ମୁମ୍ବାଇ, ୨୨/୦୧: ବଲିଉଡ଼ ଅଭିନେତ୍ରୀ ପ୍ରିୟଙ୍କା ଚୋପ୍ରା ବର୍ତ୍ତମାନ ଅଛନ୍ତି ଭାରତ ଗସ୍ତରେ। ଏନେଇ ରାଜାମୌଲିଙ୍କ 'SSMB29'  ଫିଲ୍ମରେ ପ୍ରିୟଙ୍କାଙ୍କୁ  ମହେଶ ବାବୁଙ୍କ ବିପକ୍ଷରେ କାଷ୍ଟ କରାଯାଇପାରେ ବୋଲି ଚର୍ଚ୍ଚା ଜୋର ଧରିଛି। ତେବେ ଏହି ଚର୍ଚ୍ଚା ମଧ୍ୟରେ ସେ ହାଇଦ୍ରାବାଦ ନିକଟସ୍ଥ ପ୍ରସିଦ୍ଧ ଚିଲକୁର ବାଲାଜୀ ମନ୍ଦିର ପରିଦର୍ଶନ କରିଛନ୍ତି ।ଯାହାର ଫଟୋ  ଅଭିନେତ୍ରୀ ତାଙ୍କ ଫଟୋ ସୋସିଆଲ ମିଡିଆରେ ସେୟାର କରି ନୂଆ ଅଧ୍ୟାୟ ଆରମ୍ଭ ବୋଲି ଲେଖିଛନ୍ତି । ଯାହା ପରେ ସେ ରାଜାମୌଲିଙ୍କ ଫିଲ୍ମରେ ନଜର ଆସିବା ନେଇ ତାଙ୍କ ପ୍ରଶଂସକ ଏବଂ ଗଣମାଧ୍ୟମ ମଧ୍ୟରେ ଆଲୋଚନାର ବିଷୟ ପାଲଟିଛି । 

ତେବେ ସେ ଏହି ପୋଷ୍ଟରେ ରାମ ଚରଣଙ୍କ ପତ୍ନୀ ଉପାସନା କୋନିଡେଲାଙ୍କୁ ଧନ୍ୟବାଦ ମଧ୍ୟ ଜଣାଇଛନ୍ତି, ଯିଏ ତାଙ୍କୁ ମନ୍ଦିର ଦର୍ଶନ କରିବାକୁ ପରାମର୍ଶ ଦେଇଥିଲେ । ସୋସିଆଲ ମିଡିଆରେ ଚିଲକୁର ବାଲାଜୀ ଗସ୍ତ ବିଷୟରେ ବିସ୍ତୃତ ଭାବରେ ବର୍ଣ୍ଣନା କରି ପ୍ରିୟଙ୍କା ପୋଷ୍ଟ ସେୟାର କରି ଲେଖିଛନ୍ତି , ଯେଉଁଥିରେ ସେ ତାଙ୍କ ଜୀବନର ଏକ "ନୂତନ ଅଧ୍ୟାୟ" ଆରମ୍ଭ କରୁଛନ୍ତି ବୋଲି ଉଲ୍ଲେଖ କରିଛନ୍ତି । ଏଥିସହ ସେ କ୍ୟାପସନରେ  ଲେଖିଛନ୍ତି "ଶ୍ରୀ ବାଲାଜୀଙ୍କ ଆଶୀର୍ବାଦରେ ଏକ ନୂତନ ଅଧ୍ୟାୟ ଆରମ୍ଭ ହେଉଛି । ଆମେ ସମସ୍ତେ ଆମ ହୃଦୟରେ ଶାନ୍ତି ଏବଂ ଆମ ଚାରିପାଖରେ ସମୃଦ୍ଧି ଏବଂ ପ୍ରାଚୁର୍ଯ୍ୟ ପାଇବା ଉଚିତ । ଈଶ୍ୱରଙ୍କ କୃପା ଅସୀମ । ଓମ୍ ନମୋ ନାରାୟଣାୟ । ଧନ୍ୟବାଦ ଉପସାନା କାମିନେନିକୋନିଡେଲା ।'' ମହେଶ ବାବୁ 'SSMB 29'ରେ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ ବୋଲି ସ୍ପଷ୍ଟ ହୋଇଛି  । ସେହିପରି ତାଙ୍କ ବିପକ୍ଷରେ ପ୍ରିୟଙ୍କା ଚୋପ୍ରା ଓ ପୃଥ୍ବୀରାଜ ସୁକୁମାରନ୍ ମଧ୍ୟ ଏହି କଳାକାରଙ୍କ ସହ ଯୋଗ ଦେଇପାରନ୍ତି ବୋଲି ଚର୍ଚ୍ଚା ହେଉଛି । କିନ୍ତୁ ଏନେଇ ନିର୍ମାତା କୌଣସି ଘୋଷଣା କରିନାହାଁନ୍ତି ।  ସୂତ୍ର ଅନୁସାରେ, ପ୍ରିୟଙ୍କା ଏସ୍ ଏସ୍ ରାଜମୌଲିଙ୍କ ସହ ଫିଲ୍ମକୁ ନେଇ ଛଅ ମାସରୁ ଅଧିକ ସମୟ ଧରି ଆଲୋଚନା କରୁଥିଲେ।