ନୂଆଦିଲ୍ଲୀ: ହରିୟାଣାରେ ହ୍ୟାଟ୍ରିକ୍ ବିଜୟ ହାସଲ କରିଥିବା ବିଜେପିକୁ ଜମ୍ମୁକାଶ୍ମୀରରେ ନିରାଶା ମିଳିଛି । ସେଠାରେ ନ୍ୟାସନାଲ୍ କନଫରେନ୍ସ ଏବଂ କଂଗ୍ରେସର ମେଣ୍ଟ ସରକାର ହେବାକୁ ଯାଉଛି । ଏହାରି ମଧ୍ୟରେ ଜମ୍ମୁକାଶ୍ମୀରର ବିଜେପି ମୁଖ୍ୟ ରବୀନ୍ଦ୍ର ରୈନା ନିଜ ଆସନ ରକ୍ଷା କରିପାରି ନାହାନ୍ତି । ସେ ନୌଶେରା ବିଧାନସଭା ଆସନରୁ ପରାସ୍ତ ହୋଇଛନ୍ତି । ନୌଶେରା ଆସନରେ ନ୍ୟାସନାଲ୍ କନଫରେନ୍ସର ସୁରିନ୍ଦର ଚୌଧୁରୀ ୭,୮୧୯ ଭୋଟ୍ ବ୍ୟବଧାନରେ ବିଜୟ ହାସଲ କରିଛନ୍ତି ।
ଏଥର ନିର୍ବାଚନରେ ରବୀନ୍ଦ୍ର ରୈନାଙ୍କ ଉପରେ ଖୁବ ବିଶ୍ବାସ କରିଥିଲା ବିଜେପି । ସେ ଦୀର୍ଘ ଦିନ ହେଲା ବିଜେପିକୁ ବିଜୟୀ କରିବା ଲାଗି କାମ ମଧ୍ୟ କରିଛନ୍ତି । ଶେଷରେ କିନ୍ତୁ ଜମ୍ମୁକାଶ୍ମୀରର ବିଜେପି ସଭାପତି ରବୀନ୍ଦ୍ର ରୈନା ପରାସ୍ତ ହୋଇଛନ୍ତି । ଭୋଟ ଗଣତି ମଧ୍ୟରେ ରବୀନ୍ଦ୍ର ରୈନା ଦାବି କରିଥିଲେ ଯେ, ବିଜେପି ବହୁମତ ହାସଲ କରିବ ଏବଂ ସ୍ବାଧୀନ ପ୍ରାର୍ଥୀଙ୍କୁ ସାଥିରେ ନେଇ ସରକାର କରିବ । କିନ୍ତୁ ବିଜେପି ବହୁମତରୁ ବହୁ ଦୂରରେ ଥିବା ବେଳେ ରବୀନ୍ଦ୍ର ରୈନା ଖୋଦ ପରାଜୟ ବରଣ କରିଛନ୍ତି ।
ସେପଟେ ମଙ୍ଗଳବାର ସକାଳ ୮ଟାରୁ ଜମ୍ମୁକାଶ୍ମୀରରେ ମତଗଣନା ଜାରି ରହିଛି । ୯୦ ଆସନ ବିଶିଷ୍ଟ ଜମ୍ମୁକାଶ୍ମୀରରେ ନ୍ୟାସନାଲ କନଫରେନ୍ସ (ଏନସି) ଏବଂ କଂଗ୍ରେସ ମେଣ୍ଟକୁ ବହୁମତ ମଳିଛି । ଆଉ ଏହା ସହ ଏନସି ନେତା ଏବଂ ପୂର୍ବତନ ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ପୁଣି ଥରେ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି । ଏନେଇ ତାଙ୍କ ପିତା ଏବଂ ଏନସି ମୁଖ୍ୟ ଫାରୁକ ଅବଦୁଲ୍ଲା ଘୋଷଣା କରିଛନ୍ତି ।
