ମୁମ୍ବାଇ ୨୨/୦୧: ବଲିଉଡ ଅଭିନେତା ସାହିଦ କପୁର ବର୍ତ୍ତମାନ ନିଜର ଅପ୍କମିଂ ଫିଲ୍ମ ‘ଦେବା’କୁ ନେଇ ବେଶ୍ ଚର୍ଚ୍ଚାରେ ଅଛନ୍ତି । ଏ ମାସ ୩୧ ତାରିଖରେ ପ୍ରେକ୍ଷାଳୟକୁ ଆସିବ ‘ଦେବା’ । ସମୀକ୍ଷକମାନଙ୍କ କହିବାନୁସାରେ, ‘ଦେବା’ ବକ୍ସ ଅଫିସ୍ରେ ଦମ୍ଦାର ଓପନିଂ କରିବ । ‘ଦେବା’ ପୂର୍ବରୁ ପ୍ରଥମ ଦିନରେ ବକ୍ସ ଅଫିସ୍ରେ କୋଟି କୋଟି ଟଙ୍କା ବ୍ୟବସାୟ କରିଥିବା ସାହିଦଙ୍କ କିଛି ଫିଲ୍ମ ସମ୍ପର୍କରେ ଜାଣିବା ଆସନ୍ତୁ ।
ପଦ୍ମାବତ୍ :
୨୦୧୮ରେ ସାହିଦ କପୁରଙ୍କ ଅଭିନୀତ ‘ପଦ୍ମାବତ୍’ ଆସିଥିଲା ପ୍ରେକ୍ଷାଳୟକୁ । ଏହା ଥିଲା ସାହିଦଙ୍କ ଅଭିନୟ କ୍ୟାରିୟରର ପ୍ରଥମ ଦିନରେ ସର୍ବାଧିକ ଓପନିଂ କରିଥିବା ଫିଲ୍ମଗୁଡ଼ିକ ମଧ୍ୟରୁ ଅନ୍ୟତମ । ‘ପଦ୍ମାବତ୍’ ଘରୋଇ ବକ୍ସ ଅଫିସ୍ରେ ୨୪ କୋଟି ଟଙ୍କାରୁ ବ୍ୟବସାୟ ଖାତା ଖୋଲିଥିଲା । ଏ ଫିଲ୍ମରେ ରଣବୀର ସିଂ ଓ ଦୀପିକା ମୁଖ୍ୟ ଚରିତ୍ରରେ ଦେଖା ଦେଇଥିଲେ । ସାହିଦଙ୍କ ଚରିତ୍ରର ଗୁରୁତ୍ୱ ମଧ୍ୟ କିଛି କମ୍ ନଥିଲା ଏଥିରେ । ଫିଲ୍ମ ନିର୍ମାଣ ସମୟରୁ ନାମକୁ ନେଇ ଯେଉଁ ଚର୍ଚ୍ଚା, ବିବାଦ ଲାଗି ରହିଥିଲା, ତାହାରି କାରଣରୁ ବୋଧହୁଏ ଏ ଫିଲ୍ମଟି ଏତେ ଭଲ ବ୍ୟବସାୟ କରିବାରେ ସକ୍ଷମ ହୋଇଥିଲା ।
କବୀର ସିଂହ :
ସାହିଦ ବର୍ତ୍ତମାନ ସୁଦ୍ଧା ଯେତେ ଫିଲ୍ମରେ ଅଭିନୟ କରିଛନ୍ତି, ତା’ ମଧ୍ୟରୁ ‘କବୀର ସିଂହ’ ବକ୍ସ ଅଫିସ୍ରେ ସବୁଠୁ ଅଧିକ ଓପନିଂ କରିବା ଫିଲ୍ମ ତାଲିକାର ଦ୍ୱିତୀୟ ସ୍ଥାନରେ ରହିଛି । ଏଥିରେ ସାହିଦ ଓ କିୟାରା ଆଡଭାନୀଙ୍କ ଅନ୍ସ୍କ୍ରିନ୍ କେମିଷ୍ଟ୍ରି ଦର୍ଶକଙ୍କ ମନକୁ ବେଶ୍ ପାଇଥିଲା । ‘କବୀର ସିଂହ’ ଭାରତୀୟ ବକ୍ସ ଅଫିସ୍ରେ ୨୦ କୋଟି ୨୧ ଲକ୍ଷ ଟଙ୍କା ପ୍ରଥମ ଦିନରେ ବ୍ୟବସାୟ କରିଥିଲା
