ନୂଆଦିଲ୍ଲୀ: ଥାଇଲାଣ୍ଡ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ବାଂଲାଦେଶ ଅନ୍ତରୀଣ ସରକାରର ମୁଖ୍ୟ ମହମ୍ମଦ ୟୁନୁସଙ୍କ ସହ ଏକ ବୈଠକ କରିଛନ୍ତି। ଥାଇଲାଣ୍ଡର ବ୍ୟାଙ୍କକଠାରେ ଅନୁଷ୍ଠିତ ବିମ୍ସଟେକ (BIMSTEC) ଶିଖର ସମ୍ମିଳନୀର ଯୋଗ ଦେବା ପାଇଁ ଦକ୍ଷିଣ ଏସିଆର ବିଭିନ୍ନ ଦେଶର ନେତାମାନେ ବର୍ତ୍ତମାନ ଥାଇଲାଣ୍ଡ ଗସ୍ତରେ ରହିଛନ୍ତି। ତେବେ ଏହି ବୈଠକରେ ପିଏମ ମୋଦି ଦୁଇ ଦେଶ ମଧ୍ୟରେ ସମ୍ପର୍କକୁ ସୁଦୃଢ় କରିବା ଏବଂ ବାଂଲାଦେଶର ହିନ୍ଦୁମାନଙ୍କ ସୁରକ୍ଷା ଉପରେ ଆଲୋଚନା କରିଥିଲେ। 

ମହମ୍ମଦ ୟୁନୁସ ନିକଟରେ ଚୀନ ଗସ୍ତ ସମୟରେ ଭାରତର ଉତ୍ତର-ପୂର୍ବାଞ୍ଚଳକୁ ଲ୍ୟାଣ୍ଡଲକ ଅଞ୍ଚଳ ବୋଲି ବର୍ଣ୍ଣନା କରି ଏହାର ଭୌଗୋଳିକ ସ୍ଥିତିକୁ ନେଇ ବିବାଦିୟ ମନ୍ତବ୍ୟ ଦେଇଥିଲେ। ସେ ଚୀନକୁ ବାଂଲାଦେଶ ମାଧ୍ୟମରେ ଏହି ଅଞ୍ଚଳରେ ଅର୍ଥନୈତିକ ପ୍ରଭାବ ବୃଦ୍ଧି କରିବାକୁ ଆହ୍ବାନ ଦେଇଥିଲେ। ଯାହାକୁ ନେଇ ଭାରତରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଭାରତୀୟ ଅଧିକାରୀମାନେ, ବିଶେଷକରି ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଏହି ମନ୍ତବ୍ୟକୁ "ଆପତ୍ତିଜନକ" ଏବଂ "ଅଗ୍ରହଣୀୟ" ବୋଲି କହି ଏହାର କଡା ନିନ୍ଦା କରିଥିଲେ।

ବୈଠକ ସମୟରେ ପ୍ରଧାନମନ୍ତ୍ରୀ ମୋଦି ୟୁନୁସଙ୍କୁ ସ୍ପଷ୍ଟ ଭାବେ କହିଥିଲେ ଯେ, "ଯେକୌଣସି ବୟାନ ଯାହା ପରିବେଶକୁ ବିଗାଡ଼ିଥାଏ, ତାହାକୁ ଏଡ଼ାଇ ଦିଆଯିବା ଉଚିତ୍।" ବୈଦେଶିକ ସଚିବ ବିକ୍ରମ ମିଶ୍ରୀଙ୍କ ଅନୁଯାୟୀ, ମୋଦି ଏହି ବୈଠକରେ ଭାରତ ଓ ବାଂଲାଦେଶ ମଧ୍ୟରେ ସକାରାତ୍ମକ ସମ୍ପର୍କ ଗଢ଼ିବାର ଆବଶ୍ୟକତା ଉପରେ ଗୁରୁତ୍ୱ ଦେଇଥିଲେ। ସେ କହିଥିଲେ, "ପ୍ରଧାନମନ୍ତ୍ରୀ ଏକ ଗଣତାନ୍ତ୍ରିକ, ସ୍ଥିର, ଶାନ୍ତିପୂର୍ଣ୍ଣ, ପ୍ରଗତିଶୀଳ ଏବଂ ସମାବେଶୀ ବାଂଲାଦେଶକୁ ଭାରତର ସମ୍ପୂର୍ଣ୍ଣ ସମର୍ଥନ ରହିଛି ବୋଲି କହିଥିଲେ।"

