ଫିରିଙ୍ଗିଆ, ୨/୪ : କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକରେ ଗୁରୁବାର ତାଣ୍ଡବ ରଚିଛି କାଳବୈଶାଖୀ । ବିଭିନ୍ନ ସ୍ଥାନରେ ଗଛ ପଡ଼ି ରାସ୍ତା ଅବରୋଧ ହୋଇଛି। ପବନରେ ଘର ଛପର ଉଡିଯାଇଛି। କିଛି ସ୍ଥାନରେ ଗଛ ପଡ଼ି ଗାଡି ଭାଙ୍ଗିଯାଇଛି।
ଗୁରୁବାର ଅପରାହ୍ନ ୪ ଟାରୁ ପ୍ରବଳ ପବନ ବହିବା ସହ ଘଡ଼ଘଡ଼ି ସହ ବର୍ଷା ହୋଇଥିଲା l ପ୍ରାୟ ୨ ଘଣ୍ଟା ରୁ ଊର୍ଦ୍ଧ୍ବ ସମୟ ପର୍ଯ୍ୟନ୍ତ ବର୍ଷା ଲାଗି ରହିଥିଲା। ପ୍ରବଳ ବେଗରେ ପବନ ବହିବାରୁ ବହୁ କ୍ଷୟ କ୍ଷତି ହୋଇଥିବା ଦେଖିବାକୁ ମିଳିଛି। ଫିରିଙ୍ଗିଆ ବ୍ଲକର ଫିରିଙ୍ଗିଆ ଗୋଚ୍ଛାପଡା ମୁଖ୍ୟ ରାସ୍ତାର ମାଝୀ ପଡା ରାସ୍ତା, ବରେବାଟା ପୋଲ ନିକଟ ରାସ୍ତାରେ ଗଛ ପଡ଼ି ରାସ୍ତା ଅବରୋଧ ହୋଇଥିଲା। ଦମକଳ ବାହିନୀ ଦ୍ୱାରା ଗଛ କାଟି ରାସ୍ତା ସଫା କରିବା ପରେ ଯାତାୟତ ସ୍ୱାଭାବିକ ହୋଇଥିଲା ।
ସେହିଭଳି କାଶିନୀ ପଦର ପଞ୍ଚାୟତ ଉଆଦୁର୍ଗା ଗାଁ ମୁଖ୍ୟ ରାସ୍ତାରେ ଏକ ବିରାଟକାୟ ମହା ଲିମ୍ବ ଗଛ କାଳ ବୈଶାଖୀରେ ଭାଙ୍ଗି ଯିବାରୁ ତଳେ ଥିବା ଏକ ବାଇକ ଭାଙ୍ଗି ସମ୍ପୂର୍ଣ୍ଣ ନଷ୍ଟ ହୋଇଛି l ଗଛ ନିକଟରେ ଦଣ୍ଡ ନାଚ ଚାଲିଥିବା ବେଳେ ଶତାଧିକ ଲୋକେ ଦଣ୍ଡ ନାଚ ଦେଖୁଥିଲେ । କିନ୍ତୁ ବର୍ଷା ହେବାରୁ ଗଛ ତଳୁ ବାଇକ ନେଇଁ ସମସ୍ତେ ଚାଲି ଯାଇଥିବାରୁ ବହୁ ଧନ ଜୀବନ କ୍ଷୟ କ୍ଷତିରୁ ଲୋକେ ବଞ୍ଚି ଯାଇଛନ୍ତି l ସେହିଭଳି ଗୋଚ୍ଛାପଡାର ସନ୍ୟାସୀ ଦିଗାଲ, ଦୁଣ୍ଡେରା ଦିଗାଲର ଘର ବର୍ଷାରେ ଚାଳ ଛପର ଉଡି ଯାଇଥିବା ବେଳେ ତଣ୍ଡ୍ରି ଗାଁରେ ମଧ୍ୟ ବହୁ ଘର ଭାଙ୍ଗିବା ସହ ଗଛ ପଡ଼ିଥିବା ଦେଖିବାକୁ ମିଳିଛି l ଫିରିଙ୍ଗିଆ ବ୍ଲକର ଅଧିକାଂଶ ଗାଁରେ ଘର ଭାଙ୍ଗିଥିବା ବେଳେ ଫିରିଙ୍ଗିଆ ବ୍ଲକରେ ବିଭିନ୍ନ ଜାଗାରେ ବିଦ୍ୟୁତ ତାର ଛିଣ୍ଡି ଥିବା ବେଳେ ବିଦ୍ୟୁତ ଖୁଣ୍ଟ ମଧ୍ୟ ଉପୁଡି ପଡିଛି । ଯାହାଦ୍ୱାରା ବିଦ୍ୟୁତ ସରବରାହ ସମ୍ପୂର୍ଣ୍ଣ ବନ୍ଦ ରହିଛି l ଅଗ୍ନିଶମ ବାହିନୀ ରାସ୍ତାରେ ପଡ଼ିଥିବା ଗଛ କାଟି ଯାତାୟତ ସ୍ୱାଭାବିକ କରିବାକୁ ଲାଗି ପଡ଼ିଥିବା ଦେଖିବାକୁ ମିଳିଛି l
