ମାଲକାନଗିରି,୧୭/୯ : ମାଲକାନଗିରି ଜିଲ୍ଲାରେ ସୁଭଦ୍ରା ଯୋଜନା ଶୁଭାରମ୍ଭ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ବ୍ଲକ ପଡିଆରେ ଆୟୋଜିତ ଜିଲ୍ଲାସ୍ତରୀୟ ତଥା ବ୍ଲକସ୍ତରୀୟ ମେଗା ସୁଭଦ୍ରା ଯୋଜନାରେ ମାଲକାନଗିରି ବିଧାୟକ ନରସିଂହ ମାଡ଼କାମୀ ମୁଖ୍ୟ ଅତିଥି ଭାବେ ଯୋଗଦେଇଥିବାବେଳେ ଜିଲ୍ଲା ପରିଷଦ ଅଧ୍ୟକ୍ଷା, ସମାରୀ ତାଙ୍ଗୁଲ, ପଞ୍ଚାୟତ ସମିତି ଅଧ୍ୟକ୍ଷା, ଗୌରୀ ପଡ଼ିଆମି, ପୌର ପରିଷଦ ଅଧ୍ୟକ୍ଷ, ମନୋଜ ବାରିକ, ପୌର ପରିଷଦ ଉପାଧ୍ୟକ୍ଷା, ମମତା ମହନ୍ତ, ଜିଲ୍ଲାପାଳ, ଆଶିଷ ଈଶ୍ୱର ପାଟିଲ, ଅତିରିକ୍ତ ଜିଲ୍ଲାପାଳ, ସାଧାରଣ ସୋମନାଥ ପ୍ରଧାନ, ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ, ନରେଶ ଚନ୍ଦ୍ର ଶବର ଓ ଗୋଷ୍ଠୀ ଉନ୍ନୟନ ଅଧିକାରୀ, ପ୍ରଭାତୀ ଝୋଡିଆ ମଞ୍ଚାସୀନ ଥିଲେ। 

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭୁବନେଶ୍ୱର ଜନତା ମୈଦାନଠାରେ ସୁଭଦ୍ରା ଯୋଜନାର ଶୁଭାରମ୍ଭ କରିଛନ୍ତି। ସେପ୍ଟେମ୍ବର ୧୫ ସୁଦ୍ଧା ପଞ୍ଜୀକରଣ କରିଥିବା ଯୋଗ୍ୟ ହିତାଧୀକାରୀ ଆଜି ଏହି ଯୋଜନାରେ ପ୍ରଥମ କିସ୍ତିରେ ୫୦୦୦ ଟଙ୍କା ନିଜ ବ୍ୟାଙ୍କ ଆକାଉଣ୍ଟରେ ପାଇଛନ୍ତି । ରାଜ୍ୟ ସରକାରଙ୍କ  ଏହି  ଯୁଗାନ୍ତକାରୀ ପଦକ୍ଷେପ ମହିଳା ମାନଙ୍କୁ ସଶକ୍ତ କରିବା ସହ ଆତ୍ମ୍ ନିର୍ଭରଶୀଳ କରିବ ବୋଲି ଜିଲ୍ଲାପାଳ ପ୍ରକାଶ କରିଛନ୍ତି। ଏହି ଅବସରରେ ସ୍ବଚ୍ଛତା ହିଁ ସେବା କାର୍ଯ୍ୟକ୍ରମର ଶୁଭାରମ୍ଭ କରାଯାଇଛି ଓ ସାମୁହିକ ଭାବେ ନିଜର ପରିବେଶକୁ ସ୍ୱଚ୍ଛ ରଖିବା ପାଇଁ ସ୍ବଚ୍ଛତା ଶପଥ ପାଠ କରାଯାଇଛି । ଅନୁରୂପ ଭାବେ ଆଜି ଅନ୍ୟାନ୍ୟ ବ୍ଲକରେ ମଧ୍ୟ ଏହି ଯୋଜନାର ଶୁଭାରମ୍ଭ କାର୍ଯ୍ୟକ୍ରମ ଆୟୋଜନ କରାଯାଇଛି । 

ଆଜି ପ୍ରଧାନମନ୍ତ୍ରୀ ଆବାସ ଯୋଜନା ହିତାଧୀକାରୀଙ୍କ ଗୃହ ପ୍ରବେଶ ନିମନ୍ତେ ଚାବି ପ୍ରଦାନ କରାଯାଇଛି। ସେହିପରି ଦୁଇ ଜଣ ସଫଳ ଏସଏଚଜି ମା‘ ସେମାନଙ୍କର ସଫଳତାର କାହାଣୀ ଉପସ୍ଥାପନ କରିଥିଲେ। ବିଭିନ୍ନ ସାଂସ୍କୃତିକ ଦଳ ଏହି ଅବସରରେ ପାରମ୍ପରିକ ନୃତ୍ୟ ପରିବେଷଣ କରିଥିଲେ। ପ୍ରତି ବ୍ଲକରେ ପ୍ରାୟ ୩୦୦୦ ମା‘ମାନେ ସାମିଲ ହୋଇଥିଲେ। ଶେଷରେ ବିଡିଓ ଧନ୍ୟବାଦ ଅର୍ପଣ କରିଥିଲେ। ପ୍ରଧାନମନ୍ତ୍ରୀଙ୍କ ଭିଡ଼ିଓ କନଫରେନ୍ସ ବେଳକୁ ପ୍ରବଳ ବେଗରେ ବର୍ଷା ହୋଇଥିଲା। ଟେଣ୍ଟ ଭିତରେ ପାଣି ଭର୍ତ୍ତି ହୋଇଯାଇଥିଲେ ମଧ୍ୟ କେତକ ମହିଳା ବସିବା ଚେୟାରକୁ ମୁଣ୍ଡ ଉପରେ ଘୋଡାଇ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ସୁଭଦ୍ରା ଯୋଜନାର କାର୍ଯ୍ୟକ୍ରମ ସଭା ମଞ୍ଚରେ ଏଲଇଡି ମାଧ୍ୟମ ରେ ଆଗ୍ରହ ସହ ଦେଖିଥିଲେ।