୍ତର ହାତାହାତି ହେବା ଫଳରେ ଅଭିଯୁକ୍ତ ୬ଥର ଛୁରାମାଡ଼ କରି ସେଠାରୁ ଫେରାର୍ ହୋଇଥିଲା । ଏହାପରେ ସୈଫଙ୍କୁ ଡ଼ାକ୍ତରଖାନାରେ ଭର୍ତ୍ତି କରାଯାଇଥିଲା ।
