ଭୁବନେଶ୍ୱର,୦୧/୦୭: ମୁଁ ଧରମ ଭାଇ ପାଖକୁ ଯାଉଛି । ମୋତେ ମୋ ଧରମ ଭାଇ ପାଖେ ଛାଡ଼ । ଏଭଳି ଜିଦ୍ ଧରି ଜଣେ ଯୁବତୀ ରାତି ଅଧରେ ପୁଲିସ ଓ କିଛି ଯୁବକଙ୍କୁ ନାକେଦମ୍ କରିଛନ୍ତି । ଏଭଳି ଯୁବତୀଙ୍କ ରାତି ଅଧିଆ ପାଲା ଦେଖିବାକୁ ମିଳିଛି ଶନିବାର ବିଳମ୍ବିତ ରାତିରେ ରେଣ୍ଟାଲ କଲୋନୀ- ଫାୟାରଷ୍ଟେସନ ରାସ୍ତାରେ । ଶେଷରେ ପୁଲିସ ଓ ସ୍ଥାନୀୟ ଯୁବକମାନେ ଯୁବତୀଙ୍କୁ ନେଇ ସେ ରହୁଥିବା ହଷ୍ଟେଲ୍ରେ ଛାଡ଼ିଛନ୍ତି ।
ଶନିବାର ରାତି ସାଢ଼େ ୧୨ଟା । ରେଣ୍ଟାଲ କଲୋନୀ ଛକରୁ ଫାୟାର ଷ୍ଟେସନ ଛକ ଅଭିମୁଖେ ଦୌଡ଼ୁଥିଲେ ଜଣେ ଜିନ୍ ପ୍ୟାଣ୍ଟ୍ ସାର୍ଟ ପିନ୍ଧା ଯୁବତୀ । ରାତି ଅଧରେ ରାସ୍ତାରେ ଜଣେ ଯୁବତୀ ଏକୁଟିଆ ଦୌଡ଼ୁଥିବା ଦେଖି ସ୍ଥାନୀୟ ଦୁଇଟି ହୋଟେଲ୍ ମାଲିକ ଓ କିଛି ଯୁବକ ସଂପୃକ୍ତ ଯୁବତୀଙ୍କୁ ପିଛାକରି ବାଟରେ ଅଟକାଇଥିଲେ । ବେଶଭୂଷାରୁ ସେ ଜଣେ ଉଚ୍ଚଶିକ୍ଷିତା ଭଳି ଲାଗୁଥିଲେ । ଏତେ ରାତିରେ ଏକୁଟିଆ କୁଆଡ଼େ ଯାଉଛ, ତୁମ ଘର କେଉଁଠି ଯେତେ ପଚାରିଥିଲେ ମଧ୍ୟ ମୁଁ ମୋ ଧରମ ଭାଇ ପାଖକୁ ଯାଉଛି ବୋଲି ସେ କହୁଥିଲେ । ମଝିରେ ମଝିରେ ସେ ମୋବାଇଲ୍କୁ ଧରି କେଉଁ ନମ୍ବରକୁ ଲଗାଉଥିଲେ । କିନ୍ତୁ ସେପଟରୁ ଫୋନ୍ କାଟି ଦିଆ ଯାଉଥିବା ଜଣା ପଡ଼ୁଥିଲା ।
ଯୁବତୀଙ୍କୁ ରାସ୍ତା କଡ଼ରେ ଦେଖି ସେହିବାଟ ଦେଇ ଯାଉଥିବା ଲୋକେ ଅଟକି ଯାଇଥିଲେ । କୌଣସି ଅଘଟଣ ପୂର୍ବରୁ ଯୁବତୀଙ୍କୁ କେମିତି ରୋକାଯାଇ ପାରିବ, ସେନେଇ ସ୍ଥାନୀୟ ଯୁବକଙ୍କ ମଧ୍ୟରେ ଚିନ୍ତା ବଢ଼ି ଯାଇଥିଲା । ଏହି ସମୟରେ ସେହିବାଟ ଦେଇ ପିସିଆର ବାଇକ୍ରେ ଦୁଇ ଜଣ ପୁଲିସ ଯାଉଥିଲେ । ଯୁବକମାନେ ପୁଲିସଙ୍କୁ ଘଟଣା ସଂପର୍କରେ ଜଣାଇଥିଲେ । ପୁଲିସ ଯୁବତୀଙ୍କୁ ପଚରାଉଚରା କରିଥିଲେ ମଧ୍ୟ ସେ ମୋ ଧରମ ଭାଇ ପାଖକୁ ମୋତେ ଯିବାକୁ ଦିଅ ବୋଲି ବାରମ୍ବାର କହି ଚାଲିଥିଲେ । ପୁଲିସ ଧରମ ଭାଇର ଠିକଣା ପଚାରିବାରୁ ସେ କେତେବେଳେ ଖଣ୍ଡଗିରି ତ ଆଉ କେତେବେଳେ ବରମୁଣ୍ଡା ହାଉସିଂବୋର୍ଡ କଲୋନୀ ବୋଲି କହୁଥିଲେ । ତେଣୁ ଯୁବତୀ ଜଣଙ୍କୁ ପିସିଆର ପୁଲିସ ବାଇକ୍ ପଛରେ ବସାଇଥିଲେ । ସେମାନଙ୍କ ସହ କିଛି ପିଲା ବି ଯାଇଥିଲେ ।
ଫାୟାରଷ୍ଟେସନ ଛକରେ ଯୁବତୀ ଜଣଙ୍କ କହିଲେ ସେ ଘାଟିକିଆ କଳିଙ୍ଗନଗର ଅଞ୍ଚଳରେ ରହନ୍ତି ବୋଲି କହିବାରୁ ତାଙ୍କୁ ସେଠାକୁ ନିଆ ଯାଇଥିଲା । ସେ ରହୁଥିବା ହଷ୍ଟେଲ୍ ପାଖ ହୋଇଯିବାରୁ ବାଇକ୍ରୁ ଡ଼େଇଁପଡ଼ି ଯୁବତୀ ଜଣଙ୍କ ଗେଟ୍ ଡ଼େଇଁ ହଷ୍ଟେଲ ଭିତରକୁ ପଶି ଯାଇଥିଲେ । ପୁଲିସ ସେଠାରେ ପହଞ୍ଚିବାରୁ ସେ ତାଙ୍କ ସହପାଠୀମାନଙ୍କୁ ଡକାଇ ମୁଁ ଏଥର ସୁରକ୍ଷିତ ବୋଲି କହିବାରୁ ପୁଲିସ ଓ ଯୁବକମାନେ ଫେରି ଆସିଥିଲେ ।