ଏହି ବୈଠକରେ ସୀମା ସୁରକ୍ଷା ଏକ ପ୍ରମୁଖ ବିଷୟ ଥିଲା। ମୋଦି ଅବୈଧ ସୀମା ଅତିକ୍ରମଣ ରୋକିବା ପାଇଁ କଡ଼ା ଆଇନ କାର୍ଯ୍ୟକାରୀ କରିବାର ଆବଶ୍ୟକତା ଉପରେ ଜୋର ଦେଇଥିଲେ। ଏହା ସହିତ ବାଂଲାଦେଶରେ ହିନ୍ଦୁ ଏବଂ ଅନ୍ୟ ଅଳ୍ପସଂଖ୍ୟକ ସମ୍ପ୍ରଦାୟର ସୁରକ୍ଷା ପ୍ରସଙ୍ଗ ମଧ୍ୟ ଉଠିଥିଲା। ଶେଖ ହସିନାଙ୍କ ସରକାରର ପତନ ପରେ ବାଂଲାଦେଶରେ ଅଳ୍ପସଂଖ୍ୟକଙ୍କ ଉପରେ ହିଂସା ବୃଦ୍ଧି ପାଇଥିବା ନେଇ ଭାରତ ଚିନ୍ତା ପ୍ରକାଶ କରିଛି।

ଏହି ଭେଟଘାଟ ଶେଖ ହସିନାଙ୍କ ସରକାରର ଅଗଷ୍ଟ ୨୦୨୪ରେ ପତନ ପରେ ଦୁଇ ଦେଶର ନେତାଙ୍କ ମଧ୍ୟରେ ପ୍ରଥମ ସାକ୍ଷାତ ଥିଲା। ତେବେ ଉଭୟ ନେତା ହାତ ମିଳାଇ ଏକ ସୌହାର୍ଦ୍ଦ୍ୟପୂର୍ଣ୍ଣ ପରିବେଶ ସୃଷ୍ଟି କରିବାକୁ ଚେଷ୍ଟା କରିଥିବା ଦେଖାଯାଇଥିଲା। ୟୁନୁସ ମୋଦିଙ୍କୁ ୨୦୧୫ ମସିହାରେ ମୁମ୍ବାଇରେ ଅନୁଷ୍ଠିତ ୧୦୨ତମ ଭାରତୀୟ ବିଜ୍ଞାନ କଂଗ୍ରେସରେ ସ୍ୱର୍ଣ୍ଣ ପଦକ ପ୍ରଦାନ ସମୟର ଏକ ଫଟୋଚିତ୍ର ଉପହାର ଦେଇଥିଲେ, ଯାହା ସୌହାର୍ଦ୍ଦ୍ୟର ପ୍ରତୀକ ସ୍ୱରୂପ ଥିଲା।

ମୋଦି ଏବଂ ୟୁନୁସଙ୍କ ମଧ୍ୟରେ ଏହି ବୈଠକ ଦୁଇ ଦେଶ ମଧ୍ୟରେ ଚାଲିଆସୁଥିବା ଉତ୍ତେଜନାକୁ ହ୍ରାସ କରି ସହଯୋଗର ନୂଆ ଅଧ୍ୟାୟ ଆରମ୍ଭ କରିବାର ଏକ ପ୍ରୟାସ ବୋଲି ବିଶ୍ଳେଷକମାନେ ମତ ଦେଇଛନ୍ତି। ଭାରତ ଏକ ଶାନ୍ତିପୂର୍ଣ୍ଣ ଓ ସ୍ଥିର ବାଂଲାଦେଶ ପାଇଁ ନିଜର ପ୍ରତିବଦ୍ଧତାକୁ ପୁନର୍ବାର ଦୋହରାଇଛି। ଯାହା ଆଗାମୀ ଦିନରେ ଦୁଇ ଦେଶର ସମ୍ପର୍କରେ ସକାରାତ୍ମକ ପ୍ରଭାବ ପକାଇବ ବୋଲି ଆଶା କରାଯାଉଛି।