ବାଙ୍ଗିରିପୋଷି,୧୮/୧: ଶିମିଳିପାଳ ଅଭୟାରଣ୍ୟରେ ଥମୁନି ଶିକାରୀଙ୍କ ପ୍ରାଦୁର୍ଭାବ। ବାରମ୍ବାର ଧରା ପଡ଼ିଲେ ମଧ୍ୟ ମନରେ ରହୁନି ଭୟ। ବାରହା ଶିକାର କରି ପୁଣି ୩ ଜଣ ଶିକାରୀ ଧରାପଡ଼ିଛନ୍ତି। ବଡ଼ଗାଁ ରେଞ୍ଜ ଅଞ୍ଚଳରୁ ଏହି ଶିକାରୀମାନେ ଧରାପଡ଼ିଛନ୍ତି। ସେମାନଙ୍କ ନିକଟରୁ ୬ କିଲୋରୁ ଉର୍ଦ୍ଧ୍ଵ ମାଂସ ଜବତ ହୋଇଛି।
ସୂଚନାନୁଯାୟୀ, ବଡ଼ଗାଁ ରେଞ୍ଜ ଅଞ୍ଚଳରେ କିଛି ଶିକାରୀ ଏକ ବାରହା ମାରି ମାଂସ ରୋଷେଇ କରୁଥିବା ବେଳେ କୌଣସି ସୂତ୍ରରୁ ସୂଚନା ପାଇ ଏସଟିଏଫ୍ ଟିମ୍ ଚଢାଉ କରିଥିଲା। ସେମାନଙ୍କ ମଧ୍ୟରୁ ୩ ଜଣ ଶିକାରୀଙ୍କୁ ଏସଟିଏଫ୍ ଅଟକ ରଖିଥିବା ବେଳେ ୬ କିଲୋରୁ ଉର୍ଦ୍ଧ୍ଵ ମାଂସ ଜବତ ହୋଇଛି। ଏତଦ୍ ବ୍ୟତୀତ ଶିକାରରେ ବ୍ୟବହୃତ ୨ଟି କୁରାଢି, ଡେକଚି, ବାସନକୁସନ ଜବତ ହୋଇଛି। ଏନେଇ ଅଧିକ ତଦନ୍ତ ଚାଲୁଥିବା ବେଳେ ବନ ବିଭାଗ ସେମାନଙ୍କ ନାଁ ପ୍ରକାଶ କରିନାହିଁ। ଘଟଣା ସ୍ଥଳରୁ ଜବତ ମାଂସକୁ ବାଙ୍ଗିରିପୋଷି ପଶୁ ଡାକ୍ତରଖାନାରେ ପରୀକ୍ଷଣ କରାଯାଇଥିବା ସୂଚନା ମିଳିଛି।
ଏହି ଖବରଟିକୁ ପଢନ୍ତୁ-ଦୀଘା ମୁହାଣରେ ବୁଡ଼ିଲା ମାଛ ଧରା ଟଲର, ଅଳ୍ପକେ ବର୍ତ୍ତିଲେ ୯ ମତ୍ସୀଜୀବୀ