ସାନ୍ଦାର :
ଏ ଫିଲ୍ମରେ ସାହିଦଙ୍କ ବିପକ୍ଷରେ ନାୟିକା ଭାବେ ନଜର ଆସିଥିଲେ ଆଲିଆ ଭଟ୍ଟ । ୨୦୧୫ରେ ପ୍ରେକ୍ଷାଳୟକୁ ଆସିଥିଲା ଏ ସିନେମା । ଫିଲ୍ମଟି ବକ୍ସ ଅଫିସ୍ରେ ଫ୍ଲପ୍ ସାବ୍ୟସ୍ତ ହୋଇଥିଲେ ହେଁ ଓପନିଂ କଲେକ୍ସନ ମାମଲାରେ ତୃତୀୟ ସ୍ଥାନରେ ଥିଲା । ‘ସାନ୍ଦାର’ ବକ୍ସ ଅଫିସ୍ରେ ୧୩.୧୦ କୋଟି ଟଙ୍କାର ବ୍ୟବସାୟ କରିଥିଲା ପ୍ରଥମ ଦିନରେ ।
ଆର୍ ରାଜକୁମାର :
୨୦୧୩ରେ ରିଲିଜ ହୋଇଥିଲା ଫିଲ୍ମ ‘ଆର୍ ରାଜକୁମାର’ । ଏଥିରେ ସାହିଦଙ୍କ ନାୟିକା ଭାବେ ଦେଖିବାକୁ ମିଳିଥିଲେ ସୁନ୍ଦରୀ ସୋନାକ୍ଷୀ ସିହ୍ନା । ସୋନାକ୍ଷୀଙ୍କ ସହ ସାହିଦଙ୍କ ଅନ୍ସ୍କ୍ରିନ୍ ଲଭ୍, ରୋମାନ୍ସକୁ ଖୁବ୍ ପସନ୍ଦ କରିଥିଲେ ଦର୍ଶକ ଏ ଫିଲ୍ମରେ । ଏହାର ଫାଇଦା ଦେଖିବାକୁ ମିଳିଥିଲା ବକ୍ସ ଅଫିସ୍ରେ । ରିଲିଜର ପ୍ରଥମ ଦିନରେ ‘ଆର୍ ରାଜକୁମାର’ ବ୍ୟବସାୟ କରିଥିଲା ୧୦ କୋଟି ୨୦ ଲକ୍ଷ ଟଙ୍କା । ଫିଲ୍ମ ଯଦିଓ ସୁପରହିଟ୍ ସାବ୍ୟସ୍ତ ହୋଇନଥିଲା, ଆଭରେଜ୍ ବ୍ୟବସାୟ କରିଥିଲା ।
ଉଡ୍ତା ପଞ୍ଜାବ :
୨୦୧୬ରେ ପରଦା ଉପରକୁ ଆସିଥିଲା ‘ଉଡ୍ତା ପଞ୍ଜାବ’ । ଏହି ଫିଲ୍ମରେ ସାହିଦ କପୁରଙ୍କ ସହିତ ଦେଖିବାକୁ ମିଳିଥିଲେ କରୀନା କପୁର । ଅନ୍ୟ ମୁଖ୍ୟ ଚରିତ୍ରରେ ଅଭିନୟ କରିଥିଲେ ଦିଲ୍ଜିତ ଦୋସଞ୍ଝା ଓ ଆଲିଆ ଭଟ୍ଟ । ଏହି ଫିଲ୍ମର ବକ୍ସ ଅଫିସ୍ ଓପନିଂ କଲେକ୍ସନ ଥିଲା ୧୦ କୋଟି ୫ ଲକ୍ଷ ଟଙ୍କା ।
