ନୂଆଦିଲ୍ଲୀ, ୨୨/୦୧: ପାଖେଇ ଆସୁଛି ନିର୍ବାଚନ । ଏନେଇ ଦିଲ୍ଲୀରେ ୪ ଦିନ ଡ଼୍ରାଏ ଡ଼େ ରହିବ । ଦିଲ୍ଲୀ ସରକାର ୩ ରୁ ୫ ତାରିଖ ଓ ଫେବୃଆରୀ ୮ ତାରିଖ ଦିନ ବିଧାନସଭା ନିର୍ବାଚନର ଫଳାଫଳ ଘୋଷଣା ହେବା ପର୍ଯ୍ୟନ୍ତ ସହରରେ ମଦ ଦୋକାନ ବନ୍ଦ ରହିବ । ଏଥି ସମୟରେ ମଦ ଦେଉଥିବା ପ୍ରତିଷ୍ଠାନ ବି ବନ୍ଦ ରହିବ ।
ନିକଟରେ ଦିଲ୍ଲୀ ଅବକାରୀ କମିଶନରଙ୍କ ଦ୍ୱାରା ଏକ ବିଜ୍ଞପ୍ତି ଜାରି କରାଯାଇଛି । ଯେଉଁଥିରେ ୭୦ ସଦସ୍ୟ ବିଶିଷ୍ଟ ଦିଲ୍ଲୀ ବିଧାନସଭା ନିର୍ବାଚନ ପାଇଁ ମତଦାନ ଏବଂ ଗଣନା ଦିନ ବିଭିନ୍ନ ଉତ୍ପାଦ ଲାଇସେନ୍ସ ପାଇଁ ଅବକାରୀ ନିୟମ-୨୦୧୦ ଅନୁଯାୟୀ ଡ୍ରାଏ ଡ଼େ ଘୋଷଣା କରାଯାଇଛି। ଫେବୃଆରୀ ୩ ତାରିଖ ସନ୍ଧ୍ୟା ୬ଟାରୁ ଫେବୃଆରୀ ୫ ତାରିଖ ସନ୍ଧ୍ୟା ୬ଟା ପର୍ଯ୍ୟନ୍ତ ଏବଂ ତା’ପରେ ଫେବୃଆରୀ ୮ ତାରିଖ ଗଣନା ଦିନ ଏକ ଡ୍ରାଏ ଡ଼େ ରହିବ ବୋଲି ନିର୍ଦ୍ଦେଶ ଦିଆଯାଇଛି। ଦିଲ୍ଲୀରେ ଡ୍ରାଏ ଡେ ସମୟରେ କୌଣସି ମଦ ଦୋକାନ ଖୋଲିବ ନାହିଁ। ଏହା ସହିତ ହୋଟେଲ ଏବଂ ରେଷ୍ଟୁରାଣ୍ଟରେ ମଦ ପରିବେଷଣ କରାଯିବ ନାହିଁ। ବିଜ୍ଞପ୍ତିରେ କୁହାଯାଇଛି ଯେ ମଦ ବିକ୍ରି କିମ୍ବା ପରିବେଷଣ କରୁଥିବା କ୍ଲବ୍ କିମ୍ବା କୌଣସି ପ୍ରତିଷ୍ଠାନକୁ ମଧ୍ୟ ମଦ ବିକ୍ରୟ କିମ୍ବା ପରିବେଷଣ କରିବାକୁ ଅନୁମତି ଦିଆଯିବ ନାହିଁ। ପ୍ରକାଶ ଥାଉକି, ଦିଲ୍ଲୀର ସମସ୍ତ ୭୦ଟି ଆସନ ପାଇଁ ଫେବୃଆରୀ ୫ ତାରିଖରେ ଗୋଟିଏ ପର୍ଯ୍ୟାୟରେ ମତଦାନ ହେବ। ସେହିପରି ଫେବୃଆରୀ ୮ ତାରିଖରେ ଫଳାଫଳ ଘୋଷଣା କରାଯିବ। ବିଧାନସଭା ନିର୍ବାଚନରେ ମୋଟ ୬୯୯ ପ୍ରାର୍ଥୀ ନିର୍ବାଚନ ମଇଦାନରେ ଥିବା ବେଳେ ଏମାନଙ୍କ ମଧ୍ୟରୁ ୯୬ ଜଣ ମହିଳା ନିର୍ବାଚନ କ୍ଷେତ୍ରରେ ନିଜର ଭାଗ୍ୟ ପରୀକ୍ଷା କରୁଛନ୍ତି ।
