ଖଜୁରୀପଡ଼ା, ୨।୪: ଆଧୁନିକତାର ସ୍ପର୍ଶରେ ଆଗକୁ ବଢୁଛି ଦେଶ । କିନ୍ତୁ ଏବେ ବି ଆଦିବାସୀ ଅଧ୍ୟୁଷିତ ଗାଁ ରହିଛି ଅନ୍ଧାରରେ। ଆଜି ବି ଏମିତି ଗାଁ ଅଛି ଯେଉଁଠି ବିଜୁଳି ଆଲୁଅ ପାଲଟିଛି ସାତ ସପନ । ଆଦିବାସୀଙ୍କୁ ଆଲୁଅ ଦେଖାଉଛି ଡିବିରି ଆଲୁଅ। କନ୍ଧମାଳ ଜିଲ୍ଲାରେ ଏଭଳି ଅନେକ ଗାଁ ଅଛି ଯେଉଁଠି ବିଜୁଳି ଆଲୁଅ ଦେଖିନାହାଁନ୍ତି ଗାଁ ଲୋକେ । ଏହି ସବୁ ଗାଁ ଦେଖିଲେ ରାଜୀବ ଗାନ୍ଧୀ ଜ୍ୟୋତି ଯୋଜନା,ବିଜୁ ଜ୍ୟୋତି ଯୋଜନା ଏବଂ ସୌଭାଗ୍ୟ ଜ୍ୟୋତି ଯୋଜନା ଉପରେ ଅନେକ ପ୍ରଶ୍ନବାଚୀ ସୃଷ୍ଟି କରୁଛି ।
ଖଜୁରୀପଡ଼ା ବ୍ଲକ ଅନ୍ତର୍ଗତ ସୁଡରେଜୁ ଗ୍ରାମ ପଞ୍ଚାୟତ ଅଧୀନରେ ରହିଛି ଗୋଦାବରୀ, ସ୍ରାମ୍ବି ପଡା, ଲଣ୍ଡୁ ଗୁଡ଼ା। ଏହି ଗ୍ରାମବାସୀ ବିଜୁଳି ଆଲୁଅ ଦେଖିନାହାନ୍ତି। ସେହିପରି ଵିଲା ବାଡ଼ି ପଞ୍ଚାୟତର ୪ ଗାଁରେ ବିଦ୍ୟୁତ ଆଲୁଅ ପହଞ୍ଚିପାରି ନାହିଁ। ସେହି ଗାଁ ଗୁଡିକ ହେଲା କିଲୁ ଗାଁ , ଖଲି ସାହି,ବିଶି ସାହି,ରୁଗୁଡ଼ି ସାହି, ଡଙ୍ଗି ଧର । ଏହି ଗାଁଗୁଡିକରେ ଶତାଧିକ ପରିବାର ବସବାସ କରୁଛନ୍ତି । କିନ୍ତୁ ଗ୍ରାମବାସୀ ସମସ୍ତ ପ୍ରକାର ମୌଳିକ ସୁବିଧାରୁ ବଞ୍ଚିତ ହୋଇଛନ୍ତି । ବିଦ୍ୟୁତ ଆଲୋକ ନ ଥିବାରୁ ଗ୍ରାମବାସୀ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଦିନବେଳେ ଏକ ପ୍ରକାରେ ଚଳିଯାଉଥିବା ବେଳେ ରାତି ହେଲେ ଅନ୍ଧାରରେ ସମୟ ବିତାଇବାକୁ ପଡ଼ୁଛି। ବର୍ଷେ କି ଦୁଇ ବର୍ଷ ନୁହେଁ, ସ୍ବାଧୀନତାର ପରଠୁ ଡିବିରି ଆଲୁଅରେ ଗ୍ରାମବାସୀଙ୍କ ରାତି କଟୁଛି।
ଦୀର୍ଘ ୭୬ ବର୍ଷ ଧରି ସେମାନେ ଦୟନୀୟ ଜୀବନ ବିତାଉଛନ୍ତି। ସଞ୍ଜ ନଇଁଲେ ଡିବିରି ଆଲୁଅ ଏମାନଙ୍କ ପାଇଁ ଏକମାତ୍ର ସାହା ଭରସା ପାଲଟିଛି। ପିଲାଙ୍କ ପାଠପଢ଼ାଠାରୁ ଆରମ୍ଭ କରି ରାତିର ସମସ୍ତ କାମ ପାଇଁ ଏହି ଡିବିରି ଆଲୁଅ ଭରସା । କିଛି ଲୋକଙ୍କୁ ୫ ବର୍ଷ ତଳେ ସୌର ଚାଳିତ ଲାଇଟ୍ ସଂଯୋଗ ଦିଆଯାଇଥିଲା । ତାହା ଏବେ ଖରାପ ହେଲାଣି । ସେଗୁଡ଼ିକର ମରାମତି କରାଯାଉ ନ ଥିବାରୁ ସେ ସବୁ ଅକାମୀ ହୋଇ କଳଙ୍କି ଲାଗି ଗଲାଣି।
