ନୂଆଦିଲ୍ଲୀ,୮।୧୦: ହରିୟାଣା ବିଧାନସଭାର ଜୁଲନା ଆସନର ଫଳାଫଳ ଆସିସାରିଛି। ଏହି ସିଟ୍ରେ ପୂର୍ବତନ ରେସଲର ଓ କଂଗ୍ରେସ ଟିକେଟରେ ନିର୍ବାଚନ ଲଢୁଥିବା ଭିନେଶ ଫୋଗାଟ ଜିତି ଯାଇଛନ୍ତି। ଭିନେଶ ନିଜର ନିକଟତମ ପ୍ରତିଦ୍ବନ୍ଦୀ ବିଜେପିର ଯୋଗେଶ ବୈରାଗୀଙ୍କୁ ୬୦୦୦ରୁ ଅଧିକ ଭୋଟ୍ରେ ପରାଜିତ କରିଛନ୍ତି। ସେଭଳି ଏହି ଆସନରେ ଭିନେଶଙ୍କ ଆଗରେ ଆଉ ଜଣେ ରେସଲର ମଧ୍ୟ ଥିଲେ, କିନ୍ତୁ ତାଙ୍କୁ ମାତ୍ର ୧୨୦୦ରୁ ଅଧିକ ଭୋଟ୍ ମିଳିଛି। ଆପ୍ ପାର୍ଟି ଭିନେଶଙ୍କ ବିରୋଧରେ WWE ରେସଲର କବିତା ରାନୀ (କବିତା ଦଲାଲ)ଙ୍କୁ ଓହ୍ଲାଇଥିଲା। ହେଲେ ନିର୍ବାଚନରେ ଶୋଚନୀୟ ପରାଜୟ ପରେ କବିତ ଅମାନତ ହରାଇଛନ୍ତି।
ଭିନେଶ ଫୋଗାଟ୍ଙ୍କୁ ମୋଟ ୬୫,୦୮୦ ଭୋଟ ମିଳିଛି। ସେଭଳି ତାଙ୍କ ନିକଟତମ ପ୍ରତିଦ୍ବନ୍ଦୀ ଯୋଗେଶଙ୍କୁ ୫୯,୦୬୫ ଭୋଟ ମିଳିଛି। ଏଭଳି ଭାବରେ ଭିନେଶ ୬୦୧୫ ଭୋଟ୍ରେ ଜିତିଛନ୍ତି। ଗତ ଥର ଏହି ଆସନରୁ ଅମରଜତ ବିଜେପି ପ୍ରାର୍ଥୀ ଭାବରେ ନିର୍ବାଚନ ଲଢିଥିଲେ। ଚଳିତ ବର୍ଷ ଏହି ଆସନରୁ ବମ୍ପର ଭୋଟିଂ ହୋଇଛି।
ବିଧାନସଭା ନିର୍ବାଚନ ହିସାବକୁ ଯଦି ଦେଖାଯାଏ ତେବେ କୌଣସି ପ୍ରାର୍ଥୀଙ୍କ ମୋଟ ଭୋଟ୍ର ୧/୬ ପ୍ରତିଶତ ଯଦି ନମିଳେ, ତେବେ ସେ ତାଙ୍କ ଅମାନତ ହରାଇଥାନ୍ତି। ଜୁଲାନା ବିଧାନସଭା ନିର୍ବାଚନରେ ମୋଟ ଭୋଟ୍ ୧,୩୮,୮୭୧ ପଡିଛି। ଏଭଳି ସ୍ଥିତିରେ ୧/୬ କିମ୍ବା ୧୬.୬୬% ହିସାବରେ ୨୩,୧୪୫ ଭୋଟ୍ କବିତା ପାଇଥିଲେ ଅମାନତ ହରାଇବାଠାରୁ ରକ୍ଷା ପାଇ ପାରିଥାନ୍ତେ।
