ମାଲକାନଗିରି,୧୮/୯: ମାଲକାନଗିରି ଜିଲ୍ଲା ସଦର ମହକୁମା ଚିକିତ୍ସାଳୟ ପରିସରରେ ଆଜି ରକ୍ତ ଭଣ୍ଡାର, ଜିଲ୍ଲା ଔଷଧ ଭଣ୍ଡାର ଓ ସରକାରୀ ଏ.ଏନ.ଏମ ତାଲିମ କେନ୍ଦ୍ରର ନୂତନ ଅତ୍ୟାଧୁନିକ ଶୀତତାପ ନିୟନ୍ତ୍ରିତ କୋଠାଗୃହ ଉଦଘାଟିତ ହୋଇଯାଇଛି । ଏଥିରେ ମୁଖ୍ୟ ଅତିଥି ଭାବେ ନବରଙ୍ଗପୁର ସାଂସଦ ବଳଭଦ୍ର ମାଝି ଯୋଗଦେଇ ଆନୁଷ୍ଠାନିକ ଭାବେ ଉଦଘାଟନ କରିଛନ୍ତି । ନୂତନ ରକ୍ତ ଭଣ୍ଡାରରେ ଦିନକୁ ୧୦୦ ରୁ ୨୦୦ ୟୁନିଟ ରକ୍ତ ସଂଗ୍ରହ ହେବା ସହ ୫୦୦ ୟୁନିଟ ରଖାଯାଇପାରିବ । ନୂତନ ରକ୍ତଭଣ୍ଡାର ଗୃହ ଉଦ୍ଘାଟନୀ ପରେ ପ୍ରଥମେ ରକ୍ତ ଭଣ୍ଡାର ଦାୟିତ୍ୱରେ ଥିବା ଡାକ୍ତର ସାଗର ଵାଲା ରକ୍ତଦାନ କରିଥିଲେ।

ସେହିଭଳି ନୂତନ ଔଷଧ ଭଣ୍ଡାରରେ ଜିଲ୍ଲାର ଆବଶ୍ୟକତାକୁ ଦୃଷ୍ଟିରେ ରଖି ୩୫୦ ବେଡ଼ ରୋଗୀ ଓ ଅନ୍ୟାନ୍ୟ  ରୋଗୀଙ୍କ ମାସର ଔଷଧ ଗଛିତ ରଖାଯାଇପରିବ । ପୁରୁଣା ଓ ନୂଆ ଔଷଧ ଭଣ୍ଡାର ସହ ମୋଟ ୬ ମାସର ଔଷଧ ଗଛିତ ରଖାଯାଇପାରିବ । ପୂର୍ବରୁ ପୁରୁଣା ଜିଲ୍ଲା ସଦର ମହକୁମା ଚିକିତ୍ସାଳୟରେ ଅସ୍ଥାୟୀ ଭାବେ ସରକାରୀ ମହିଳା ସ୍ୱାସ୍ଥ୍ୟ କର୍ମୀଙ୍କୁ ତାଲିମ ଦିଆଯାଉଥିବା ବେଳେ ନୂତନ କୋଠାରେ ପ୍ରଥମ ବର୍ଷ ପାଇଁ ୫୦ ଓ ଦ୍ୱିତୀୟ ବର୍ଷ ପାଇଁ ୫୦ ଟି ସିଟର ବ୍ୟବସ୍ଥା ରହିଥିବା ସାଂସଦ ଶ୍ରୀ ମାଝି ପ୍ରକାଶ କରିଛନ୍ତି । 

ଏହି ଉତ୍ସବରେ ଅନ୍ୟମାନଙ୍କ ମଧ୍ୟରେ ମାଲକାନଗିରି ବିଧାୟକ ନରସିଂହ ମାଡ଼କାମୀ, ଚିତ୍ରକୋଣ୍ଡା ବିଧାୟକ ମଙ୍ଗୁ ଖିଲ, ଜିଲ୍ଲା ପରିଷଦ ଅଧ୍ୟକ୍ଷା ସମାରୀ ତାଙ୍ଗୁଲୁ,ଜିଲ୍ଲାପାଳ ଆଶିଷ ଈଶ୍ୱର ପାଟିଲ, ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ନରେଶ ଚନ୍ଦ୍ର ଶବର, ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡ଼. ଧନେଶ୍ୱର ମହାପାତ୍ର, ଜିଲ୍ଲା ସଦର ମହକୁମା ଚିକିତ୍ସାଳୟର ଅଧିକ୍ଷକ ଡ଼.ବ୍ରଜବନ୍ଧୁ ଦାସଙ୍କ ସମେତ ବହୁ ଅଧିକାରୀ ଉପସ୍ଥିତ ଥିଲେ ।ଦୀର୍ଘ ବର୍ଷ ପରେ ପୁରୁଣା ହସ୍ପିଟାଲ ପରିସର ରୁ ନୂତନ ଜିଲ୍ଲା ହସ୍ପିଟାଲ ପରିସରକୁ ରକ୍ତ ଭଣ୍ଡାରର ନୂତନ ଅତ୍ୟାଧୁନିକ କୋଠାକୁ ସ୍ଥାନାନ୍ତର ହେଉଥିବାରୁ ଜିଲ୍ଲାବାସୀଙ୍କ ମନରେ ଆନନ୍ଦ ଖେଳି ଯାଇଛି। 

ପୂର୍ବରୁ ରୋଗୀମାନେ ରକ୍ତ ଆବଶ୍ୟକ ହେଲେ ଦୀର୍ଘ ୪ କିଲୋମିଟର ଦୂର ପୁରୁଣା ହସ୍ପିଟାଲ ନିକଟରେ ଥିବା ରକ୍ତ ଭଣ୍ଡାର କୁ ଯିବାକୁ ପଡୁଥିଲା, ଏହା ନିଜସ୍ୱ କୋଠା କୁ ପଳାଇ ଆସୁଥିବାରୁ ଆଉ ସେ ସମସ୍ୟା ରହିବ ନାହିଁ, ଗୁରୁତର ରୋଗୀ ମାନେ ରକ୍ତ ଅଭାବରୁ ହଇରାଣ ହେବେ ନାହିଁ ବୋଲି ସିଡିଏମଓ  ଡାକ୍ତର ମହାପାତ୍ର କହିଛନ୍ତି।