ନୂଆଦିଲ୍ଲୀ: ଭୁଟାନ ପ୍ରଧାନମନ୍ତ୍ରୀ ଶେରିଙ୍ଗ୍ ଟୋବଗେ ଭାରତ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ତାଙ୍କର ସମ୍ପର୍କ ଉପରେ ଏକ ବିବୃତ୍ତି ଦେଇଛନ୍ତି। ଏହି ସମୟରେ ପ୍ରଧାନମନ୍ତ୍ରୀ ମୋଦିଙ୍କୁ ତାଙ୍କର ବଡ଼ ଭାଇ ଏବଂ ଗୁରୁ ଭାବରେ ସେ ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ, ଭାରତର ସାହାଯ୍ୟ ଏବଂ ମାର୍ଗଦର୍ଶନ ଭୁଟାନର ବିକାଶକୁ ନୂତନ ଶିଖରରେ ପହଞ୍ଚାଇଛି।
ସେ ଆହୁରି ମଧ୍ୟ କହିଛନ୍ତି ଯେ, ଭୁଟାନର ତ୍ରୟୋଦଶ ପଞ୍ଚବାର୍ଷିକ ଯୋଜନା, ଯାହା ଜୁଲାଇ ୨୦୨୪ ରେ ଆରମ୍ଭ ହୋଇଥିଲା, ତାହା ଭାରତର ଉଦାର ସହାୟତାରେ ସମ୍ଭବ ହେଉଛି। ଏଥିରେ ଭାରତରୁ ୮୫୦୦ କୋଟି ଟଙ୍କାର ସହାୟତା ମିଳିଛି, ଯେତେବେଳେକି ଭୁଟାନର ଅର୍ଥନୈତିକ ସଂସ୍କାର ଯୋଜନା ପାଇଁ ୧୫ ଶହ କୋଟି ଟଙ୍କାର ଅତିରିକ୍ତ ସହାୟତା ମଧ୍ୟ ଦିଆଯାଇଛି। ସେ କହିଛନ୍ତି କି, ଆମେ ଭାରତରୁ ମୋଟ ୧୦ ହଜାର କୋଟି ଟଙ୍କାର ସହାୟତା ପାଇଛୁ, ଯାହା ପାଇଁ ଆମେ ଅତ୍ୟନ୍ତ କୃତଜ୍ଞ।
ବିମଷ୍ଟେକ ସମ୍ମିଳନୀ ବିଷୟରେ ଭାଷଣ ଦେଇ ସେ କହିଛନ୍ତି ଯେ, ଏହି ସଂଗଠନରେ ଭାରତର ନେତୃତ୍ୱ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।'ପ୍ରଧାନମନ୍ତ୍ରୀ ମୋଦୀ ଏହି କ୍ଷେତ୍ରର ସବୁଠାରୁ ବଡ଼ ନେତା, ଏବଂ ବିମଷ୍ଟେକର ସମ୍ଭାବନାକୁ ସାକାର କରିବାରେ ତାଙ୍କର ଭୂମିକା ବିଶେଷ ରହିଛି ।' ଟୋବଗେ କହିଛନ୍ତି ଯେ ସେ ଲେକ୍ସ ଫ୍ରାଇଡମ୍ୟାନଙ୍କ ସହ ପ୍ରଧାନମନ୍ତ୍ରୀ ମୋଦିଙ୍କ ପଡକାଷ୍ଟ ହିନ୍ଦୀ ଏବଂ ଇଂରାଜୀ ଉଭୟ ଭାଷାରେ ଶୁଣିଛନ୍ତି। ସେ କହିଛନ୍ତି କି, "ମୁଁ ହିନ୍ଦୀ କମ୍ ବୁଝେ, କିନ୍ତୁ ତଥାପି ମୁଁ ମୂଳ ଭାଷାରେ ଶୁଣିବାକୁ ଚାହୁଁଥିଲି। ମୋତେ ଏପରି ଲାଗିଲା ଯେପରି ମୁଁ ଜଣେ ଆଧ୍ୟାତ୍ମିକ ଗୁରୁଙ୍କୁ ଶୁଣୁଛି। ଅଭିଜ୍ଞତା ବହୁତ ସନ୍ତୋଷଜନକ ଥିଲା।"
