ଭୁବନେଶ୍ଵର, ୨୩/୦୧ : ବାଚସ୍ପତିଙ୍କ ତାଗିଦ୍ ପରେ ମୁହଁ ଖୋଲିଲେ ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ। ସେ କହିଛନ୍ତି ଯେ, ଗଣତନ୍ତ୍ରରେ ବିରୋଧୀଙ୍କ ସ୍ଵର ଚପେଇବା ପାଇଁ ବାଚସ୍ପତି ଉଦ୍ୟମ କରୁଛନ୍ତି। ବିରୋଧୀଙ୍କୁ ନାଲି ଆଖି ଦେଖାଇଲେ ଚଳିବ ନାହିଁ। ଏଥିରେ ବିରୋଧୀଙ୍କ ସ୍ଵର ବନ୍ଦ ହେବ ନାହିଁ। ବରଂ ଦୋଷ ତ୍ରୁଟିକୁ ଉପସ୍ଥାପନା କରାଯିବ। ମୁଁ ବାଚସ୍ପତି ଥିବା ବେଳେ ସେ କିଭଳି ବ୍ୟବହାର କରିଥିଲେ ତାହା ସାରା ଓଡ଼ିଶା ଦେଖିଥିଲା। ଆମେ ସେପର୍ଯ୍ୟନ୍ତ ଯାଇନୁ, ବାଧ୍ୟ କଲେ ସେପର୍ଯ୍ୟନ୍ତ ଯିବୁ।
ଏହି ଖବରଟିକୁ ପଢନ୍ତୁ- ବିରୋଧୀଙ୍କୁ ବାଚସ୍ପତିଙ୍କ ଚେତାବନୀ, 'ବିଶୃଙ୍ଖଳା କଲେ ବରଦାସ୍ତ କରାଯିବନି'
ସୂଚନା ଥାଉକି, ଆସନ୍ତା ଫେବୃଆରୀ ୧୩ରୁ ସପ୍ତଦଶ ବିଧାନସଭାର ତୃତୀୟ ଅଧିବେଶନ ଆରମ୍ଭ ହେବ। ଏହାକୁ ନେଇ ବାଚସ୍ପତି ସୁରମା ପାଢୀ ବିରୋଧୀଙ୍କୁ ଚେତାବନୀ ଦେଇଥିଲେ। ସେ କହିଥିଲେ ଯେ, ଚଳିତ ବିଧାନସଭାରେ ବିରୋଧୀଙ୍କ ବିଶୃଙ୍ଖଳାକୁ ବରଦାସ୍ତ କରାଯିବନି। ଅଧିବେଶନରେ ବିରୋଧୀ ଗଠନମୂଳକ ପରାମର୍ଶ ଦେଲେ ଉପାଦେୟ ହେବ। କିନ୍ତୁ ବିଶୃଙ୍ଖଳା ଆଚରଣ କଲେ ବରଦାସ୍ତ କରାଯିବନି। ବିରୋଧୀ ଦଳ ବିରୋଧୀ ଭୂମିକା ନିଭାନ୍ତୁ। ଗଠନମୂଳକ ପରାମର୍ଶ ଦିଅନ୍ତୁ। ସମୟ ଅଛି ସର୍ବଦଳୀୟ ବୈଠକ ଡକାଯିବ। ତାରିଖ ସ୍ଥିର ହୋଇନି ବୋଲି କହିଛନ୍ତି ବାଚସ୍ପତି।
