ମୁମ୍ବାଇ: ବଲିଉଡ ଅଭିନେତା ସୈଫ ଅଲ୍ଲି ଖାନ ଅଟୋ ଡ୍ରାଇଭର ଭଜନ ସିଂହ ରାଣାଙ୍କୁ ସାକ୍ଷାତ କରିବା ସହ ତାଙ୍କୁ ଆଲିଙ୍ଗନ କରିଛନ୍ତି ଏବଂ ଧନ୍ୟବାଦ ଜଣାଇଛନ୍ତି । ଭଜନ ସିଂହ ଅଭିନେତାଙ୍କୁ ରକ୍ତାକ୍ତ ଅବସ୍ଥାରେ ହସ୍ପିଟାଲ ନେଇ ଯାଇଥିଲେ । ରାତିରେ ସୈଫଙ୍କ ଡ୍ରାଇଭର ନଥିବା ବେଳେ ଏହି ଅଟୋ ବାଲା ହିଁ ତାଙ୍କ ଜୀବନ ବଞ୍ଚାଇଥିଲେ । ଜାନୁଆରୀ ୧୬ରେ ସୈଫ ଅଲ୍ଲି ଖାନଙ୍କ ଉପରେ ମରଣାନ୍ତକ ଆକ୍ରମଣ ହୋଇଥିଲା ଓ ଅଟୋ ଡ୍ରାଇଭର ଭଜନ ସିଂହ ତାଙ୍କୁ ହସ୍ପିଟାଲ୍ ନେଇଥିଲେ ।
ସୈଫ ଅଲ୍ଲି ଖାନ ଅଟୋ ଡ୍ରାଇଭରଙ୍କୁ ଧନ୍ୟବାଦ ଜଣାଇବା ପରେ ଅଭିନେତାଙ୍କ ମା’ ଶର୍ମିଳା ଟାଗୋରଙ୍କ ପ୍ରତିକ୍ରିୟା ମଧ୍ୟ ମିଳିଛି । ଅଟୋ ଡ୍ରାଇଭର ରାଣାଙ୍କୁ ଶର୍ମିଳା ଆଶିର୍ବାଦ ଦେବା ସହ ତାଙ୍କ ସହାୟତା ପାଇଁ ଧନ୍ୟବାଦ ଜଣାଇଛନ୍ତି । ମଙ୍ଗଳବାର ଲୀଲାବତି ହସ୍ପିଟାଲ୍ରୁ ଡିସଚାର୍ଜ ହେବା ପରେ ସୈଫ ଅଲ୍ଲି ଖାନ ଅଟୋ ଡ୍ରାଇଭର ଭଜନ ସିଂହ ରାଣାଙ୍କ ସହ ୫ ମିନିଟ୍ କଥା ହୋଇଛନ୍ତି । ସୂଚନା ଅନୁସାରେ, ଅଟୋ ଡ୍ରାଇଭର ସୈଫଙ୍କୁ ହସ୍ପିଟାଲରେ ଛାଡ଼ିବା ପରେ ଭଡ଼ା ନେଇନଥିଲା । ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ସୈଫ୍ ଅଟୋରେ ବସିଥିବା ବେଳେ ପ୍ରଥମେ ତାଙ୍କୁ ବାନ୍ଦ୍ରାର ହୋଲି ହସ୍ପିଟାଲକୁ ନେବା ପାଇଁ ଯୋଜନା ହୋଇଥିଲା । କିନ୍ତୁ ପରେ ଖୋଦ ସୈଫ ଲୀଲାବତି ହସ୍ପିଟାଲ ଯିବାକୁ କହିଥିଲେ ବୋଲି ଭଜନ ସିଂହ ଖୁଲାସା କରିଥିଲେ ।
ମଙ୍ଗଳବାର ହସ୍ପିଟାଲରୁ ଅଭିନେତା ସୈଫ ଅଲ୍ଲି ଖାନ ଡିସଚାର୍ଜ ହେବା ପରେ ନିଜ ଫ୍ୟାନ୍ସଙ୍କୁ ଧନ୍ୟବାଦ ଜଣାଇଥିଲେ । ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଥିଲେ, ସେ ଠିକ୍ ଅଛନ୍ତି ଏବଂ କିଛି ଦିନ ବିଶ୍ରାମ ନେବାକୁ ଚାହୁଁଛନ୍ତି । ସୂଚନାଯୋଗ୍ୟ, ସୈଫ ଅଲ୍ଲି ଖାନ ଶେଷ ଥର ପାଇଁ ଜୁନିୟର ଏନଟିଆର ଅଭିନୀତ ଦେବାରା-ପାର୍ଟ ୧ରେ ନଜର ଆସିଥିଲେ । ଆଗକୁ ସୈଫ ଅଭିନୀତ ଥାଲାଭିଆନ୍ ଇରୁକିନ୍ଦ୍ରା, ଗୋ ଗୋଆ ଗନ୍ ୨ ଏବଂ ଦେବାରା-ପାର୍ଟ୨ ରିଲିଜ୍ ହେବାକୁ ଯାଉଛି ।
