ନୂଆଦିଲ୍ଲୀ ୨୮/୦୭: ଆମେରିକାର ଜଣେ ମହିଳା ଲଞ୍ଚ୍ ବା ମଧ୍ୟାହ୍ନଭୋଜନ ପ୍ରସ୍ତୁତ କରି ଦେବା ଲାଗି ପ୍ରତିଦିନ ତାଙ୍କ ସ୍ୱାମୀଙ୍କଠାରୁ ୧୧୬୭ ଟଙ୍କା ନେଉଛନ୍ତି । ମହିଳାଙ୍କ ନାମ ହେଲା ରେ’ । ସେ ଦୁଇଟି ସନ୍ତାନର ଜନନୀ । ଟିକଟକ୍ରେ କଣ୍ଟେଣ୍ଟ କ୍ରିଏଟର ଭାବେ ବି କାମ କରନ୍ତି । ଏକ ଭାଇରାଲ୍ ଭିଡିଓରେ ତାଙ୍କର ଏହି ନିଷ୍ପତ୍ତି କାହିଁକି ଯଥାର୍ଥ ତାହା ସେ ଦର୍ଶାଇଛନ୍ତି ।
ରେ’ କହିଛନ୍ତି, ସ୍ୱାମୀଙ୍କ ଲାଗି ମଧ୍ୟାହ୍ନଭୋଜନ ପ୍ରସ୍ତୁତ କରିବାକୁ ତାଙ୍କୁ ଭଲ ଲାଗେ । କିନ୍ତୁ ଯେତିକି ସମୟ ଦେଇ ଓ ଧୈର୍ଯ୍ୟର ସହ ସେ ଖାଦ୍ୟ ପ୍ରସ୍ତୁତ କରୁଛନ୍ତି ସେଥିଲାଗି ତାଙ୍କୁ ଉପଯୁକ୍ତ ପାରିଶ୍ରମିକ ବି ମିଳିବା ଆବଶ୍ୟକ । କାରଣ ଯଦି ସେ ଘରେ ଖାଦ୍ୟ ପ୍ରସ୍ତୁତ କରି ନ ଦିଅନ୍ତେ ତେବେ ସ୍ୱାମୀ ଫାଷ୍ଟଫୁଡ୍ ଚେନ୍ରୁ ଖାଦ୍ୟ ମଗାଇ ଖାଆନ୍ତେ । ସେ ବାବଦରେ ତାଙ୍କର ଏହାଠାରୁ ଅଧିକ ଅର୍ଥ ଖର୍ଚ୍ଚ ହୁଅନ୍ତା । ଏପରିସ୍ଥଳେ ସ୍ୱାମୀ ଯଦି ଅଜଣା ଲୋକଙ୍କୁ ମଧ୍ୟାହ୍ନଭୋଜନ ବାବଦରେ ଟଙ୍କା ଦେବାକୁ ସକ୍ଷମ ତେବେ ତାଙ୍କୁ କାହିଁକି ନୁହେଁ ବୋଲି ସେ ପ୍ରଶ୍ନ କରିଛନ୍ତି ।
ରେ’ ଆହୁରି କହିଛନ୍ତି ଯେ, ଏହି ବ୍ୟବସ୍ଥା ଉଭୟଙ୍କ ଦାମ୍ପତ୍ୟ ଜୀବନକୁ ଆହୁରି ମଧୁର କରିଛି । ତାଙ୍କ ସ୍ୱାମୀ ଏହାଦ୍ୱାରା ଘରେ ପ୍ରସ୍ତୁତ ହେଉଥିବା ଖାଦ୍ୟ ପାଇପାରୁଛନ୍ତି । ସେଥିଯୋଗୁ ତାଙ୍କର ରୋଗରେ ପଡି଼ବାର ଆଶଙ୍କା କମ୍ ରହୁଛି । ସେ ମଧ୍ୟ ନିଜ କାମ ପାଇଁ ଏକ ନିର୍ଦ୍ଦିଷ୍ଟ ପାରିଶ୍ରମିକ ପାଉଛନ୍ତି । ତାଙ୍କ ଅନୁସାରେ, ପ୍ରତିଦିନ ଭିନ୍ନ ସ୍ୱାଦର ମଧ୍ୟାହ୍ନଭୋଜନ ପ୍ରସ୍ତୁତି ଲାଗି ସୃଜନଶୀଳତା ଆବଶ୍ୟକ । ଏଥିଲାଗି ପାରିଶ୍ରମିକ ପାଇବା ଯଥାର୍ଥ କଥା । ସ୍ୱାମୀଙ୍କ ଲାଗି ସାଲାଡ୍ ପ୍ରସ୍ତୁତିର ଏକ ଭିଡିଓକୁ ରେ’ ଟିକଟକ୍ରେ ସେୟାର କରିଛନ୍ତି । ତାକୁ ଅଦ୍ୟାବଧି ୨ ଲକ୍ଷରୁ ଅଧିକ ଭ୍ୟୁ ମିଳିଛି । ବହୁ ଲୋକ ତାଙ୍କର ଏପରି ଆଭିମୁଖ୍ୟକୁ ପ୍ରଶଂସା କରୁଛନ୍ତି ।
