କୋଣାର୍କ,୧୨/୯ : ଦୈନିକ  ହଜାର ହଜାର ସଂଖ୍ୟାରେ ଦେଶ ବିଦେଶରୁ ପର୍ଯ୍ୟଟକମାନେ କୋଣାର୍କ ପରିଦର୍ଶନରେ ଆସିଥାନ୍ତି । ଦୀର୍ଘ ବର୍ଷ ଧରି ପର୍ଯ୍ୟଟକମାନଙ୍କୁ ଉତ୍ତମ ଆତିଥ୍ୟତା ପ୍ରଦାନ କରି ସୁନାମ ଅର୍ଜନ କରିଥିବା ଏହି ଯାତ୍ରୀନିବାସକୁ ୩୨ ବର୍ଷ ପୁରିଲାଣି । ଏହି ଯାତ୍ରୀନିବାସର ପୁନରୁଦ୍ଧାର ଏବେ ଜରୁରୀ ହୋଇପଡିଛି । ପ୍ରତିବର୍ଷ କୋଣାର୍କ ଉତ୍ସବ ସମୟରେ କୋଠରୀ ମରାମତି, ରଙ୍ଗ ବୋଳା ଯାଇ ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି । ହେଲେ ଅବସ୍ଥା ଯାହାକୁ ସେଇଆ । 

ଏବେ ଯାତ୍ରୀନିବାସ ମୁଖ୍ୟ ଦ୍ବାର ଛାତରୁ ପ୍ଲାଷ୍ଟର ଖସୁଥିବା ଦେଖିବାକୁ ମିଳିଛି । କୋଠରୀ କବାଟ, ଝରକା ଅବସ୍ଥା ନ କହିଲେ ଭଲ । ପର୍ଯ୍ୟଟକଙ୍କ ରାତ୍ରିଯାପନ ପାଇଁ ୧୯୮୭ ମସିହା ଅକ୍ଟୋବର ମାସରେ ଭିତ୍ତିପ୍ରସ୍ତର ସ୍ଥାପନ କରାଯାଇ ନିର୍ମାଣ ଆରମ୍ଭ ହୋଇଥିଲା । ୧୯୯୨ ମସିହା ନଭେମ୍ବର ମାସରେ ଯାତ୍ରୀନିବାସ ଲୋକାର୍ପଣ ହୋଇଥିଲା । ଏଠାରେ ୨୮ଟି କୋଠରୀ ସହ ଗୋଟିଏ ରେଷ୍ଟୁରାଣ୍ଟ ରହିଛି । ପ୍ରତି ବର୍ଷ ଡିସେମ୍ବର ମାସରେ ପର୍ଯ୍ୟଟନ ବିଭାଗ ପକ୍ଷରୁ ଆୟୋଜିତ ହେଉଥିବା କୋଣାର୍କ ଉତ୍ସବ ଓ ଅନ୍ତର୍ଜାତୀୟ ବାଲୁକା କଳା ଉତ୍ସବ ଦେଖିବାକୁ ଆସୁଥିବା ଦେଶ ବିଦେଶର ପର୍ଯ୍ୟଟକଙ୍କୁ ସୁନ୍ଦର ଆତିଥ୍ୟତା ପ୍ରଦାନ କରି ପର୍ଯ୍ୟଟକଙ୍କ ମନ କିଣି ନେଇଥାନ୍ତି । କୋଣାର୍କ ସୂର୍ଯ୍ୟମନ୍ଦିର ପରିଦର୍ଶନରେ ଆସି ପର୍ଯ୍ୟଟକମାନେ କୋଣାର୍କ ଯାତ୍ରୀନିବସରେ ରାତ୍ରିଯାପନ କରି ରହିବାକୁ ପସନ୍ଦ କରିଥାନ୍ତି।   କୋଣାର୍କ ପର୍ଯ୍ୟଟନ ଅଧିକାରୀ ଅମୀୟ କୁମାର ସେଠୀଙ୍କୁ ପଚାରିବାରୁ ପୁରାତନ ଯାତ୍ରୀ ନିବାସର ପୁନରୁଦ୍ଧାର ଆବଶ୍ୟକତା ରହିଥିବା ସେ କହିଥିଲେ ।