ନୂଆଦିଲ୍ଲୀ,୦୪/୦୪: ସଂସଦର ବଜେଟ୍ ଅଧିବେଶନ ଶେଷ ହୋଇଛି । ଶୁକ୍ରବାର ଲୋକସଭାରେ ବିରୋଧୀ ଓ ଶାସକଙ୍କ ହୋ ହାଲ୍ଲା ମଧ୍ୟରେ ସଂସଦର ବଜେଟ୍ ଅଧିବେଶନ ସମାପ୍ତ ହୋଇଛି । ଉଭୟ ଗୃହ ମୁଲତବୀ ଘୋଷଣା ହୋଇଛି । ବିରୋଧ ଭିତରେ ଅଧିବେଶନରେ ବହୁ ଚର୍ଚ୍ଚିତ ୱାକଫ୍ ବିଲ୍ ପାସ୍ ହୋଇଛି । ଏହା ସହିତ ଅନେକ ଗୁରୁତ୍ୱପୂର୍ଣ୍ଣ ବିଲ୍ ମଧ୍ୟ ପାରିତ ହୋଇଛି । ମୋଟ୍ ୧୬ଟି ବିଧେୟକ ପାରିତ ହୋଇଥିବା ଲୋକସଭା ବାଚସ୍ପତି ଓମ୍ ବିର୍ଲା ସୂଚନା ଦେଇଛନ୍ତି ।
ଆଜି ଲୋକସଭା କାର୍ଯ୍ୟକାଳ ଆରମ୍ଭ ହେବା କ୍ଷଣି ଶାସକ ଓ ବିରୋଧୀ ମୁହାଁମୁହିଁ ହୋଇଥିଲେ । ଜୋରଦାର ହଙ୍ଗାମା କରିଥିଲେ । ଗୃହ କାର୍ଯ୍ୟ ଆରମ୍ଭ ହେବା କ୍ଷଣି କଂଗ୍ରେସ ସମେତ ବିରୋଧୀ ଦଳର କିଛି ସଦସ୍ୟ ନିଜ ସ୍ଥାନରୁ ଉଠି ନାରାବାଜି ଦେଇଥିଲେ । କିଛି ସଦସ୍ୟ ଗୃହ ମଧ୍ୟଭାଗକୁ ଚାଲି ଆସିଥିଲେ । ଅନ୍ୟପଟେ ଶାସକ ଦଳର ନିଶିକାନ୍ତ ଦୁବେଙ୍କ ସମେତ ଅନ୍ୟ ସଦସ୍ୟ ନିଜ ସ୍ଥାନରୁ ଉଠି ସୋନିଆ ଗାନ୍ଧୀ କ୍ଷମା ମାଗନ୍ତୁ ବୋଲି ଦାବି କରିଥିଲେ । ଅଧ୍ୟକ୍ଷ ଓମ୍ ବିର୍ଲା ପ୍ରଶ୍ନକାଳ ଚଳାଇବାକୁ ପ୍ରୟାସ କରିଥିଲେ ମାତ୍ର ସମ୍ଭବ ହୋଇପାରିନଥିଲା । ଦୁଇପକ୍ଷ ନାରାବାଜି ଦେଇଥିଲେ । ସଦସ୍ୟଙ୍କୁ ଶାନ୍ତ ରହିବାକୁ ଅଧ୍ୟକ୍ଷ କହିଥିଲେ ମାତ୍ର କେହି କର୍ଣ୍ଣପାତ କରିନଥିଲେ । ଫଳରେ ଗୃହକୁ ଅନିଶ୍ଚିତକାଳ ପାଇଁ ସ୍ଥଗିତ ଘୋଷଣା କରାଯାଇଥିଲା ।
୧୬ ବିଲ୍ ପାରିତ- ଗୃହ ମୁଲତବୀ ଘୋଷଣା କରି ବାଚସ୍ପତି କହିଛନ୍ତି, ଅଧିବେଶନରେ ମୋଟ୍ ୨୬ ବୈଠକ ହୋଇଛି । ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଚର୍ଚ୍ଚାରେ ୧୭୩ ସଦସ୍ୟ ଅଂଶଗ୍ରହଣ କରିଥିଲେ । କେନ୍ଦ୍ର ବଜେଟ୍ ଉପରେ ୧୬୯ ସଦସ୍ୟ ଭାଗ ନେଇଥିଲେ । ଅଧିବେଶନରେ ୧୦ ସରକାରୀ ବିଧେୟକ ପୁନଃସ୍ଥାପିତ କରାଯାଇଛି । ୱାକଫ୍ ସଂଶୋଧନ ବିଧେୟକ ୨୦୨୫ ସମେତ ୧୬ ବିଲ୍ ପାରିତ ହୋଇଛି । ୧୧୮ ପ୍ରତିଶତ ସଫଳତାପୂର୍ବକ ଆଲୋଚନା ହୋଇଛି ।
ଅଧିକ ପଢ଼ନ୍ତୁ...ରାଜ୍ୟସଭାରେ ପାରିତ ୱାକଫ୍ ସଂଶୋଧନ ବିଲ୍, ସପକ୍ଷରେ ପଡ଼ିଲା ୧୨୮ ଭୋଟ୍
ବିରୋଧ ଭିତରେ ୱାକଫ୍ ବିଲ୍ ପାସ୍- ବିରୋଧୀଙ୍କ ବିରୋଧ ଭିତରେ ସଂସଦରେ ଗୃହୀତ ହୋଇଛି ବହୁ ଚର୍ଚ୍ଚିତ ୱାକଫ୍ ସଂଶୋଧନ ବିଲ୍ । ଲୋକସଭା ପରେ ଶୁକ୍ରବାର ରାଜ୍ୟସଭାରେ ପାସ୍ ହୋଇଛି ୱାକଫ୍ ବିଲ୍ । ଲୋକସଭାରେ ବିଲ୍ ସପକ୍ଷରେ ୨୮୮ ଭୋଟ୍ ପଡ଼ିଥିଲା । ବିରୋଧରେ ୨୩୨ ଭୋଟ୍ ମିଳିଥିଲା । ସେହିପରି ରାଜ୍ୟସଭାରେ ୧୨ ଘଣ୍ଟା ଧରି ଚର୍ଚ୍ଚା ପରେ ଗୁରୁବାର ବିଳମ୍ବିତ ରାତିରେ ବିଲ୍ ପାରିତ ହୋଇଛି । ରାଜ୍ୟସଭାରେ ୧୨୮ ଭୋଟ ସପକ୍ଷରେ ପଡ଼ିଥିଲା । ୯୫ ଭୋଟ୍ ବିଲ୍ ବିପକ୍ଷରେ ପଡ଼ିଥିଲା । ଆଇନରେ ପରିଣତ ହେବାକୁ ଗୋଟିଏ ପାଦ ଦୂରରେ ଅଛି ବିଲ୍ । ରାଷ୍ଟ୍ରପତିଙ୍କ ମୋହର ପରେ ଏହା ଆଇନରେ ପରିଣତ ହେବ ।
