ନୂଆଦିଲ୍ଲୀ: ଦିଲ୍ଲୀ ଓ ପଞ୍ଜାବର ପଡ଼ୋଶୀ ହରିୟାଣାରେ ଆମ ଆଦମୀ ପାର୍ଟି (ଆପ୍‌) ବିଧାନସଭା ନିର୍ବାଚନରେ ଜୋରଦାର ଲଢ଼େଇ କରିଥିଲା । କିନ୍ତୁ ଦଳକୁ ସେଠାରେ ସଫଳତା ମିଳିପାରି ନାହିଁ । ହରିୟାଣାରେ ଆପ୍‌ର କୌଣସି ପ୍ରାର୍ଥୀ ନିର୍ବାଚନରେ ବିଜୟୀ ହୋଇପାରି ନାହାନ୍ତି । ସେପଟେ ଜମ୍ମୁକାଶ୍ମୀରରେ ପ୍ରଥମ ଥର ଆପ୍‌ ଖାତା ଖୋଲିଛି । 

ଡୋଡା ବିଧାନସଭା ଆସନରୁ ଆପ୍‌ର ପ୍ରାର୍ଥୀ ମେହରାଜ ମଲିକ୍‌ ବିଜୟ ହାସଲ କରିଛନ୍ତି । ମେହରାଜ ମଲିକ ବିଜେପି ପ୍ରାର୍ଥୀଙ୍କୁ ୪୫୪୮ ଭୋଟ ବ୍ୟବଧାନରେ ପରାସ୍ତ କରିଛନ୍ତି । ନିର୍ବାଚନ ଆୟୋଗଙ୍କ ଅନୁସାରେ, ମେହରାଜ ମଲିକଙ୍କୁ ୨୨୬୧୧ ଖଣ୍ଡ ଭୋଟ ମିଳିଥିବା ବେଳେ ବିଜେପି ପ୍ରାର୍ଥୀ ଗଜୟ ସିଂହ ରାଣାଙ୍କୁ ୧୮୦୬୩ ଖଣ୍ଡ ଭୋଟ ମିଳିଛି । 

डोडा से आम आदमी पार्टी के उम्मीदवार मेहराज मलिक द्वारा बीजेपी को हराकर शानदार जीत हासिल करने के लिए बहुत बहुत बधाई। आप बहुत अच्छा चुनाव लड़े।

पांचवें राज्य में MLA बनने पर पूरी आम आदमी पार्टी को बधाई।

— Arvind Kejriwal (@ArvindKejriwal) October 8, 2024

ଜମ୍ମୁକାଶ୍ମୀରେ ପ୍ରଥମ ଥର ଆପ୍‌ ପ୍ରାର୍ଥୀ ଦେଇଥିଲା । ପ୍ରଥମ ନିର୍ବାଚନରେ ଦଳକୁ ସଫଳତା ମିଳିଥିବାରୁ ଅରବିନ୍ଦ କେଜ୍ରିଓ୍ବାଲ ଖୁସି ହୋଇଯାଇଛନ୍ତି । ବିଜୟୀ ନେତାଙ୍କୁ ଶୁଭେଚ୍ଛା ଜଣାଇଛନ୍ତି ଆପ୍‌ର ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜ୍ରିଓ୍ବାଲ ।  ସେପଟେ ଜମ୍ମୁକାଶ୍ମୀରରେ ନ୍ୟାସନାଲ୍‌ କନଫରେନ୍ସ (ଏନସି)କୁ ପ୍ରଚଣ୍ଡ ବିଜୟ ମିଳିବାକୁ ଯାଉଛି । ଏନସି ୪୨ ସିଟ୍‌ରେ ଆଗୁଆ ରହିଥିବା ବେଳେ ୬ ସିଟ୍‌ରେ ଆଗୁଆ ରହିଛି କଂଗ୍ରେସ । ସେହିଭଳି ବିଜେପି ୨୯ଟି ସିଟ୍‌ରେ ଆଗୁଆ ରହିଛି ।