ନୂଆଦିଲ୍ଲୀ,୨୮/୦୭: ଉତ୍ତର-କେନ୍ଦ୍ରୀୟ ନାଇଜେରିଆର ନାଇଜରରେ ଏକ ବଡ଼ ଅଘଟଣ ଘଟିଛି । ମଝି ଦରିଆରେ ଡଙ୍ଗା ବୁଡ଼ି ପ୍ରାୟ ୨୫ ଜଣଙ୍କର ମୃତ୍ୟୁ ହୋଇଛି । ଡଙ୍ଗାରେ ମୋଟ୍ ୧୦୦ରୁ ଅଧିକ ଜଣ ଯାତ୍ରୀ ଥିଲେ । ଆହୁରି ଅନେକ ନିଖୋଜ ଥିବା କୁହାଯାଉଛି । ଡଙ୍ଗା ବୁଡି ନେଇ ସ୍ଥାନୀୟ ଅଧିକାରୀ ସୂଚନା ଦେଇଛନ୍ତି ।
ଜାତୀୟ ଜରୁରୀକାଳୀନ ପରିଚାଳନା ସଂସ୍ଥାର ଅଧିକାରୀ ଇବ୍ରାହିମ୍ ହୁସେନି କହିଛନ୍ତି ଯେ, ନାଇଜରର ଶିରୋରୋ ଅଞ୍ଚଳର ଗୁମୁ ଗାଁ ନିକଟରେ ଶନିବାର ଏହି ଦୁର୍ଘଟଣା ଘଟିଥିଲା । ଯାତ୍ରୀଙ୍କ ସନ୍ଧାନ ଏବଂ ଉଦ୍ଧାର କାର୍ଯ୍ୟ ଚାଲିଛି, କିନ୍ତୁ ଏହି ଅଞ୍ଚଳ ପ୍ରାୟତଃ ସଶସ୍ତ୍ର ଦଳ ଦ୍ୱାରା ନିୟନ୍ତ୍ରିତ ହୋଇଥିବାରୁ ସୀମିତ । ସେ ଆହୁରି କହିଛନ୍ତି ଯେ ମୃତାହତଙ୍କ ସଂଖ୍ୟା ବଢ଼ିବା ଆଶଙ୍କା କରାଯାଉଛି ।
୨୬ ଜଣଙ୍କୁ ଉଦ୍ଧାର କରାଯାଇଛି- ନାଇଜର ରାଜ୍ୟ ଜରୁରୀକାଳୀନ ପରିଚାଳନା ସଂସ୍ଥାର ଅଧିକାରୀ ୟୁସୁଫ୍ ଲେମୁ କହିଛନ୍ତି ଯେ, ଡଙ୍ଗାରୁ ୨୬ ଜଣଙ୍କୁ ଉଦ୍ଧାର କରାଯାଇଛି। ସେମାନଙ୍କ ମଧ୍ୟରୁ ଅଧିକାଂଶ ମହିଳା ଏବଂ ଶିଶୁ ରହିଛନ୍ତି । ଦୁର୍ଘଟଣାର ସଠିକ୍ କାରଣ ଏପର୍ଯ୍ୟନ୍ତ ଜଣାପଡିନାହିଁ, କିନ୍ତୁ କ୍ଷମତାଠାରୁ ଅଧିକ ଲୋକ ଡଙ୍ଗାରେ ଚଢ଼ିବା ଯୋଗୁଁ ଏହା ଘଟିଛି । ଡଙ୍ଗା ଚାଳକ ସଂଘର ସଦସ୍ୟ ଆଦମୁ ଅହମ୍ମଦ ଡଙ୍ଗାରେ କ୍ଷମତାଠାରୁ ଅଧିକ ଲୋକ ଭର୍ତ୍ତି ଥିବା କହିଛନ୍ତି ।
ଗତ ବର୍ଷ ଜାମ୍ପଫ୍ରାରେ ନଦୀରେ ଓଲଟିଥିଲା ଡଙ୍ଗା- ଗତବର୍ଷ ଅର୍ଥାତ୍ ୨୦୨୪ ସେପ୍ଟେମ୍ବରରେ, ଉତ୍ତର-ପଶ୍ଚିମ ରାଜ୍ୟ ଜାମ୍ପଫ୍ରାର ଏକ ନଦୀରେ ଅଧିକାଂଶ ଚାଷୀମାନଙ୍କୁ ନେଇ ଯାଉଥିବା ଏକ ଡଙ୍ଗା ବୁଡ଼ି ଯାଇଥିଲା । ଯେଉଁଥିରେ ୪୦ଜଣ ଲୋକ ବୁଡ଼ି ଯାଇଥିଲେ । ସ୍ଥାନୀୟ ଗଣମାଧ୍ୟମ ଅନୁଯାୟୀ, ୨୦୨୪ରେ ନାଇଜେରିଆରେ ଡଙ୍ଗା ବୁଡ଼ି ଦୁର୍ଘଟଣାରେ ପ୍ରାୟ ୩୨୬ ଜଣଙ୍କର ମୃତ୍ୟୁ ହୋଇଥିଲା।