କେବଳ ବିଦ୍ୟୁତ ସମସ୍ୟା ନୁହେଁ। ଏସବୁ ଗାଁକୁ ଭଲ ରାସ୍ତାଟିଏ ବି ନାହିଁ। ସେହିପରି ପାଇପ ପାଣି ଏମାନଙ୍କ ପାଇଁ ସାତ ସପନ ହୋଇଛି।ଲକ୍ଷାଧିକ ଟଙ୍କା ଖର୍ଚ୍ଚ କରି ସୋଲାର ପାଣି ଟାଙ୍କି ବସିଛି । ହେଲେ ଅକାମୀ ହୋଇ ରହିଛି । ଟୋପେ ପାଣି ପାଇ ଡହଳ ବିକଳ ହେଉଛନ୍ତି ଗାଁ ଲୋକେ। ନଦୀ ନାଳ, ଚୁଆଁ ପାଣି ଭରସାରେ ରହୁଛନ୍ତି । ପିଇବା ପାଣି ପାଇଁ ନଦୀ ନାଳ ଭରସା ଛି ।ଯାହା ଫଳରେ ଅପରିଷ୍କାର ପାଣି ଗ୍ରାମବାସୀ ବ୍ୟବହାର କରିବା ଦ୍ବାରା ଅନେକ ସମୟରେ ସେମାନଙ୍କ ସ୍ବାସ୍ଥ୍ୟ ଅବସ୍ଥା ଠିକ୍ ରହୁ ନାହିଁ।
ଶିକ୍ଷା କଥା ନ କହିବା ଭଲ । ଏହି ଗାଁ ଗୁଡିକରେ ସ୍କୁଲ,କିମ୍ବା ଅଙ୍ଗନୱାଡ଼ି ନାହିଁ ।ପାଠ ପଢି ବଡ ମଣିଷର ହେବାର ସ୍ବପ୍ନ ଭାଙ୍ଗି ଚୁରି ଚୁରମାର ହେଇ ଯାଉଛି କୋମଳମତି ଶିଶୁ ମାନଙ୍କର ।ଶିକ୍ଷାର ଆଲୋକରୁ ମଧ୍ୟ ବଞ୍ଚିତ ହେଉଛନ୍ତି ଗ୍ରାମବାସୀ। ଏନେଇ ସରପଞ୍ଚ , ବିଡ଼ିଓଙ୍କ ଠାରୁ ଆରମ୍ଭ କରି ଜିଲ୍ଲାପାଳଙ୍କ ପର୍ଯ୍ୟନ୍ତ ଅଭିଯୋଗ କରିଥିଲେ ସୁଧା ସୁଫଳ ମିଳି ନ ଥିବା କହିଛନ୍ତି ଗ୍ରାମବାସୀ।
ଏହି ପଞ୍ଚାୟତକୁ ବିକାଶର ଆଲୋକ ଦେଖାଇବା ପାଇଁ ତତ୍କାଳୀନ ସାଂସଦ ପ୍ରତ୍ୟୁଷା ରଜେଶ୍ୱରି ସିଂ ପୋଷ୍ୟ ପଞ୍ଚାୟତ ଭାବେ ଗ୍ରହଣ କରିଥିଲେ । ବିକାଶର ଆଲୋକ ପହଞ୍ଚିବାରେ ବିଫଳ ହୋଇଛି ।ଏସବୁ ଗାଁ ଗୁଡ଼ିକର ସମସ୍ୟା ଦେଖିଲେ ଏମିତି ଲାଗେ ସରକାରୀ ଯୋଜନା ସବୁ ବାଟ ବଣା ହେଉଛି ଏହି ପଞ୍ଚାୟତରେ । ଆଜି ପର୍ଯ୍ୟନ୍ତ ପଞ୍ଚାୟତ କାର୍ଯ୍ୟାଳୟକୁ ଯାଇ ପାରିଲା ନାହିଁ ପ୍ରଧାନ ମନ୍ତ୍ରୀ ସଡ଼କ ଯୋଜନା ।ଯେଉଁଠି ଗମନାଗମନ ସୁବିଧା ନାହିଁ ସେଇଠି କେମିତି ଶିକ୍ଷା,ସ୍ବାସ୍ଥ୍ୟ,ଯୋଜନା ପହଞ୍ଚୁଥିବ ତାହା ପ୍ରଶ୍ନବାଚୀ ସୃଷ୍ଟି କରିଛି । ଶେଷରେ ମୌଳିକ ସୁବିଧା ଯୋଗାଇ ଦେବା ପାଇଁ ଗ୍ରାମବାସୀ ବୁଧବାର କନ୍ଧମାଳ ଜିଲ୍ଲାପାଳଙ୍କ ଉଦ୍ଦେଶ୍ୟରେ ଏକ ଦରଖାସ୍ତ ପ୍ରଦାନ କରିଛନ୍ତି ।
