ନୂଆଦିଲ୍ଲୀ: ତାମିଲନାଡୁ ବିଜେପିରେ ଭୂକମ୍ପ। ବିଜେପିର ରାଜ୍ୟ ଅଧ୍ୟକ୍ଷ କେ. ଆନ୍ନାମଲାଇ ଆଉ ରାଜ୍ୟ ବିଜେପି ଅଧ୍ୟକ୍ଷ ପଦ ପାଇଁ ପ୍ରାର୍ଥୀ ହେବେ ନାହିଁ ବୋଲି ଶୁକ୍ରବାର ଘୋଷଣା କରିଛନ୍ତି। କୋଇମ୍ବାଟୋରରେ ଗଣମାଧ୍ୟମକୁ ସାକ୍ଷାତକାର ଦେଇ ସେ କହିଛନ୍ତି, "ମୁଁ ଆଉ ଅଧ୍ୟକ୍ଷ ପଦ ଦୌଡ଼ରେ ନାହିଁ। ବିଜେପିରେ ଆମେ ମିଳିମିଶି ଏକ ନେତା ଚୟନ କରିବୁ, କିନ୍ତୁ ମୁଁ ଅଧ୍ୟକ୍ଷ ପଦ ପାଇଁ ପ୍ରତିଦ୍ୱନ୍ଦିତା କରିବି ନାହିଁ।"
ଆନ୍ନାମଲାଇ ଏହି ନିଷ୍ପତ୍ତି ଘୋଷଣା କରିବା ପରେ ତାମିଲନାଡୁ ରାଜ୍ୟ ବିଜେପିରେ ହଟ୍ଟଚମଟ୍ଟ ସୃଷ୍ଟି ହୋଇଛି। ଗୋଟିଏପଟେ ବିଜେପି ଓ ଏଆଇଏଡିଏମକେ ମଧ୍ୟରେ ମେଣ୍ଟ ଆଲୋଚନା ଜୋର ଧରିଥିବା ବେଳେ ଅନ୍ୟପଟେ ଦଳରେ ଆନ୍ତଃକନ୍ଦଳ ବୃଦ୍ଧି ପାଇଛି ବୋଲି ଅନୁମାନ କରାଯାଉଛି। ୨୦୨୬ ବିଧାନସଭା ନିର୍ବାଚନ ପୂର୍ବରୁ ଏହି ମେଣ୍ଟକୁ ସଫଳ କରିବା ପାଇଁ ବିଜେପିର କେନ୍ଦ୍ରୀୟ ନେତୃତ୍ୱ ଉଦ୍ୟମ ଜାରି ରଖିଛି। ଅନ୍ନାମଲାଇ କହିଛନ୍ତି, "ମୁଁ ଦଳର ଏକ ଉଜ୍ଜ୍ୱଳ ଭବିଷ୍ୟତର କାମନା କରୁଛି। ମୋ ଇଚ୍ଛା ଦଳର ଉନ୍ନତି ହେଉ ଓ ଏଥିପାଇଁ ମୁଁ ସବୁବେଳେ ପ୍ରର୍ଥନା କରୁଛି।"
ଏହା ପୂର୍ବରୁ ଅନ୍ନାମଲାଇଙ୍କ ନେତୃତ୍ୱରେ ତାମିଲନାଡୁ ବିଜେପି ରାଜ୍ୟରେ ନିଜର ଉପସ୍ଥିତିକୁ ଶକ୍ତିଶାଳୀ କରିବାରେ ସଫଳ ହୋଇଥିଲା। ତେବେ ଏଆଇଏଡିଏମକେ ସହିତ ମେଣ୍ଟ ଆଲୋଚନା ଏବଂ ରାଜ୍ୟରେ ଜାତିଗତ ରାଜନୀତିକୁ ଦୃଷ୍ଟିରେ ରଖି ବିଜେପି ନେତୃତ୍ୱରେ ପରିବର୍ତ୍ତନ ଆଣିବା ପାଇଁ ଚିନ୍ତା କରୁଥିବା ଚର୍ଚ୍ଚା ହେଉଛି। ୨୦୨୩ ସେପ୍ଟେମ୍ବରରେ ଏଆଇଏଡିଏମକେ ବିଜେପି ସହିତ ସମ୍ପର୍କ ଛିନ୍ନ କରିଥିଲା, ଯେଉଁଥିରେ ଅନ୍ନାମଲାଇଙ୍କ ବିବାଦୀୟ ମନ୍ତବ୍ୟକୁ ମୁଖ୍ୟ କାରଣ ଭାବେ ଦର୍ଶାଯାଇଥିଲା।
ଏବେ ଅନ୍ନାମଲାଇଙ୍କ ଏହି ନିଷ୍ପତ୍ତି ପରେ ତାମିଲନାଡୁ ବିଜେପିର ପରବର୍ତ୍ତୀ ଅଧ୍ୟକ୍ଷ କିଏ ହେବେ, ତାହା ଉପରେ ସମସ୍ତଙ୍କ ନଜର ରହିଛି। ଏହା ସହିତ ବିଜେପି ଏବଂ ଏଆଇଏଡିଏମକେ ମଧ୍ୟରେ ମେଣ୍ଟ ସଫଳ ହେଲେ ରାଜ୍ୟର ରାଜନୈତିକ ସମୀକରଣରେ କିପରି ପରିବର୍ତ୍ତନ ଆସିବ, ତାହା ଦେଖିବାକୁ ବାକି ରହିଲା।
