ଜି.ଉଦୟଗିରି,୩୦/୩: ଘୁମୁସର ଜଙ୍ଗଲରୁ କନ୍ଧମାଳ ମୁହାଁ ହୋଇଛନ୍ତି ୨୮ ଟିକିଆ ହାତୀପଲ। ସୁଜେଲି ଗ୍ରାମବାସୀଙ୍କ ସୂଚନା ପ୍ରକାରେ ଶନିବାର ମଧ୍ୟରାତ୍ରୀରେ ଜି.ଉଦୟଗିରି ବ୍ଲକ୍‌‌ ଅନ୍ତର୍ଗତ କଳିଙ୍ଗା ଗ୍ରାମ ପଞ୍ଚାୟତର ସୁଜେଲି ଗ୍ରାମ ନିକଟସ୍ଥ ଡାଗାରମୁଣ୍ଡାର କାଟିବାଜୁ ଅଞ୍ଚଳରେ ଏହି ହାତୀଙ୍କ ଚଳପ୍ରଚଳ ରହିଛି। ହାତୀଙ୍କ ପାଦ ଚିହ୍ନ, ମଳ ବିଭିନ୍ନ ଚାଷ ଜମିରେ ପଡ଼ିଥିବା ଦେଖିବାକୁ ମିଳିଛି । ହାତୀପଲ ବ୍ୟାପକ ଫସଲ କ୍ଷୟକ୍ଷତି କରିଛନ୍ତି । ରାମନାଥ ପ୍ରଧାନ, କରନ ସାହୁ, ସୁମନ୍ତ ପ୍ରଧାନ, ରୁନା ପ୍ରଧାନ, ରୋଦନା ପ୍ରଧାନ, ବକ୍ସି ପ୍ରଧାନଙ୍କ କହିବା ପ୍ରକାରେ ବିଳମ୍ବିତ ରାତିରେ ହାତୀପଲ ତାଙ୍କ ଚାଷ ଜମିରେ ପଶି ବ୍ୟାପକ ଫସଲ ନଷ୍ଟ କରିଛି । ଏହି ପଲରେ ୩ଟି ଦନ୍ତା ହାତୀ ୧୫ଟି ଶିଶୁ ଏବଂ ୧୦ଟି ବଡ଼ ହାତୀ ରହିଥିବା ଲୋକମାନେ କହୁଛନ୍ତି । ହାତୀ ଘଉଡେଇବାରୁ ହାତୀପଲ ଜଙ୍ଗଲ ମଧ୍ୟକୁ ପଳାଇଛନ୍ତି। ସନ୍ଧ୍ୟା ହେଲେ ପୁଣି ଫସଲ ମୁହାଁ ହେବେ ବୋଲି କୁହାଯାଉଛି। ଏ ନେଇ ଜଙ୍ଗଲ ବିଭାଗକୁ ସୂଚନା ଦେଲେ ସୁଦ୍ଧା କୌଣସି ପଦକ୍ଷେପ ନିଆଯାଇନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଏ ନେଇ ସହକାରୀ ବନ ସଂରକ୍ଷକ କାଜାଲ ନାୟକଙ୍କୁ ପଚାରିବାରୁ ସେ କହିଛନ୍ତି, ଏହି ହାତୀ ପଲ ଘୁମୁସର ଉତ୍ତର ବନଖଣ୍ଡ ଅଞ୍ଚଳରୁ ଆସିଥିଲେ । ଏବେ ଫେରି ଯାଇଛନ୍ତି । ଅପରପକ୍ଷରେ, ହାତୀପଲ ବର୍ତ୍ତମାନ ସୁଦ୍ଧା ଜଙ୍ଗଲରେ ଥିବା ଗ୍ରାମବାସୀ କହିଛନ୍ତି।