ପାଟଣା, ୦୫/୦୧: ହାତୀ ଠାରୁ ବଞ୍ଚିବାକୁ ଯାଇ ନିଆଁରେ ପଡ଼ିଗଲେ ମହିଳା । ଚାଲିଗଲା ମହିଳାଙ୍କ ଜୀବନ । ମୃତ ମହିଳା ଜଣକ ଝୁଲି ବାରିକ ବୋଲି ଜଣାପଡ଼ିଛି । କେନ୍ଦୁଝର ପାଟଣା ଥାନା ଅନ୍ତର୍ଗତ ଝାଟିପଡା ଗାଁରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ଶୀତ ଦାଉରୁ ରକ୍ଷା ପାଇବା ପାଇଁ ଶନିବାର ରାତିରେ ବାଡ଼ିରେ ଝୁଲି ନିଜ ପରିବାର ସହ ନିଆଁ ଜାଳି ସେକି ହେଉଥିଲେ । ଏହି ସମୟରେ ହଠାତ ସେଠାକୁ ଏକ ଦନ୍ତା ହାତୀ ମାଡ଼ି ଆସିଥିଲା । ହାତୀକୁ ଦେଖି ସମସ୍ତେ ଭୟରେ ଏଣେ ତେଣେ ଦୌଡ଼ି ପଳାଇଥିଲେ । ହେଲେ ମହିଳା ଜଣକ କେଉଁଆଡ଼େ ଯାଇ ନପାରି ନିଆଁ ଉପରରେ ପଡି ଯାଇଥିଲେ । ଏହା ଦେଖି ତାଙ୍କ ପରିବାର ଲୋକେ ତୁରନ୍ତ ହାତୀକୁ ଘଉଡ଼ାଇ ଥିଲେ ଏବଂ ମହିଳାଙ୍କୁ ଉଦ୍ଧାର କରିଥିଲେ । ମହିଳାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି କଟକ ନେବାବେଳେ ବାଟରେ ତାଙ୍କ ମୃତ୍ୟୁ ହୋଇଥିଲା ।
