ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶନିବାର ଦିନ ଭେନେଜୁଏଲାରୁ ପ୍ରତ୍ୟାବର୍ତ୍ତନ କରୁଥିବା ଛଅ ଜଣ ଆମେରିକୀୟ କଏଦୀଙ୍କୁ ସ୍ୱାଗତ କରିଛନ୍ତି। ସେ କହିଛନ୍ତି ଉଭୟଦେଶ ମଧ୍ୟରେ ଏକ ନୂତନ ଚୁକ୍ତି ସ୍ୱାକ୍ଷରିତ ହୋଇଛି। ଯାହା ଆଧାରରେ ଆମେରିକାରେ ଅବୈଧ ଭାବରେ ପ୍ରବେଶ କରିଥିବା ଭେନେଜୁଏଲାର ଗ୍ୟାଙ୍ଗ ସଦସ୍ୟଙ୍କ ସମେତ ଏହାର ନାଗରିକମାନଙ୍କୁ ତାଙ୍କ ଦେଶକୁ ଫେରାଇ ନିଆଯିବ। ଅନ୍ୟପକ୍ଷେ ଭେନେଜୁଏଲାରେ ବନ୍ଦୀ ଥିବା ବିଭିନ୍ନ ଆମେରିକୀୟ ନାଗରିକମାନଙ୍କୁ ଫେରାଇ ଅଣାଯିବ। ସୋଶିଆଲ ମିଡିଆରେ ଟ୍ରମ୍ପ କହିଛନ୍ତି ଯେ ତାଙ୍କ ଶାସନ କାଳରେ ସୀମା ସୁରକ୍ଷା ସବୁଠୁ ଅଧିକ ମଜବୁତ ହୋଇଛି ଏବଂ ଆମେରିକାରୁ ରେକର୍ଡ ସଂଖ୍ୟକ ଅବୈଧ ପ୍ରବାସୀ ଏବଂ ଅପରାଧୀଙ୍କୁ ନିର୍ବାସିତ କରାଯାଉଛି।
ରାଷ୍ଟ୍ରପତି ଟ୍ରମ୍ପ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲରେ ଏକ ପୋଷ୍ଟ କରି କହିଛନ୍ତି ଯେ ଭେନେଜୁଏଲାରେ ଥିବା ଆମେରିକୀୟ ବନ୍ଧକମାନଙ୍କୁ ଫେରାଇ ଆଣିବା ଏକ ଭଲ ପଦକ୍ଷେପ। ଏହା ବଦଳରେ ଭେନେଜୁଏଲାକୁ ଆମେରିକାରେ ଅବୈଧ ଭାବରେ ଥିବା ସମସ୍ତ ଭେନେଜୁଏଲାବାସୀଙ୍କୁ ଫେରାଇ ଦିଆଯିବ। ଯାହାମଧ୍ୟରେ ଟ୍ରେନ୍ ଡିର ଆରାଗୁଆ ଦଳର ସଦସ୍ୟ ମଧ୍ୟ ସାମିଲ ଅଛନ୍ତି।
ସେ ଏହା ମଧ୍ୟ କହିଛନ୍ତି ଯେ ଭେନେଜୁଏଲା ଏହି ଲୋକମାନଙ୍କୁ ସେମାନଙ୍କ ଦେଶକୁ ପଠାଇବା ପାଇଁ ପରିବହନ ସୁବିଧା ଯୋଗାଇବାକୁ ମଧ୍ୟ ରାଜି ହୋଇଛି। ଟ୍ରମ୍ପ କହିଛନ୍ତି ଯେ ସମସ୍ତ ଦେଶ ଅବୈଧ ପ୍ରବାସୀଙ୍କୁ ଫେରାଇ ନେବାକୁ ରାଜି ହୋଇଛନ୍ତି ଏବଂ ରେକର୍ଡ ସଂଖ୍ୟକ ଅପରାଧୀଙ୍କୁ ମଧ୍ୟ ଆମେରିକାରୁ ବାହାର କରାଯାଉଛି।
ସୂଚନା ମୁତାବକ, ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ଅଧୀନରେ ପୂର୍ବତନ ସ୍ୱତନ୍ତ୍ର ମିଶନ ଦୂତ ରିଚାର୍ଡ ଗ୍ରେନେଲ ଭେନେଜୁଏଲାର ନେତା ନିକୋଲାସ ମାଦୁରୋଙ୍କ ସହ ଏବିଷୟରେ ଆଲୋଚନା କରିଥିଲେ। ଉଭୟ ଦେଶ ମଧ୍ୟରେ ହୋଇଥିବା ଏହି ଆଲୋଚନା ସଫଳ ମଧ୍ୟ ହୋଇଥିଲା। ଯାହାର ଫଳ ସ୍ୱରୁପ ଗତ ଶୁକ୍ରବାର ଭେନେଜୁଏଲା ନିଜ ଦେଶରେ ବନ୍ଦୀ ଥିବା ଛଅ ଜଣ ଆମେରିକୀୟ ନାଗରିକଙ୍କୁ ମୁକ୍ତ କରିଥିଲା।
ଖବର ମୁତାବକ ଭେନେଜୁଏଲାର ରାଷ୍ଟ୍ରପତି ମାଦୁରୋଙ୍କ ସରକାର ଜୁଲାଇ ମାସରେ ବିଭିନ୍ନ କାରଣ ପାଇଁ ବିଦେଶୀ ନାଗରିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ କରିଥିଲେ। ଅତି କମରେ ନଅ ଜଣ ଆମେରିକୀୟଙ୍କୁ ମଧ୍ୟ ଅଟକ ରଖାଯାଇଥିଲା। ଏହି କଏଦୀମାନଙ୍କ ଉପରେ ହିଂସାତ୍ମକ କାର୍ଯ୍ୟ କରିବାକୁ ଷଡ଼ଯନ୍ତ୍ର ରଚନା କରୁଥିବା ନେଇ ଅଭିଯୋଗ ରହିଥିଲା। କିନ୍ତୁ ଏ ସମ୍ପର୍କରେ କୌଣସି ଠୋସ୍ ପ୍ରମାଣ ମିଳିପାରିନଥିଲା।
