କରଞ୍ଜିଆ,୧୬/୦୧: ଫୁଲବାଣୀରୁ ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷିକୁ ଗଞ୍ଜେଇ ଚୋରା ଚାଲାଣ ବେଳେ ମାଡ଼ି ବସିଲା ପୋଲିସ୍ । ୧କୁଇଣ୍ଟାଲ ୭୩ କେଜି ଗଞ୍ଜେଇ ସହ ଜବତ ହେଲା ଦାମୀ କାର୍ । ଘଟଣାରେ ସମ୍ପୃକ୍ତ ଥିବା ବ୍ୟକ୍ତିଙ୍କୁ ଗିରଫ କଲା ଯଶିପୁର ପୋଲିସ । ଗିରଫ ହୋଇଥିବା ବ୍ୟକ୍ତି ଜଣକ ଫୁଲବାଣୀର ଗଞ୍ଜେଇ ମାଫିଆ ଯତୀନ୍ଦ୍ର ବେହେରା ବୋଲି ଜଣାପଡ଼ିଛି । ମୟୂରଭଞ୍ଜ ଜିଲ୍ଲା କରଞ୍ଜିଆ ଅଞ୍ଚଳରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, କରଞ୍ଜିଆ ଅଞ୍ଚଳରେ ଚୋରା ଗଞ୍ଜେଇ ଚାଲାଣ ହେଉଥିବା ନେଇ ପୋଲିସ କୌଣସି ସୂତ୍ରରୁ ଖବର ପାଇଥିଲା । ଖବର ପାଇ ଗୁରୁବାର ସକାଳୁ ୪୯ ନମ୍ୱର ଜାତୀୟ ରାଜପଥ ଯଶୀପୁର ହାଟ ପଡ଼ିଆ ଠାରେ ଛକି ବସିଥିଲା ଯଶିପୁର ପୋଲିସ । ସେହି ବାଟ ଦେଇ ଚାଲାଣକାରୀ ଏକ କାର୍ ଯୋଗେ ଗଞ୍ଜେଇ ନେଇ ଯାଉଥିବା ବେଳେ ପୋଲିସକୁ ଦେଖି ମାଫିଆ ଜଣକ ଗାଡ଼ି ଛାଡି ଫେରାର ହେବାକୁ ଚେଷ୍ଟା କରିଥିଲା । ହେଲେ ପୋଲିସ ତାକୁ ଗୋଡାଇ ଗୋଡାଇ ଧରିବାରେ ସଫଳ ହୋଇଥିଲା । ଏହା ସହ ଉକ୍ତ ଦାମୀ କାର୍ରୁ ୧କୁଇଣ୍ଟାଲ ୭୩ କେଜି ଗଞ୍ଜେଇ ମଧ୍ୟ ଜବତ କରିଛି ପୋଲିସ । ଜବତ ହୋଇଥିବା ଗଞ୍ଜେଇର ଆନୁମାନିକ ମୂଲ୍ୟ ୧୫ ଲକ୍ଷରୁ ଉର୍ଦ୍ଧ୍ୱ ହେବ ବୋଲି ଜଣା ପଡିଛି । ତେବେ ଏହି ଗଞ୍ଜେଇ ଫୁଲବାଣୀରୁ ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷିକୁ ଚୋରା ଚାଲାଣ ହେଉଥିବା ବେଳେ ଘଟଣାରେ ସମ୍ପୃକ୍ତ ଅଭିଯୁକ୍ତକୁ ଗିରଫ କରି ଅଧିକ ତଦନ୍ତ ଜାରି ରଖିଛି ଯଶିପୁର ପୋଲିସ ।
