ଭୁବନେଶ୍ୱର,୨୩/୦୧: ପ୍ରଦୂଷଣ ବିହୀନ ଗାଡି ରାସ୍ତାରେ ଗଡ଼ିବା ଉଦ୍ଦେଶ୍ୟରେ ବଡ଼ ଅଭିଯାନ ଚଳାଇଲେ । ପ୍ରଦୂଷଣର ମାନ ପୂରଣ କରୁନଥିବା ଗାଡ଼ି ଜବତ କଲେ । ରାସ୍ତାରେ ଗୋଡ଼ାଇ ଗୋଡ଼ାଇ ଧରି ୧୦ ହଜାର ଟଙ୍କା ଜରିମାନା କଷିଲେ । ପୁରୁଣା ବସ୍, ଟ୍ରକ୍ କାର୍, ଓ ବାଇକ୍ ରାସ୍ତାରୁ ଉଭାନ ହୋଇଗଲା । ମ୍ୟୁନିସିପାଲିଟିର ଦଦରା ଗାଡ଼ି ଓ ଟ୍ରାକ୍ଟର ବି ତଣ୍ଡ ଗଣି କବାଡ଼ିଖାନାରେ ପଡିଲା । ପରିବହନ ବିଭାଗ ଓ ପୁଲସ୍ର ଏଭଳି କାର୍ଯ୍ୟାନୁଷ୍ଠାନ ଦେଖି ଲାଗିଲା ରାଜ୍ୟରେ ଗାଡ଼ି ଦ୍ୱାରା ହେଉଥିବା ପ୍ରଦୂଷଣ କମିଯିବ । ହେଲେ କାଳକ୍ରମେ ସବୁ ଭୁଲି ଯାଇଛନ୍ତି । ଏବେ ଶହ ଶହ ଗାଡ଼ି କଳାଧୂଆଁ ଛାଡ଼ି ରାଜଧାନୀ ରାସ୍ତାରେ ବୁଲୁଛନ୍ତି । ହେଲେ ସେମାନଙ୍କୁ ଧରିବାକୁ କେହି ନାହାନ୍ତି ।
୨୦୧୯ରେ ସଂଶୋଧିତ ମୋଟର ଯାନ ଆଇନ କାର୍ଯ୍ୟକାରୀ ହେଲା ପରେ ଭୁବନେଶ୍ୱର ସମେତ ଅନ୍ୟାନ୍ୟ ଅଞ୍ଚଳରେ ଯାଞ୍ଚ ଚାଲିଲା । ପ୍ରମାଣପତ୍ର ନଥିଲେ ୧୦ ହଜାର ଟଙ୍କା ପର୍ଯ୍ୟନ୍ତ ଜରିମାନା ଆଦାୟ କରାଗଲା । ପ୍ରଦୂଷଣ ପରୀକ୍ଷା କେନ୍ଦ୍ରରେ ନାହିଁ ନଥବା ଭିଡ଼ ଦେଖା ଦେଇଥିଲା । ସ୍ଥିତ ଏମିତି ହୋଇଥିଲା ଯେ, ଆରଟିଓ-୧ ପକ୍ଷରୁ ୨୧ ଟି ଓ ଆରଟିଓ-୨ ପକ୍ଷରୁ ୨୦ଟି ଅତିରିକ୍ତ ପ୍ରଦୂଷଣ ପରୀକ୍ଷା କେନ୍ଦ୍ର ପାଇଁ ଅନୁମତି ଦିଆଗଲା । ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି କିଛି ଲୋକ ପରୀକ୍ଷା କେନ୍ଦ୍ର ଖୋଲିଲେ । ଆରଟିଓ ପକ୍ଷରୁ ସେମାନଙ୍କୁ କୁହାଯାଇଥିଲା ସେମାନେ ଯାହା ନିବେଶ କରିବ ତାହା ଉଠିଯିବ । ଶହ ଶହ ଲୋକ ପ୍ରଦୂଷଣ ପ୍ରମାଣପତ୍ର ନେଇଥିଲେ । ଲୋକଙ୍କୁ ସମୟ ମଧ୍ୟ ଦିଆଯାଇଥିଲା ତୁରନ୍ତ ପଲ୍ୟୁସନ୍ ସାର୍ଟିଫିକେଟ୍ କରିବାକୁ । ହେଲେ ପରିବହନ ବିଭାଗ ଓ ପୁଲିସ୍ ଏ ସବୁ କଥା ଭୁଲି ଗଲେ । ଏବେ ରାଜ୍ୟରେ ଲକ୍ଷ ଲକ୍ଷ ଗାଡ଼ି ବିନା ପଲ୍ୟୁସନ୍ ସାର୍ଟିଫିକେଟ୍ରେ ବୁଲୁଛନ୍ତି । ହେଲ୍ମେଟ୍, ସ୍ପିଡ୍ ଟ୍ରାଇଭ୍, ଓଭର ଲୋଡିଂ ପାଇଁ ପୁଲିସ୍ ଯାଞ୍ଚ କରୁଛି । ହେଲେ ପ୍ରଦୂଷଣ ପ୍ରମାଣପତ୍ର କଥା ଭୁଲିଯାଇଛି । ଫଳରେ ପ୍ରଦୂଷଣ ବଢ଼ିବାରେ ଲାଗିଛି । ଏବେଠୁ ଯଦି ଏହା ଉପରେ ନଜର ଦିଆ ନ ଯାଏ ତା’ହେଲେ ଆଗକୁ ସ୍ଥିତି ସାଂଘାତିକ ହେବା ଆଶଙ୍କା ଉପୁଜିଛି ।
ରିପୋର୍ଟ କହୁଛି, ବାୟୁ ପ୍ରଦୂଷଣ ପ୍ରତିବର୍ଷ ୭ ନିୟୁତ ଲୋକଙ୍କର ଅକାଳମୃତ୍ୟୁର କାରଣ । ସମୟ କ୍ରମେ ଆମର ଫୁସଫୁସ୍, ହୃତପିଣ୍ଡ ଓ ମସ୍ତିଷ୍କ ସ୍ୱାସ୍ଥ୍ୟକୁ ଖରାପ କରିଥାଏ । ୦.୦୧ ମାଇକ୍ରନରୁ ୩୦୦ ମାଇକ୍ରନ ପର୍ଯ୍ୟନ୍ତ କ୍ଷୁଦ୍ର କଣିକା ଆମର ରକ୍ତ ପ୍ରବାହରେ ପ୍ରବେଶ କରି ଫୁସଫୁସ ଭିତରକୁ ଯାଇପାରେ । ବାୟୁ ପ୍ରଦୂଷଣ ମଧ୍ୟ ମସ୍ତିଷ୍କରେ ପ୍ରଦାହ ସୃଷ୍ଟି କରିପାରେ । ଖାଲି ପଲ୍ୟୁସନ୍ ନୁହେଁ ପୁଲିସ୍ ଓ ପରିବହନ ବିଭାଗର ସବୁ କାମ ଅଧପନ୍ତରିଆ । ସାରା ଦେଶରେ ହାଇସିକ୍ୟୁରିଟି ନମ୍ବର ପ୍ଲେଟ୍ ଲଗାଇବାକୁ ନିର୍ଦ୍ଦେଶ ଦିଆଗଲା । ସେଥିପାଇଁ ନିଦ୍ଦିଷ୍ଟ ସମୟ ମଧ୍ୟ ରହିଲା । କିଛି ଲୋକ ନିୟମ ମାନିଲେ । ବାକି ନିୟମକୁ ଦଳି ଦେଲେ । ରାଜ୍ୟରେ ଏବେବି ୪୦% ଗାଡ଼ି ମାଲିକ ହାଇସିକ୍ୟୁରିଟି ନମ୍ବର ପ୍ଲେଟ୍ ନ ଲଗାଇ ଗାଡ଼ି ଚଢୁ଼ଛନ୍ତି ।
