ନୂଆଦିଲ୍ଲୀ, ୩/୪ : ମହିଳାଙ୍କ ପାଇଁ ଦେବଦୂତ୍ତ ସାଜିଲେ ଯବାନ । ଟ୍ରେନରୁ ଖସି ପଡ଼ିବାବେଳେ ମହିଳାଙ୍କୁ ଉଦ୍ଧାର କଲେ ଆରପିଏଫ ଯବାନ । ଏଭଳି ଏକ ଦୃଶ୍ୟ ନଜରକୁ ଆସିଛି ୟୁପିର ଚନ୍ଦୌଲୀରୁ । ଭିଡ଼ିଓରେ ଦେଖାଯାଉଛି କି ଆରପିଏଫ ଯବାନ ଶିବ କୁମାର ଶର୍ମା ପ୍ଲାଟଫର୍ମରେ ଯାଉଥିଲେ । ଏହି ସମୟରେ ତାଙ୍କ ନଜର ଜନୈକ ମହିଳାଙ୍କ ଉପରେ ପଡ଼ିଥିଲା । ଯେଉଁ ମହିଳା ଚଳନ୍ତା ଟ୍ରେନରୁ ଓହ୍ଲାଉଥିଲେ । ଏହାପରେ ସେ ଦୃତଗତିରେ ମହିଳାଙ୍କ ପାଖରେ ପହଞ୍ଚିଥିଲେ ଏବଂ ତାଙ୍କୁ ଟ୍ରେନ ତଳକୁ ଖସିପଡ଼ିବାରୁ ବଞ୍ଚାଇଥିଲେ । ଭିଡ଼ିଓରେ ସ୍ପଷ୍ଟ ଭାବେ ଏହି ଚିତ୍ର ସାମ୍ନାକୁ ଆସିଛି ।
ସୂଚନା ଅନୁସାରେ, ଏହି ଘଟଣା ୟୁପିର ଜନପଦ ଚନ୍ଦୌଲୀର ଅଟେ । ଯେଉଁଠାରେ ଜୋଗବନୀରୁ ଆନନ୍ଦବିହାର ଯାଉଥିବା ୧୨୪୮୭ ଜୋଗବନୀ-ଆନନ୍ଦ ବିହାର ଏକ୍ସପ୍ରେସ ଟ୍ରେନ ବୁଧବାର ଡିଡିୟୁ ଜଙ୍କଶନରୁ ପ୍ଲାଟଫର୍ମ ନମ୍ବର ୬ରେ ଅଟକିଥିଲା । ସ୍ଲିପର କୋଚରେ ୪୦ବର୍ଷୀୟ ଜଣେ ମହିଳା ଯାତ୍ରୀ ନିର୍ମଳା ଦେବୀ ଚଢିଥିଲେ । ତାଙ୍କୁ ଅକବରପୁର ଯିବାର ଥିଲା କିନ୍ତୁ ସେ ଭୁଲରେ ଏହି ଟ୍ରେନରେ ଚଢି ଯାଇଥିଲେ ।
ଯେତେବେଳେ ସେ ନିଜ ଭୁଲ୍ ବୁଝିପାରିଥିଲେ ସେତେବେଳେ ଟ୍ରେନ୍ ଛାଡ଼ି ଦେଇଥିଲା ଏବଂ ଧିରେ ଧିରେ ଦ୍ରୁତ ହେବାକୁ ଲାଗିଥିଲା । ଏହାପରେ ବି ମହିଳା ଜଣଙ୍କ ଚଳନ୍ତା ଟ୍ରେନରୁ ଓହ୍ଲାଇବାକୁ ପ୍ରୟାସ କରିଥିଲେ । ଟ୍ରେନର ସ୍ପିଡ ଅଧିକ ହେବା କାରଣରୁ ମହିଳା ଯାତ୍ରୀ ଜଣଙ୍କ ତଳେ ପଡ଼ିଯାଇଥିଲେ ଏବଂ ପ୍ଲାଟଫର୍ମ ଓ ଟ୍ରେନ ମଧ୍ୟରେ ଥିବା ଫାଙ୍କରେ ଆସିଯାଇଥିଲେ । ଫଳରେ ମହିଳା ଯାତ୍ରୀଙ୍କୁ ଆଘାତ ଲାଗିଥିଲା । ଏହା ଦେଖି ପ୍ଲାଟଫର୍ମରେ ଡ୍ୟୁଟିରେ ଉପସ୍ଥିତ ଥିବା ଆରପିଏଫ ଯବାନ ଶିବ କୁମାର ଶର୍ମା ଉକ୍ତ ମହିଳାଙ୍କୁ ସେଠାରୁ ଉଦ୍ଧାର କରିଥିଲେ ।
