ନୂଆଦିଲ୍ଲୀ : ଜୁଲାଇ ୨ ହାଥରସ ଦଳାଚକଟା ପରେ ଫେରାର ହୋଇଯାଇଥିବା ସାକାର ହରି ଓରଫ ଭୋଲେ ବାବାଙ୍କ ଲୋକେସନ୍ ଚିହ୍ନଟ ହୋଇଛି । ଭୋଲେ ବାବା ମୈନପୁରୀ ବିଛବା ସ୍ଥିତ ଆଶ୍ରମରେ ଲୁଚି ରହିଥିବା ଆଶଙ୍କା କରାଯାଉଛି । ପୋଲିସକୁ ଏଭଳି କିଛି ସୂଚନା ମିଳିଛି, ଯେଉଁଥିରେ ଦାବି କରାଯାଉଛି ଯେ ବାବା ଏହି ଆଶ୍ରମରେ ଲୁଚି ରହିଛନ୍ତି । ଆଶ୍ରମ ଭିତରକୁ ଖାଦ୍ୟପାନୀୟ ଯୋଗାଣ ହେଉଛି । ଏହି କାରଣରୁ ପୋଲିସ୍ ଆଶ୍ରମକୁ ଚାରି ପାଖରୁ ଘେରି କରି ରହିଛି । ସିକନ୍ଦରାରାଓରେ ଦଳାଚକଟାରେ ୧୨୨ ଜଣଙ୍କ ମୃତ୍ୟୁ ପରେ ଭୋଲେ ବାବାଙ୍କୁ ଖୋଜୁଛି ପୋଲିସ । ସେହି ଦିନ ସନ୍ଧ୍ୟା ସୁଦ୍ଧା ପୋଲିସକୁ ବାବାଙ୍କ ଠିକଣା ମିଳିଥିଲା । ତାଙ୍କ ଶେଷ ଠିକଣା ମୈନପୁରୀ ସନ୍ଧାନ କରାଯାଇଥିଲା । ଏହା ପରେ ଫୋନ ବନ୍ଦ ହୋଇଯାଇଥିଲା ।
ବିଛବାରେ ଗତ ୭୨ ଘଣ୍ଟା ହେବ ବାବା ଅଘୋଷିତ ଭାବରେ ଗୃହବନ୍ଦୀ ହୋଇ ରହିଛନ୍ତି । ବାବାଙ୍କ ଆଶ୍ରମରେ ୪୦-୫୦ ଗାଡି ଲୋକ ଏବଂ ୧୨ ରୁ ଅଧିକ ଗାଡି ରହିଛି । ବାବାଙ୍କ ସ୍ବାସ୍ଥ୍ୟବସ୍ଥା ଭଲ ନଥିବା ବାବାଙ୍କ ମୁଖପାତ୍ର ସୂଚନା ଦେଇ ଏହି ଆଶଙ୍କାର ଖୁଲାସା କରିଦେଇଛନ୍ତି । କୌଣସି ଡାକ୍ତର ତ ଭିତରକୁ ପ୍ରବେଶ କରିନାହାନ୍ତି କିନ୍ତୁ ବାବା ଡାଇବେଟିସ୍ ଏବଂ ବ୍ଲଡ ପ୍ରେସର ନିୟନ୍ତ୍ରଣ ପାଇଁ ଜାମୁକେଳି ମଗାଇ ଖାଉଛନ୍ତି । ସେବାକାରୀ ମାନେ ଗୁପ୍ତ ଭାବରେ ବାବାଙ୍କ ପାଇଁ ଜାମୁକୋଳି ନେଇ ଯାଉଛନ୍ତି ।
ଆଶ୍ରମରେ ଉପସ୍ଥିତ ଥିବା ଲୋକଙ୍କ ଖାଦ୍ୟ ପାନୀୟ ଧିରେଧିରେ ଶେଷ ହେବାକୁ ଲାଗିଛି । ଡାଲି ଏବଂ ପନିପରିବା ଶେଷ ହେବାରେ ଲାଗିଲାଣି । ଆଶ୍ରମରେ କ୍ଷୀର ଯୋଗାଣ ପାଖାପାଖି ବନ୍ଦ ହୋଇଛି । ଏହି ଆବଶ୍ୟକତାକୁ ପୂରଣ କରିବା ପାଇଁ ଆଶ୍ରମରୁ ଦୁଇ ତିନିଟି ଗାଡି ବାହାରକୁ ଆସୁଛି । ସେବାଦାରଙ୍କ କହିବା କଥା ଭିତରେ ୬ ଟି ବିଳାସପୂର୍ଣ୍ଣ କୋଠରୀ ଅଛି, ଯାହା ଭିତରୁ ବନ୍ଦ ହୋଇ ରହିଛି । ଗୁରୁବାର ପୋଲିସ ଏହା ଭିତରକୁ ପ୍ରବେଶ କରିବାକୁ ଉଦ୍ୟମ କରିଥିବା ବେଳେ ଏଥିରେ ସକ୍ଷମ ହୋଇ ପାରିନଥିଲା । ପୂରା ପ୍ରଶାସନ ଏବେ ଏହି ଆଶ୍ରମକୁ ଘେରାବନ୍ଦୀ କରି ରଖିଛି ।