କେନ୍ଦ୍ରାପଡ଼ା,୧୯/୦୯: କେନ୍ଦ୍ରାପଡ଼ା ଜିଲ୍ଲା ଆଳି ଥାନା ବଡିହ ଅଞ୍ଚଳର ବହୁଚର୍ଚ୍ଚିତ ଅର୍ଜୁନ ରାଉତ ହତ୍ୟା ମାମଲାର ରାୟ ପ୍ରକାଶ ପାଇଛି । କେନ୍ଦ୍ରାପଡ଼ା  ଜିଲ୍ଲା ଓ ଦୌରା ଜଜ୍‌ ବିଶ୍ୱଜିତ ମହାନ୍ତି ମାମଲାର ବିଚାର କରି ସାକ୍ଷ୍ୟପ୍ରମାଣ ଆଧାରରେ ୩ ଅଭିଯୁକ୍ତ  ସୁକାନ୍ତ ବାରିକ, ପଞ୍ଚାନନ ଦାସ ଓ ଜୟରାମ ବାରିକଙ୍କୁ ଦୋଷୀ ସାବ୍ୟସ୍ତ କରିଛନ୍ତି । ସମସ୍ତ ଆସାମୀଙ୍କୁ  ଆଜୀବନ କାରାଦଣ୍ଡରେ ଦଣ୍ଡିତ କରିବା ସହ  ପ୍ରତ୍ୟେକଙ୍କୁ ୫ ହଜାର ଟଙ୍କା ଲେଖାଏଁ ଜରିମାନା  କରିଛନ୍ତି କୋର୍ଟ । ଜରିମାନା ଅନାଦାୟ ଆସାମୀମାନଙ୍କୁ  ଅତିରିକ୍ତ ୬ ମାସ ଲେଖାଏଁ କାରାଦଣ୍ଡରେ ଦଣ୍ଡିତ  କରାଯିବ । 

୨୦୧୪ ଏପ୍ରିଲ ୧୮ ରାତି ପ୍ରାୟ ୮ଟା ବେଳେ  ବଡିହ ଗ୍ରାମର ଅର୍ଜୁନ ରାଉତ ଓ ତାଙ୍କ ପୁଅ ପ୍ରତାପ  ରାଉତ ତରୁଣ ଜେନା ନାମକ ସମ୍ପର୍କୀୟ ଯୁବକଙ୍କୁ  ଘରେ ଛାଡ଼ିବା ପାଇଁ ଯାଉଥିଲେ । ବାଟରେ ବଡିହ  ଗ୍ରାମର ସୁକାନ୍ତ ବାରିକ, ପଞ୍ଚାନନ ଦାସ ଓ ମହୁଲିଆ  ଗ୍ରାମର ଜୟରାମ ବାରିକ ଅତର୍କିତ ଭାବେ ଅର୍ଜୁନଙ୍କୁ  ଆକ୍ରମଣ କରିଥିଲେ । ତରୁଣ ଓ ପ୍ରତାପ ସେଠାରୁ  କୌଣସିମତେ ଖସିଯାଇ ଗ୍ରାମବାସୀଙ୍କୁ ଘଟଣା  ସମ୍ପର୍କରେ ଜଣାଇଥିଲେ । ଅର୍ଜୁନଙ୍କୁ ବଞ୍ଚାଇବା  ପାଇଁ ବାବାଜୀ ବାରିକ, ରବୀନ୍ଦ୍ର ଜେନା, ରାକେଶ  ରାଉତ, ଭୀମସେନ୍‌ ରାଉତ ପ୍ରମୁଖ ଘଟଣାସ୍ଥଳରେ  ପହଞ୍ଚିଥିଲେ ହେଁ ସେମାନେ ମଧ୍ୟ ଆକ୍ରମଣରୁ ବର୍ତ୍ତି  ନଥିଲେ । ଆହତମାନଙ୍କୁ ପ୍ରଥମେ ଆଳି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ସେମାନଙ୍କ  ମଧ୍ୟରୁ ଅର୍ଜୁନଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ  ତାଙ୍କୁ ଆଳିରୁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ତାଙ୍କୁ କେନ୍ଦ୍ରାପଡ଼ା  ଅଣାଯାଉଥିବା ବେଳେ ବାଟରେ ତାଙ୍କର ପ୍ରାଣବାୟୁ  ଉଡ଼ିଯାଇଥିଲା । ଅର୍ଜୁନଙ୍କ ପୁଅ ପ୍ରତାପ ଆଳି  ଥାନାରେ ଏନେଇ ଅଭିଯୋଗ କରିଥିଲେ । ପୁଲିସ୍‌  ହତ୍ୟା ମାମଲା ରୁଜୁ କରି ତଦନ୍ତ ଚଳାଇଥିଲା ।  ମାମଲାର ମୁଖ୍ୟ ଆସାମୀ ଭାଗିରଥି ବାରିକକୁ ପୂର୍ବରୁ  ଆଜୀବନ କାରାଦଣ୍ଡରେ ଦଣ୍ଡିତ କରାଯାଇଥିଲା ।  ଏବେ ଅନ୍ୟ ତିନି ଆସାମୀଙ୍କୁ ଦଣ୍ଡିତ କରାଯାଇଛି ।